Щэнхабзэм и лэжьакIуэм и Махуэм ипкъ иту, «Единая Россия» партым Черкесск къалэм щиIэ Штабым и хэщIапIэм щэнхабзэм и къудамэ зэхуэмыдэхэм жыджэру, ехъулIэныгъэ яIэу хэлъэщыхь лэжьакIуэхэр къыхагъэбелджылыкIащ.
Псори зэхэту гулъытэ ягъуэтащ щэнхабзэм и лэжьакIуэ 32-м. Апхуэдэщ актерхэр, музыкантхэр, библиотекэхэм, музейхэм я лэжьакIуэхэр, ныбжьыщIэхэр гъуазджэм и дунейм япэ лъэбакъуэкIэ хэзышэ егъэджакIуэхэр, нэгъуэщIхэри.
МахуэщI дауэдапщэм къекIуэлIахэм фIэхъускIэ хъуэхъукIэ захуигъэзащ «Единая Россия»-м Къэрэшей-Черкесым щиIэ къудамэм и зыгъэзащIэ комитетым и унафэщI Джамбаев Руслан. — ХэткIи гурыIуэгъуэщ щэнхабзэм цIыхум и дуней еплъыкIэр зэриухуэр, абы и зыужьыныгъэм ди щIалэгъуалэм и гъэсэныгъэр зэрелъытар. Аращи, щэнхабзэм и лэжьакIуэм игъэзащIэ къалэным уасэу иIэр къэхутэгъуейщ.
Фэ хабзэжьхэм фрихъумакIуэщ, гъуазджэм зезыгъэужь, цIыхугур дахагъэм къыхуэзыгъэуш фыкъару лъэщщ, — къыхигъэщащ и къэпсэлъэныгъэм абы икIи и псалъэм къыдэкIуэу партым къыбгъэдэкIа щIыхь тхылъхэр гъуазджэр зи лъагъуэ лэжьакIуэхэм яIэщIигъэхьэжащ.
Щэнхабзэм и лэжьакIуэхэм хъуэхъукIэ япежьащ Къэрэшей-Черкесым щэнхабзэмкIэ и министр, «Единая Россия»-м къигъэщIа «Культура малой Родины» партпроектым ди хэгъуэгум деж и тхьэмадэ Агырбэ Зураби. Абы и къэпсэлъэныгъэм къыхигъэщащ нобэ тлъагъу зэхъуэкIыныгъэфIхэм я лъабжьэр политикэ, экономикэ, нэгъуэщI лэжьыгъэ купщIафIэхэм я деж къызэрыщежьэр.
Министрым жиIащ мы гъэм «Земский работник культуры» программэри ди хэгъуэгум зэрыщрагъэжьар. ИджыкIэ а программэм ипкъ иту квоти 4-щ щыIэр, ауэ гъэ къакIуэ ди Министерствэр апхуэдэ квотэ 24-м щIэлъэIуащ.
А псом къыдэкIуэу Астэжь Аслъэнрэ Ситников Дмитрийрэ ФIыщIэ тхылъхэр яхуигъэфэщащ.
Байчоровэ М. и цIэр зезыхьэ тхыдэ-щэнхабзэ, щIыуэпс музей-къуэдмэзым и унафэщI Хасанов Хьэнэфий, «Молодая Гвардия Единой России» Урысейпсо жылагъуэ организацэм КъЧР-м щиIэ хэгъуэгу къудамэм и унафэщI Чомаевэ Ангелинэ сыми а махуэм щэнхабзэм и лэжьакIуэхэм псалъэ гуапэкIэ зыхуагъэзащ.
Гуапэ зэрыхъущи, гулъытэ зыгъуэта щэнхабзэм и лэжьакIуэхэм ящыщ ди лъэпкъэгъухэу ДжэдыгущIэ Ахьмэд, Милюхинэ Iэсят, Чырбыж Аслъэн, Шыбзыхъуэ Щэмил, Хьэкъун Кемран, Братхэ Линэ, нэгъуэщIхэри.
МахуэщIыр концерт зэкIужкIэ ягъэдэхащ сабий творчествэмкIэ Черкесск къалэм дэт Унэм и артист ныбжьыщIэхэм. Абыхэм я зыкъэгъэлъэгъуэныгъэр иджыри зэ щыхьэт техъуащ Къэрэшей-Черкесым и щэнхабзэм зэрызиужьыр, гъуазджэр зи Iэпэгъу щIэблэщIэ къызэрызэщIэтаджэр.
ГЪУКIЭКЪУЛ Иринэ
Больше на Черкес хэку
Подпишитесь, чтобы получать последние записи по электронной почте.
