«Къэрэшей-Черкесым и лIыхъужьхэр» кадровэ зэпеуэ хэхам и Жылагъуэ Советым и зэIущIэр екIуэкIащ ди хэгъуэгум и Iэтащхьэмрэ и Правительствэмрэ я Администрацэм и УнафэщI Уэз Мурат и унафэм щIэту. «Къэрэшей-Черкесым и лIыхъужьхэр» республикэ программэм и унафэщI Уртенов Азнаур псалъэ щратым къыхигъэщащ зэпеуэм хагъыхьэнухэр гъэунэхуныгъэ щIыкIэу ягъэбелджылыуэ, нэрыбгэ 17 къызэрыхахар, абыхэм мазийкIэ Ищхъэрэ-Кавказ къэрал академием егъэджэныгъэ программэр ягуэщIыну къазэрыпэщылъыр.
Ар модулиплIу гуэшауэ щытынущ: къэрал политикэмрэ къэрал IуэхузехьэкIэ бэзымрэ, хэгъуэгу, муниципальнэ IэнатIэхэр зехьэныр, иджырей технологиехэм я къэгъэсэбэпыкIэр.
Теорие лэжьыгъэхэм къанэмыщIауэ, зэпеуэм хэтынухэм я пщэ илъынущ я щIэныгъэкIэ загъэунэхужыну. ЗэрагугъэмкIэ, зауэм и ветерани 8-р куэд мыщIэу ирагъэджэн щIадзэнущ, СВО-м хэт нэрыбги 9-р программэм и етIуанэ Iыхьэм хэхуэнущ. «Шэч хэмылъу, ди щIалэхэм фагъэджынур, фи зэхэщIыкIыр, Хэкум хувиIэ щыпкъагъэр къыфхуэщхьэпэжынущ фызыщалъхуа щIыналъэмрэ Урысеймрэ яфI зыхэлъ Iуэхухэр гъэкIуэтэнымкIэ. Фи щапхъэм ирырегъэгушхуэ нэгъуэщIхэри!» — щитхащ и телеграм-каналым ди хэгъуэгум и лIыщхьэм. «Къэрэшей-Черкесым и лIыхъужьхэр» программэм хэтхэр, зэпеуэм зэрызыкъыщагъэлъэгъуэнум емылъытауэ, IэнатIэ ятыным теухуауэ хэгъуэгум и Iэтащхьэм ищIа пщэрылъыр зэрагъэзащIэми щрипсэлъащ зэIущIэм. Апхуэдэу, ЛIыхъужьыгъэм и орденым и кавалеру, къулыкъум и подполковникыу программэм хэт зы нэрыбгэр ирагъэблэгъащ СКГА-м и военнэ еджапIэ купсэм и унафэщI IэнатIэм техьэну. СВО-м и зы ветеран щылэжьэнущ «Авангард» Купсэм и педагог-узэщIакIуэу.
СВО-м и ветеран, «ЛIыхъужьхэм я зэман» федеральнэ кадровэ программэм хэт Аккао Амир зэрыжиIамкIэ, зауэм къикIыжа цIыхум и дуней еплъыкIэр нэгъуэщI мэхъу, гъащIэм нэгъуэщIынэкIэ еплъын щIедзэ, дзэм къыхэкIыжар мамыр гъащIэм хэшэжынымкIэ мыпхуэдэ программэхэм мыхьэнэшхуэ яIэщ. АтIэ, нобэ кадровэ программэм тыншу пхыкIым IэнатIэ лъагэхэр къыхуагъэфащэмэ, пщэдей ар зауэ операцэ хэхам къикIыжынухэм гъуазэу яIэнущ. «Сэ хуабжьу срогуфIэ мы программэр ди республикэм зэрыщагъэзащIэм, абы цIыхум и лъэкIыныгъэхэр сэтей къищIынущ, тыншу псэууи игъэпсыжынущ», — жиIащ абы. Фигу къэдгъэкIыжынщи, «Къэрэшей-Черкесым и лIыхъужьхэр» кадровэ зэпеуэ хэхар мы гъэм мазаем (февралым) и 25-м щIидзауэ йокIуэкI икIи ар епхащ Урысейм и Президент Путин Владимир и жэрдэмкIэ ирагъэжьа «ЛIыхъужьхэм я зэман» федеральнэ проект иным. ЛЫХЬ Тимур
Больше на Черкес хэку
Подпишитесь, чтобы получать последние записи по электронной почте.
