Лъэпкъхэм я зэкъуэтыныгъэм и Махуэр дауэдапщэ иным щIэту щагъэлъэпIащ Прикубан районым хыхьэ Кавказскэ жылагъуэм. МахуэщIыр ирагъэжьащ жылагъуэм дэт щэнхабзэмкIэ Унэм къыщызэрагъэпэща, лъэпкъ зэхуэмыдэхэм къахэкIа творческэ гупхэм я зыкъэгъэлъэгъуэныгъэхэмкIэ.
Сценэм щыIуащ цIыхубэм фIыуэ илъагъу пасэрей уэрэдхэри, иджырей щIалэгъуалэр зыIэпызышэ макъамэхэри, районым щэнхабзэмкIэ и Купсэм и нэIэм щIэт творческэ ансамбль нэхъыфIхэм я зыкъэгъэлъэгъуэныгъэхэр. Къапщтэмэ, махуэщIым нэхъри зэкъуигъэуващ Прикубан районым щыпсэу лъэпкъ зэхуэмыдэхэр, зэныбжьэгъугъэр, зэгурыIуэныгъэр ягъэщыпкъэу. Иджыри зэ щыхьэт техъуахэщ Урысейм и къару нэхъыщхьэр — къэралым щыпсэу лъэпкъхэм я зэкъуэтыныгъэу, Хэку фIылъагъуныгъэу зэрыщытым.
Концерт гъэлъэгъуэныгъэ нэужьым, жылагъуэм и хьэщIэхэр: КъЧР-м и къэрал власть къулыкъухэм къабгъэдэкIахэри, курыт еджапIэхэм къикIа еджакIуэхэри екIуэлIащ жылагъуэ купсэм щызэрагъэзэхуэжу а махуэм гуфIэгъуэ дауэдапщэм щIэту къызэIуаха ТекIуэныгъэм и паркым. А Iуэху дахэмкIи иджыри зэ ягъэщыпкъащ тхыдэ фэеплъыр зэрымыкIуэдыр, абы щIэблэхэм пщIэ зэрыхуащIыр, цIыхубэр зэрызэкъуигъэувэр.
МахуэщIым нэхъри мыхьэнэ езытар мы гъэр Хэкум и хъумакIуэм и Илъэсу зэрыщытращ. Нобэ хэкупсагъэ- лъэпкъыпсагъэм щIапIыкI щIалэгъуалэмкIэ къызэрымыкIуэ щапхъэщ фашизмэр зэхэзыкъутэу Хэку зауэшхуэм щыгъуэ ТекIуэныгъэр къэзыхьахэр, нобэ Хэкум и щIыхьыр зыхъумэу зауэ опе рацэ хэхам щыIэхэр. Мы махуэщIым щыкуэда щIалэгъуалэм игъэщыпкъащ Хэкум и хъумакIуэ ерыщу зэрыщытынур! Iуэхугъуэм къеблэгъащ КъЧР-м и Правительствэм и тхьэмадэм и къуэдзэ Урусов Марат, Прикубан район администрацэм и Iэтащхьэ Семёнов Ахъмэт, республикэм мэкъумэш хъызмэтымкIэ и министр Биджиев Умар сымэ.
МахуэщIыр къыщызэIуахым псалъэ зыхуагъэфэща, Прикубан район администрацэм и Iэтащхьэм жиIащ: — Районым щыпсэухэм, псом хуэмыдэу, нэхъыжьхэм къыбгъэдэкIа жэрдэм гуапэщ нобэ гъэщIэрэщIэжауэ къызэIутхыж, «ТекIуэныгъэм и парк» зыфIэтща зыгъэпсэхупIэ щIыпIэ дахащэр. Гуапэ зэрытщыхъуну, ди районым щыпсэухэм къабгъэдэкIа жэрдэмыр республикэм и Iэтащхьэм къыддиIыгъри, нобэ фолъагъу IуэхуфI зэтщIылIэу къэдгъэщIэрэщIэжа щIыпIэр.
ДэIэпыкъуэгъу къытхуэхъуа дэтхэнэми фIыщIэ ин яхудощI. ДяпэкIи дыхущIэкъунущ цIыхухэм я щыIэкIэ-псэукIэр егъэфIэкIуэным. Си фIэщ мэхъу ди Правительствэм дэтхэнэ ди жэрдэмри къызэрыддиIыгъынур. Нэхъыщхьэр, дызэкъуэту сыт хуэдэ Iуэхури зэрызэдэдгъэкIуэтэнуращ. Дызэкъуэт мэ – зыри къытпэлъэщынукъым. Сывохъуэхъу мы махуэщI лъапIэмкIэ, Iуэхугъуэ дахэмкIэ! – къыхигъэщащ Семёнов Ахъмэт. Къапщтэмэ, дэтхэнэ къэпсэлъами къыхигъэщащ къагъэщIэрэщIэжа ТекIуэныгъэм и паркыр цIыхухэм я зыгъэпсэхупIэ къудей мыхъуу, ди къэралым и тхыдэ блэкIамрэ нобэреймрэ зэпызыщIэну щIыпIэ зэрыхъунур.
Жылагъуэдэсхэмрэ хьэщIэхэмрэ куэду зыхэта мы махуэщIыр сыткIэ гъэнщIауэ щыта, жыпIэу ущIэупщIэмэ, щIэблэхэр зэкъуагъэуващ мыбдеж къыщагъэщIа гъэлъэгъуэныгъэхэм: зауэм, мамырыгъэм тращIыхьа теплъэгъуэхэм, губгъуэ шхапIэм, творческэ мастерклассхэм. Иужьрей IуэхугъуэхэмкIэ къызэщIрагъэубыдащ нобэ СВО-м щыIэ ди къулыкъущIэхэр нэхъ зыхуэныкъуэ хьэпшыпхэр щIыныр: Iэпщэхъу зэмылIэужьыгъуэхэр, щIытIым щисым къыщагъэсэбэп шэху уэздыгъэхэр, зэрызагъэпщкIу хъы зэпыщIэныгъэхэр: ящIащ зэрызагъэкъабзэ пкъыгъуэ гъущэхэр, къапщтэмэ, къулыкъум щыIэ ди щIалэхэр нэхъ зыхуэныкъуэхэр.
ЛъыхъуакIуэ гупхэм къаIэрыхьэ Iэщэхэм, зауэлIхэм я хьэпшыпхэм я гъэлъэгъуэныгъэхэр икъукIэ гъэщIэгъуэн ящыхъуащ щIалэ цIыкIухэм: зрапщытащ автоматми, нэгъуэщI зауэлI Iэмэпсымэхэми. МахуэщIым къекIуэлIахэм жаIащ лъэпкъхэм я зэкъуэтыныгъэм и махуэщIым – граждан зэдэгъуэгурыкIуэныгъэр, зэгурыIуэныгъэр, тхыдэм и фэеплъыр хъумэныр зэрагъэщыпкъэр. КъинэмыщIауэ, махуэщIым ипкъ иту жылагъуэм къыщызэIуахыжа ТекIуэныгъэм и паркым лъэпкъхэр нэхъри зэрызэкъуигъэувэм шэч хэлъкъым.
АБИДОКЪУЭ Люсанэ
Больше на Черкес хэку
Подпишитесь, чтобы получать последние записи по электронной почте.
