Еджэгъуэ пIалъэхэр зэфIэкIри, зрагъэгъуэта щIэныгъэр къэзыпщытэжыну экзамен хьэлъэхэри къызэранэкIащ мы гъэм курыт еджапIэхэр къэзыуха ди щIэблэм. Дауи, гу лъыфтащ: загъуэ – загъуэурэ газетымкIэ фыщыдогъэгъуазэ еджапIэр нагъыщэфI защIэкIэ къэзыухахэм, ябгъэдэлъ щIэныгъэ куур экзаменхэм къыщахьа гъэлъэгъуэныгъэ инхэмкIэ зыгъэщыпкъэжахэм. ИкIи, зэрылъэпкъыу, хэгъуэгум щыпсэухэри, къэралри ирогушхуэ щIэныгъэ куу зыбгъэдэлъ щIалэгъуалэ къызэрытщIэтаджэм. АтIэ, щIэныгъэр – псом я беягъ нэхъыщхьэщ…
Нобэ зи гугъу тщIынур ди лъэпкъэгъу пщащэ Iущыцэхэращ – дыщэ медалкIэ Эрсакон курыт еджапIэр къэзыуха ТОХЪУТЭМЫЩ Даянэрэ профильнэ математикэмкIэ балли 100 къизыха ШЫБЗЫХЪУЭ Камиллэрэ. Къуажэ курыт еджапIэр дыщэ медалкIэ Даянэ къызэриухар – ар и еджэгъуэ пIалъэ псом хуигъэтIылъа гуащIэм, хэлъа ерыщагъымрэ зэчиймрэ я гъэлъэгъуэныгъэщ. Зригъэгъуэт щIэныгъэ куум текIуэныгъэхэм, ехъулIэныгъэхэм зэрыхуишэнур сыт щыгъуи къыгурыIуэу еджащ Даянэ. ИкIи, нэрылъагъущ апхуэдэ егугъуныгъэм къыпэкIуа лъагапIэр.
«Уи дыщэ медалыр — уи унагъуэр, уздеджа еджапIэр, къуажэ псор зэрыгушхуэщ, зэрыинщ, дэтхэнэми ди напщIэтелъщ! Дыхуейщ а лъагапIэ иныр щIэдзапIэ хуэхъуну дяпэкIэ уи гъащIэ гъуэгуанэм зыщыIэрыбгъэ хьэну ехъулIэныгъэ куэдым. Уэ къыппоплъэ гугъапIэ куэд зэппх, фIыщэу плъагъу уи ищхьэ еджапIэр, узыдихьэха IэщIагъэр, къэхъугъэ телъыджащэхэр. Уи къарумкIэ фIэщхъуныгъэ сыт щыгъуи уиIэу, сытри къыбдэхъуну дыпхуохъуахъуэ!» — зыкъыхуагъазэ Даянэ езыгъэджахэм, къуажэдэсхэм.
*** ЧЕРКЕССК къалэм дэт, зи №7 курыт еджапIэм и еджакIуэ ШЫБЗЫХЪУЭ Камиллэ нагъыщэ нэхъ лъагэ дыдэр – балли 100 кърихащ профильнэ математикэмкIэ ЕГЭ-м. Хэти къыгуроIуэ ар зэрыгъэлъэгъуэныгъэ иныр, ныбжьыщIэм бгъэдэлъ щIэныгъэм и кууагъыр. ЖыпIэнурамэ, егъэджэныгъэ и лъэныкъуэкIэ мыр Камиллэ и япэ ехъулIэныгъэкъым. АтIэ, пщащэм текIуэныгъэр къыщихьащ урысыбзэкIи, инджылызыбзэкIи Урысейпсо олимпиадэхэм я муниципальнэ Iыхьэхэм. Дехьэх Камиллэ художественнэ литературэр джыным, псым есыным, теннис джэгуным. ЕхъулIэныгъэфI хэлъу зэреджэм къыдэкIуэу, ар спорт ми хуабжьу пыщIащ: УФ-м шы спортымкIэ и Федерацэм и спортсменщ, шы спортымкIэ зэхьэзэхуэхэм мызэ-мытIэу текIуэныгъэр къыщихьащ, призёр щыхъуащ.
ЕджапIэр фIыщэу къэзыуха пщащэ гурыхуэм и мурадщ «Управление бизнесом» лъэныкъуэмкIэ ищхьэ щIэныгъэ зригъэгъуэтыну. Дахуохъуахъуэ Камилли, Даяни я ехъулIэныгъэ лъагэхэмкIэ! ДяпэкIи нэхъри ефIэкIуэну, зыхуагъэувыж къалэнхэм, текIуэныгъэщIэхэм хуэкIуэну Тхьэм жиIэ!
ЩОХЪУЖЬ Люсанэ
Больше на Черкес хэку
Подпишитесь, чтобы получать последние записи по электронной почте.
