Щэнхабзэ лъапIэныгъэхэр

Мэлыжьыхьым (апрелым) и 14-16 махуэхэм Ханты-Мансийск къалэм щызэхэтащ лъэпкъ зэкъуэтыныгъэм и VII Урысейпсо форум. Ар щытащ Урысей Федерацэм и хэгъуэгу 31-м щыщу форумым хэта нэрыбгэ 500-мрэ хьэщIэ лъапIэхэмрэ зы мурадкIэ зэзыпх, щхьэж зыпэрыт IэщIагъэм елъытауэ нэгъуэщIым и Iуэху еплъыкIэкIэ здехъуажэ утыку ину Къэрэшей-Черкесым къыбгъэдэкIыу форумым хэтащ «Къарачай» газетым и редактор нэхъыщхьэ, УФ-м щыпсэу лъэпкъхэм я Ассамблеем и хэгъуэгу къудамэм и пашэ Коркмазовэ Салимэ.

Ди лIыкIуэм и къэпсэлъэныгъэр триухуащ лъэпкъ куэд зыщыпсэу и хэгъуэгум мамырыгъэрэ зэгурыIуэныгъэрэ щытепщэу щытынымкIэ, щIалэгъуалэмрэ зэкъуэтыныгъэмрэ епхауэ лэжьыгъэ егъэкIуэкIынымкIэ упщIэ нэхъыщхьэу мы зэманым къэувхэм. Ханты-Мансийск телевиденэм къыщыпсалъэм, абы къыхигъэщащ Къэрэ шей-Черкесым лъэпкъыу щыпсэур лIыщIыгъуэ бжанэ хъуауэ зэгурыIуэрэ зэдэIуэжу, пщIэ зэхуащIу, нэхъыжьхэм къыхуагъэна хабзэхэр яхъумэу, къуэш лъэпкъхэм яйхэри ялъытэу зэрызэдэгъуэгурыкIуэр.

Журналистхэм яжриIащ ди щIыналъэм икIыу СВО-м кIуэ щIалэ хахуэхэр лъэпкъ зэхуэмыдэхэм зэращыщыр, КъЧР-м и унафэщIхэм ялъэкI къамыгъанэу абыхэм зэралъыгъуазэр, зыхуэныкъуэмкIэ зэрадэIэпыкъур. Форумым къыщаIэта упщIэ нэхъыщхьэхэр яхуэгъэзат къэралым и цIыхуу зэрыщытыр хэти и щхьэкIэ зыхищIэным, лъэпкъ зэхущытыкIэхэр гъэбыдэным, хамэщI къикIахэм социальнэуи, щэнхабзэ и лъэныкъуэкIи тыншыпIэ ягъэгъуэтыным, УФ-м и щIыдэлъху лъэпкъ цIыкIухэм я щэнхабзэхэр, лъапIэныгъэхэр хъумэным. Мы форумыр Урысейм щыпсэу лъэпкъхэм я зэкъуэтыныгъэм и Илъэсым ипкъ иту ирагъэкIуэкIыну яубзыхуа дауэдапщэхэм я федеральнэ планым хэтащ икIи хъарзынэу дэкIуатэу ягъэпсащ 2036 гъэ нэгъунэ лэжьэну къэрал лъэпкъ политикэм и Стратегием. Гулъытэ нэхъ зыхуозыгъэщI къэхъугъэхэм ящыщт:

1. «Хэгъуэгу къарукIэ къэрал лъэпкъ политикэр убзыхун икIи гъэзэщIэн: Iуэхум къыпэкIуэмрэ лъэбакъуэщIэм къигъэув къалэнхэмрэ» темэмкIэ екIуэкIа Урысейпсо зэIущIэр. Юграм и зэхэщIыкIыр утыку кърихьащ къэралкIуэцI политикэмкIэ хэгъуэгу Департаментым и унафэщI Харитонов Кирилл; 2. «ЩIыдэлъху лъэпкъ цIыкIухэр иджырей дунейм» щхьэщIэдзапIэм щIэту Урысейпсо щIэнIуатэ зэхуэсу форумым иригъэкIуэкIамкIэ къызэщIаубыдащ хэгъуэгу 12-м я IэщIагъэлI зэхуэмыдэхэр, абыхэм лъэпкъыбзэхэр, хабзэхэмрэ щэнхабзэ щIэинымрэ хъумэным ятеухуауэ доклад 47-рэ къащIащ; 3. «НКО-м и лабораторэ: унагъуэр — зэкъуэтыныгъэм и лъабжьэщ» лэжьыгъэм хашащ Юграмрэ нэгъуэщI хэгъуэгухэмрэ я мысату зэгухьэныгъэхэм хэтхэр. Ахэр унагъуэм хуэгъэза хьэрычэтхэр щагъэзащIэм зрагъэгъуэта зэхэщIыкIымкIэ зэхъуэжащ икIи щэнхабзэзэпх, лъэпкъзэпх проектхэм унагъуэр хэлэжьыхьу гъэпсынымкIэ чэнджэщ зыбжани къахьащ. Форумыр къызэзыгъэпэщахэм ящыщщ Ханты Мансийск автоном хэгъуэгум и Правительствэр. Абы и дэIэпыкъуэгъу хъуащ лъэпкъ IуэхухэмкIэ Федеральнэ агентствэр, УФ-м щыпсэу лъэпкъхэм я Ассамблеер, лъэпкъ зэхущытыкIэхэмкIэ УФ-м и Президентым деж щыIэ Советыр, лъэпкъ IуэхухэмкIэ Къэрал Думэм и Комитетымрэ УФ-м и Жылагъуэ палатэмрэ.

Зыгъэхьэзырар АБЫКЪУ Къамырзэщ