Хэку зауэшхуэ… Сыту куэд щыгъэпщкIуа мы псалъэхэм: уз хьэлъэм къигъэщI нэпс гуащIэхэр, гуащIэдэкI нэпсыр, махуэ кIыхьхэр, хьэлъэхэр, мазэхэр, илъэсхэр, дэтхэнэ зы пIалъэри шынагъуэкIэ гъэнщIауэ.
Зауэр зэрыщIидзэу, си адэшхуэр, Аргун Хъызыр Къагир и къуэр, дзэм ираджащ. Ар минрэ щибгъурэ тIощIрэ зырэ гъэм Зеикъуэ къуажэм къыщалъхуащ. Ауэ жылагъуэм дэсхэм ящыщхэр щыкуэшыжым, сабийуэ Куэш-Хьэблэ къахьыжащ.
НэгъуэщI къуажэдэсхэм яхуэдэу, зауэр къыщыхъейм, Хэкур ихъумэну пэрыуващ. Абы я дежхэм къахуитх сатырхэм зауэм къыщекIуэкIхэм щытепсэлъыхьт, унагъуэм щIэсхэм я узыншагъэм къыщIэупщIэт, и анэми хуабжьу къыхуэгузавэт, сыту жыпIэмэ, езыр зауэм щрагъажьэм щыгъуэ, и анэм и нэпсхэр хуэмыубыду къызэрежэхыу щытар и нэгу хущIэгъэкIтэкъым.
Си дадэм и псалъэхэм къыхощ ар сержант нэхъыжьу, отделенэм и командиру зэрыщытар. Адэшхуэр фронт зэхуэмыдэхэм щызэуащ: япэ Прибалтийскэм, етIуанэ Украинскэм, абыхэм нэмыщIу, щэнейрэ уIэгъэ здэхъуа Сталинградскэм. И узыншагъэр зэрызэтеувэжу, занщIэу фронтым Iуувэжт, ТекIуэныгъэм щIэбэнын, ар къигъэгъунэгъун папщIэ.
Си адэшхуэм и анэм жэщмахуэ имыIэу и нэпсхэр щIигъэкIт, и къуэр псэууэ къигъэзэжыну Тхьэм елъэIут.
Си анэшхуэм и хъуэпсапIэр къехъулIащ. Минрэ щибгъурэ плIыщIрэ хырэ гъэм, зауэр зэриухрэ илъэс текIыжауэ, си адэшхуэ Хъызыр и унагъуэм къахыхьэжауэ щытащ.
Абы къыхуагъэфэщащ «Славы», «Отечественной войны», «Красной Звезды» орденхэр, «За боевые заслуги», «За оборону Сталинграда» медалхэр.
Ди унагъуэм щызэIэпах хъыбарымкIэ, «За оборону Сталинграда» медалыр къыщищтэкIэ, зыхуэмыубыду дадэ сыт щыгъуи гъыт.
А зэхэуэ гуащIэхэм ятеухуа и гукъэкIыжхэр, дауи, хьэлъэ дыдэт. Дауи, и нэгу къыщIыхьэжт а зэхэуэм щыфIэкIуэда и ныбжьэгъухэр, къыдэзэуахэр…
Зауэм къикIыжа нэужь си адэшхуэр «Путь Ильича» колхозым куэдрэ щылэжьащ. НасыпыфIэу, гъащIэ кIыхьу псэуащ, и унагъуэр зыми хуимыгъэныкъуэу. ЖыпIэнурамэ, Iуэхуншэу зы махуи игъэкIуакъым.
Си анэшхуэри, Аргун Зуриджэт Iэбубэчыр и пхъур, си адэшхуэм и гъусэу колхозым хэтащ, сабиих зэдапIащ, зэгурыIуэрэ зэдэIуэжу псэуащ.
Жагъуэ зэрыхъущи, зауэ гуауэр зи нэгу щIэкIа си адэшхуэ хахуэр дунейм тетыжкъым, къапщтэмэ, ди къуажэм щыщу Хэку зауэшхуэм хэта адрей лIыхъужь куэдым яхуэдэу. МинитIрэ плIы гъэм дунейм ехыжащ. Ауэ абы и фэеплъыр си щхьэкIи, ди унагъуэми, Iыхьлы Iэулэдхэми зэи тщыгъупщэкъым, фэеплъ лъапIэу зыдохьэ.
ТекIуэныгъэр къытхуэзыхьа, фашизмэм текIуа ди адэшхуэхэращ зи фIыщIэр дэ сабиигъуэ насыпыфIэ зэрыдиIар, ноби, илъэс 80 текIыжащи, мамыр гъащIэ дызэрыхэпсэухьыр.
Зыми хуитыныгъэ диIэкъым зыщыдгъэгъупщэну Хэку зауэшхуэм ТекIуэныгъэр къыщыхьыным ди къэралым щIита уасэр. Дыхуейкъым зауэ, щрет дунейр мамыру!
АРГУН Аринэ, Амирокъуэ И. и цIэр зезыхьэ Куэш-Хьэблэ гимназием и е 7-нэ классым и еджакIуэ
Больше на Черкес хэку
Подпишитесь, чтобы получать последние записи по электронной почте.
