ЯщIар куэдщ, къапэщылъри нэхъыбэжщ

Къэрэшей-Черкесым егъэджэныгъэмрэ щIэныгъэмрэкIэ и Министерствэм республикэм и Правительствэм и Унэм зэIущIэ убгъуа щригъэкIуэкIащ къэрал унафэщI къулыкъухэр, щIэныгъэ зэгухьэныгъэхэм я лIыкIуэхэр, педагогхэмрэ жылагъуэ Iуэхузехьэ пашэхэмрэ хэту.

Абдеж къыщапщытэжащ илъэс кIуам Министерствэм зэфIиха лэжьыгъэхэр, нэхъыбэу юбилей махуэщIхэмрэ хэкупсэ хьэрычэтхэмрэ ещIылIауэ щытахэр. УпщIэ нэхъыщхьэу коллегием хэтахэм зэпкърахащ: Министерствэр гъэ къэс зэлэжь лъэныкъуэхэм, абы къыхуагъэув къалэнхэм къапэкIуар, Хэку зауэшхуэм ТекIуэныгъэр къызэрыщытхьрэ илъэс 80 зэрырикъуам теухуауэ ирагъэкIуэкIа дауэдапщэхэр. Ахэр еджакIуэхэмрэ егъэджакIуэхэмрэкIэ хуабжьу сэбэпщ зыщалъхуа щIыналъэм иригушхуэрэ пщIэ хуащIу щытынымкIэ. Темыпсэлъыхьу къагъэнакъым цифровизацэмрэ «Макс» щIыдэлъху мессенджерымрэ дяпэкIэ ди гъащIэм зэрыхэтыну щIыкIэми.

АтIэ, арыншэу хэгъуэгум и хъыбарегъащIэ инфраструктурэр нэхъ лъэщуи, нэхъ шынагъуэншэуи щымытыну жаIэ. ЕджапIэхэм я щытыкIэхэм уасэ иратащ икIи егъэджэныгъэ лэжьыгъэм IэмалыфIхэр къыхуэгъуэта зэрыхъунри къыхагъэщащ, отраслевой ЗэгурыIуэныгъэр гъэзэщIэнымкIэ илъэсищ пIалъэм пащащ. Ар тещIыхьауэ щытынущ педагогхэм я IэпщIэлъапщIагъыр хэгъэхъуэнымрэ ядэIэпыкъунымрэ. Министр Кравченко Иннэ къыщыпсалъэм къызэрыхигъэщамкIэ, илъэс кIуам гулъытэ хэха зыхуащIахэм ящыщщ еджакIуэр сыт и лъэныкъуэкIи къызыхуэтыншэу къызэгъэпэщыным, апщыгъуэм дежи нэрыбгэ къэс хьэл-щэныфIу иIэр къигъэлъэгъуэну икIи щIалэгъуалэм гущхьэгъэсэкIэ дахэхэр сэтей къищIыну хузэфIэкIыу. «2025 гъэм дэ дгъэзэщIащ хэкупсагъэм ехьэлIа проектхэмрэ акцэхэмрэ, аращ ди фIэщ щIэхъур — блэкIа димыIэу, къэкIуэни зэрыдимыIэнур.

«Урысейм щыпсэу цIыхур зыхуэныкъуэншэу къызэдгъэпэщын, едгъаджэурэ дгъэсэн» къыхуеджэныгъэм дытету долажьэ иджыр къыздэсым», — жиIащ министрым. Коллегием и лэжьыгъэм ипкъ иту, Хэкум и хъумакIуэм и Илъэсым хуэгъэзауэ иригъэкIуэкIа Iуэхухэри къипщытэжащ Министерствэм. Шэчыншэу, ди къэралым и дежкIэ ар къызэрымыкIуэ къэхъугъэщ, сыт щхьэкIэ жыпIэмэ, абы дигу къигъэкIыжащ дяпэ итахэм зэрахьа лIыхъужьыгъэр икIи дыкъыхуриджащ тхыдэ фэеплъымрэ хэкупсагъэм и мыхьэнэмрэ щIэблэщIэхэм яхуэтхъумэну. Хэгъуэгум и егъэджэныгъэ бэзым зегъэужьыным хэлъхьэныгъэшхуэ зэрыхуащIам, хэкупсэ дауэдапщэхэр зэрырагъэкIуэкIамрэ еджакIуэхэр щэнхабзэ-узэщIыныгъэ проектхэм зэрыхашамрэ папщIэ, зи лэжьыгъэкIэ къыхэжаныкIахэм Министерствэм ФIыщIэ тхылъ яхуигъэфэщащ.

Министрым къыхигъэщащ Хэкур фIыуэ зылъагъу, зыхъумэ ныбжьыщIэхэр гъэхьэзырыным куэд зэрелъытар, къэралым и блэкIар ялъытэу, гъащIэ еплъыкIэ жыджэр яIэу ахэр къэгъэтэджыныр иджырей егъэджэныгъэм и къалэн нэхъыщхьэу зэрыщытыр. КъинэмыщIауэ, КъЧР-м егъэджэныгъэмрэ щIэныгъэмрэкIэ и Министерствэм 2026-2028 гъэхэм къриубыдэу зэрызэдэлэжьэнымкIэ хэгъуэгу отраслевой ЗэгурыIуэныгъэр яриухылIащ Къэрэшей-Черкесым егъэджакIуэхэм я профсоюз зэгухьэныгъэмрэ Урысей Федерацэм егъэджэныгъэмрэ щIэныгъэмрэкIэ и Министерствэмрэ.

А ЗэгурыIуэныгъэм къегъэлъагъуэ егъэджэныгъэм и фIагъыр къэIэтынымкIэ, педагогхэм я хуитыныгъэхэр хъумэнымрэ республикэм и егъэджэныгъэ бэзым зегъэужьынымрэкIэ хэгъуэгу унафэщIхэмрэ Профсоюзымрэ я лэжьыгъэм мыхьэнэшхуэ зэриIэр. ЗэIущIэм и кIэм, 2025 гъэм лэжьыгъэфI къэзыгъэлъэгъуа еджапIэхэри ягъэнэIуащ. Апхуэдэу, республикэм ику ит IэщIагъэ къыздыщIах еджапIэ нэхъыфIу къалъытащ шхынымкIэ, туризмэмрэ сервисымрэкIэ Черкесск дэт колледжыр.

Абы къыкIэлъокIуэ аграрнотехнологическэ колледжыр, индустриально-технологическэ колледжыр, Учкекен дэт ебланэ курыт еджапIэр, Хьэбэч Умар и цIэр зезыхьэ педколледжыр. Мы еджапIэхэращ нэхъ гъэлъэгъуэныгъэфI къэзыгъэлъэгъуар, эксперт советым хэтхэм балли 100-м нэсу зыхуагъэувар. Министерствэм фIыщIэ яхуещI зи лэжьыгъэкIэ къахэща еджапIэхэм щылажьэхэм, икIи мэгугъэ хэгъуэгум и егъэджэныгъэр ирагъэфIакIуэу дяпэкIи лэжьэну. ЛЫХЬ Тимур