«Си егъэджакIуэм деж» — къытхуатх

Дэтхэнэ зыми къыдгурыIуэу къыщIэкIынщ егъэджакIуэ IэщIагъэм и мыхьэнэр зэрыиныр. ЕгъэджакIуэр сабийм щIэныгъэ ирит къудейкъым, атIэ абы къалэнышхуэ и пщэрылъщ: ар щIэгъэкъуэн хохъу щIэблэр балигъ гъащIэм хэшэным, еджакIуэм акъыл игъуэтыным, цIыхубэ лъапIэныгъэхэр зыхилъхьэным. Апхуэдэ егъэджакIуэ сиIащ сэри.  Ар, урысыбзэкIэ сезыгъэджа, сщызу а бзэм хузиIэ фIылъагъуныгъэр си гум къыщызыгъэуша си егъэджакIуэ Къанлокъуэ Фаризэ Бетлустэн и пхъуращ. Нобэр къыздэсым фIыщIэшхуэ хузощI, си гум хуабэу, IэфIу хуилъщ, а бзэм шэрыуэу срипсэлъэным си акъылым зэрызиужьар Фаризэ бгъэдэлъу къызолъытэри.

Си егъэджакIуэм тIэкIу сыкIэрысыну, фIыщIэ зэрыхуэсщIыр есхьэлIэну, пенсэм зэрыщысым къыхэкIыу, тIэкIу тезгъэуну, сыдэпсэлъэну, си гукъэкIыжхэмкIэ сыдэгуэшэну, Тхьэм ирещIи, иужьрей илъэс зы- тIум си гум къэкI зэпытт. АрщхьэкIэ, дызэресэжауэ, сыт щыгъуэм дежи зэман дгъуэтыжын, дыхущIыхьэн, дигу къихьа мурадыр дгъэзэщIэфын къытфIощI. АрщхьэкIэ сыхущIыхьакъым си егъэджакIуэм зыIузгъэщIэн: хъыбар нэщхъеягъуэ къэIуащ Фаризэ дунейм зэрехыжамкIэ.

Хэти зэрытщIэщи, зэманыр шэ икIауэ блолъэт. Зехъуэж гъащIэм, цIыхум я зэхущытыкIэм, IэфIыныгъэ яку дэлъым, и дуней еплъыкIэм. Езы цIыхуми зехъуэж, мыхьэнэ зиIэу къилъытэу щыта Iуэхугъуэ куэдыр езыр-езыру IэщIыб фIохъу. Арами, дэ тщыщ дэтхэнэ зыми ди IэмыщIэ илъщ зэманым зыдедгъэкIуну, ди блэкIам дерс къыхэтхыну, ди къэкIуэным гупсысэфIкIэ дыпежьэну. Сыт хуэдиз зэман блэмыкIами, сыт хуэдэу цIыхум зимыхъуэжами, адрей псом яхэплъагъукIыу, нэхъ пщIэ хуэпщIу щыта егъэджакIуэм тхьэгъэпсэу псалъэ жепIэфыныр зимыуасэ щыIэкъым.

Къанлокъуэ Фаризэ пасэу и щхьэгъусэр дунейм ехыжащ. Сабий цIыкIуищ кьызыхуэна цIыхубзыр гужьеигъуэ куэдым ихуащ.  АрщхьэкIэ и гуащэ-пщыжьыр гурыфIыгъуэу иIащ. Абыхэм зэрахузэфIэкIкIэ зыкъыщIагъэкъуащ я нысэм, сабийхэр дапIащ, гъуэгу зэдытрагъэхьащ. А дэIэпыкъуныгъэм езы Фаризи игъэгушхуэри, лэжьапIэ куэдым Iутурэ и бынри къыдэкIуэтеящ. Здэлэжьа еджапIэхэм Фаризэ и цIэр фIыкIэ щигъэIуащ, и IэщIагъэм псэемыблэжу зэрыпылъам псори и щыхьэтщ.

Си щхьэкIэ сыкъапщтэмэ, Фаризэ щIэныгъэфI къызбгъэдилъхьащ, урысыбзэр фIыуэ сигъэлъэгъуащ, тхылъ еджэным пыщIа сищIащ. ЕгъэджакIуэм гулъытэ хуищIт щыуагъэ хэмылъу дытхэным, бзэр шэщIауэ тцIыхуным, литературэм епха дэтхэнэ Iуэхугъуэри дигу къыхудэжу дытепсэлъыхьыным, усэ зэдгъэщIэным. А псоми нобэ къыздэсым гукъыдэжышхуэ хузиIэщ. Япэм дэтхэнэ зыри кIэлъыплът щыуагъэ хэмылъу тхэным, купщIэ хэлъу и гупсысэр къиIуэтэным. Иджы зэманым цIыхур апхуэдиз пылъыжкъым, интернетым сыт хуэдэ уи упщIэм и жэуап щыбгъуэтынущи. Абы къыпэкIуэу щыуагъэншэу тхэну, и гупсысэхэм купщIэ хэлъу къиIуэтэну цIыхур пылъыжкъым. Фаризэ и лэжьыгъэм зэрыбгъэдыхьэу щытар, абы дигъэцIыхуар нобэ къыздэсым зыхэзубыдауэ схэлъщ. ТелефонкIэ къысхуэтхэхэм я дэтхэнэ тхыгъэми срогуфIэ купщIэ хэлъу, щыуагъэншэу тхауэ къыщIэкIмэ.

Нобэ сызыхуэзэн сыхущIэмыхьэжа си егъэджакIуэ гъуэзэджэм жесIэну сызыхуея псалъэхэр газет напэкIуэцIым изотхэ. Къысхуэгъэгъу, си егъэджакIуэ, сигу пхуилъ IэфIыгъэмрэ пщIэшхуэ зэрыпхуэсщIымрэ и чэзум зэрыбжезмыIам, мы пхужысIэ псалъэ IэфIхэр упсэуху зэрыбжезмыIэфам папщIэ.

Фаризэ, жэнэтым я нэхъыфIыр Алыхьым кърит, адрей дунейм и псэр щигъэтынш!

Дэри, нобэ мы дунейм тетхэм, зыщыдывмыгъэгъупщэ ди пщэдейр къызэрысынур. Дигу идывмыгъэгъэкI хуабэу, IэфIу дызэхущытын зэрыхуейр, ди щIэблэм я къэкIуэным тхузэфIэкI къару хэтльхьэным дызэрыхущIэкъупхъэр…

ДЭБАГЪУЭ Зулетэ