Мы гъэм илъэс 80 ирокъу ди къэралым Хэку зауэшхуэм ТекIуэныгъэр къызэрилъэщрэ. А махуэшхуэм ехъулIэу ди республикэм, нэгъуэщI хэгъуэгухэм хуэдэуи, фэеплъ дауэдапщэ зэмылIэужьыгъуэхэр щекIуэкI зэпыту дыкъогъуэгурыкIуэ. Апхуэдэ махуэщI дахэхэм языхэз хъуащ Черкесск къалэм дэт къэрал филармонием мэлыжьыхьым и 30-м щекIуэкIа «Пою тебе, моё Отечество» зэхьэзэхуэри. Абы ипкъ иту медицинэм епха организацэхэм я лэжьакIуэхэр зауэ-хэкупсэ уэрэдхэр жыIэнымкIэ зэпеуащ.
Мы зэхьэзэхуэ гъэщIэгъуэным и къалэн нэхъыщхьэу щытар зэуапIэхэм щыIа, хэкIуэда дэтхэнэ лIыхъужьми нобэ псэухэм пщIэ зэрыхуэтщIыр, зэрахьа хахуагъэр къызэрыдгурыIуэр гъэбелджылынращ.
ЖыIэпхъэщи, зэпеуэр япэу ди хэгъуэгум щекIуэкIащ, ар зи жэрдэму щытар Къэрэшей-Черкесым узыншагъэр хъумэнымкIэ и министр Камурзаевэ Динарэщ. Дауэдапщэр къызэIуихкIэрэ, абы жиIащ Хэку зауэ-
шхуэм щыгъуи, ноби, зауэ операцэ хэхар щекIуэкI пIалъэми, медицинэм и лэжьакIуэхэм я мыхьэнэр къэпщытэгъуейуэ зэрыщытыр. — Медикхэр — зауэлIхэм хуэдэу шынагъуэншагъэр IуагъэкIуэту я лэжьыгъэр зэуапIэми щызыгъэзащIэ цIыху щыпкъэхэщ. Тхьэм фигъэпсэу лэжьыгъэ фи куэдми, мыпхуэдэ зэпеуэм фыхэтыну гукъыдэжрэ зэман къызэрыхуэвгъуэтам папщIэ! – жиIащ Камурзаевэ Динарэ.
Хэкупсагъэр зи лъабжьэ зэпеуэм медицинэ IуэхущIапIэу 20 хэтащ. Дэтхэнэ гупми гукIэ, псэкIэ уэрэдхэр къызэрыхахар, ахэр зэрыжаIар нэрылъагъут. Ар гурыIуэгъуэщ, зи дадэ, адэ Хэку зауэшухэм хэмыта гъуэтыгъуейуэ къыщIэкIынщ.
Мы зэпеуэм хэта, Черкесск къалэм унагъуэ къэгъэщIынымкIэ купсэм и унафэщI Байчоровэ Руфинэ къызэрыхигъэщащи, «Отмените войну» уэрэд къыхахар теухуащ зауэм щыгъуэ сабийхэм зыхащIа хьэзабым. Бзылъхугъэм зэрыжиIамкIэ, купсэм къыбгъэдэкIа гупыр хуейщ иджырей щIалэ-
гъуалэм ди блэкIар ящымыгъупщэну, ди зауэлIхэм ТекIуэныгъэр къызэралъэща уасэшхуэр къагурыIуэну.
Пэжщ, дэтхэнэ гупри зэкIужу утыкум итащ, ауэ зэпеуэ щыхъукIэ текIуэныгъэри зы тIэкIукIэ адрейхэм къащхьэщыкIам лъыс хабзэщ.
Апхуэдэу, мы зэпеуэм текIуэныгъэр къалъэщащ республикэ перинатальнэ купсэм къыбгъэдэкIа гупым, етIуанэ хъуащ – республикэ дзэ поликлиникэмрэ Карачаевск дэт сымаджэщымрэ, ещанэ увыпIэр ялъысащ УстьЖэгуэтэ дэт сымаджэщым, сабий сымаджэщым (ДМБ), сабий дзэ поликлиникэм.
Жюрим хэтащ Камурзаевэ Динарэ, зэIэзапIэ-реабилитацэ купсэм и дохутыр нэхъыщхьэ Темрезов Бориспий, республикэм щэнхабзэмкIэ и министр Агырбэ Зураб, абы и къуэдзэ Баисовэ Маринэ, республикэ къэрал филармонием и унафэщI Бэрокъуэ Рэмэзан, цIыхубэ щэнхабзэмкIэ купсэм и унафэщI Разин Артём сымэ.
ГЪУКIЭКЪУЛ Иринэ
Больше на Черкес хэку
Подпишитесь, чтобы получать последние записи по электронной почте.
