Сабийхэр зи дуней, зи гъащIэ

ФокIадэм и 27-р — гъэсакIуэм и IэщIагъэ Махуэщ. Абы куэд къызэщIеубыдэ, ауэ а IэщIагъэм и гугъу тщIыну дыщыхуежьэкIэ, псом япэу дызэгупсысыр сабий IыгъыпIэхэм щылажьэ гъэсакIуэхэращ. ЖыIэпхъэщи, сабийхэм ядэлэжьэныр зэгуэр IэщIагъэу къыхэзыхам ар и гъащIэ, и псэукIэ, и дуней мэхъу. Мис апхуэдэращ, езыри, гъэсакIуэ нэхъусар, анэм и сабийр IэщIилъхьэу, махуэ кIыхьагъым и гур къыхэмыскIыкIыжу дзыхь зыхуищIыфыр.

Зи гугъу тщIыхэм ящыщ зы лэжьакIуэщ Хьэбэз къуажэм дэт «Нур» сабий IыгъыпIэм и гъэсакIуэ ГЪУЭЗДЖЭШ Анжелэ. Ар щIыхь утыкухэм мызэ-мытIэу ирашащ, щхьэусыгъуэ зэхуэмыдэхэмкIэ къыхагъэщу. Апхуэдэу, нэгъабэ республикэм щекIуэкIа «Семья года» зэхьэзэхуэм хэта унагъуэ 35-м щыщу къыхагъэщахэм яхэтащ Гъуэзджэш зэщхьэгъусэхэр — Азэмэтрэ Анжелэрэ. Ахэр щытекIуащ «Къуажэдэс унагъуэ» номинацэм. Апхуэдэ щIыхьыр къыхуагъэфэщащ къуажэм угъурлыуэ, сэбэп къыщахьу, я дуней тетыкIэкIи, я зэхущытыкIэкIи, бын гъэсэкIэкIи, нэхъыжь-нэхъыщIэ пщIэ зэхуэщIынкIи, сыт и лъэныкъуэкIи щапхъэу къалъытэри.

Мы гъэм, унагъуэм и Махуэм, Гъуэзджэш зэщхьэгъусэхэм я щIыхь яIэтащ, район ЗАГС Управленэм къыбгъэдэкIыу, псалъэ гуапэхэр зэрыт ФIыщIэ тхылъ къыхуагъэфэщащ. КъинэмыщIу, Анжелэ «Быныбэ анэ» щIыхьыцIэр зэрехьэ. Азэмэтрэ Анжелэрэ бынитху, къуищрэ пхъуитIрэ зэдапI, зыр студентщ, тIур еджакIуэщ, тIур сабий садым макIуэ. Мис а псоми хущIыхьэу, щехъулIэу, и лэжьыгъэри щызэнигъэсыжыр сыт щыгъуэ, къыхуэнэрэ сабийхэм зэрахуэупсэн, зэрахуэщэбэн къарурэ жьагъдырэ? Ди чэнджэщыр зэIубз ищIащ «Нур» IыгъыпIэм и унафэщIым. ЖиIащ Анжелэ и лэжьэкIэми, и цIыху хэтыкIэми, и IукIэ-щIыкIэми арэзы зэрытехъуэр икIи дригъэблэгъащ ди нэкIэ зэдгъэлъагъумэ нэхъыфIу къилъытэу.

ДызэкIуэлIа «Дыгъэ» гупыр зыщIэс пэшым бжэр ешэлIащ, зы даущи къыщIэIукIкъым. Зэ щхьэкIэ къытщыхъуащ сабийхэр пщIантIэм къыщIашауэ. Хуэмурэ бжэр Iудохри дыщIоплъэ. Псори щIэсщ. Хъурейуэ къетIысэкIауэ, хэти я гъэсакIуэм быдэу зрикъузылIауэ, зы даущи къащхьэщымыIукIыу зэхэсщ. Анжелэ къызэджэ таурыхъым и хьэуам апхуэдизымкIэ цIыкIухэр хишащи, жьы ямышэм хуэдэу щIодэIу, зэми таурыхъым къыщекIуэкI хъыбарым зыдащIу, Iэпэтэрмэш гуэрхэр къащI… «Тобэ, сабийм зыхуей псори щигъуэт мы ди зэманым, зыгуэр зребгъэгъэщIэгъуэкIыныр гугъу щыхъуам, мыпхуэдэу я гулъытэр къепшэлIэфыныр къызэрымыкIуэщ», — догупсыс. Ауэрэ, дэри таурыхъым, е, нэхъ тэрэз хъунщ «Анжелэ и таурыхъ къеджэкIэм», дыдихьэхащи, зэпыдудын дигу имыдэу, тфIэфI дыдэу додэIу, зы дакъикъэкIэ, уеблэмэ, сабиигъуэ дунейм дыкъыщагъэхутэж…

Апхуэдэщ Анжелэ и лэжьэгъуэ махуэ къэс зэрызэхэухуэнар: таурыхъ, дерс, Iэпэ цIыкIухэр гъэлэжьэн, IэпкълъэпкъкIэ зыпсыхьын, гъуэгу зекIуэкIэ хабзэхэм, щIыуэпсым щыгъуэзэн, джэгугъуэхэр, лъэпкъ хабзэхэр зэгъэщIэн, усэ къеджэн, сабийхэм хэкупсагъэ, лъэпкъыпсагъэ гъэсэныгъэ яхэлъхьэн… Мы гъэсакIуэр 2009 гъэм щегъэжьауэ и IэщIагъэм иролажьэ, «Нур»-м 2012 гъэ лъандэрэ и гуащIэ щегъэтIылъ.

Илъэси 3 нэхъ мы хъуауэ къищтэ цIыкIухэр илъэси 6, нэхъыбэ хъуауэ, еджапIэм япэ классым кIуэным хуэхьэзыру щыщIигъэкIкIэ, и гуфIэ нэпсхэр къыфIокIуэ. Абыхэм я щхьэусыгъуэщ и быным хуэдэу фIыуэ илъэгъуа сабийхэр и нэIэм зэрыщIэкIри, зэрызаужьам къыхалъхьэ гушхуэныгъэ инри.

— Сыт и лъэныкъуэкIи япэ классым хуэхьэзыру ди цIыкIухэр доутIыпщ икIи ахэр къыщыкIуам идолъытыжри, уримыгушхуэ хъурэ?! ЖыIэпхъэщи, иджырей сабийхэр хуабжьу гурыхуэщ. Iэнкун узыщIыфын, и жэуап улъызыгъэхъуэн упщIэхэр къыуат, ялъагъум, зэхахым къэпщытэжыныгъэ хуащIыф, я гупсысэкIэ яIэжу ахэр зэрагъэзэхуэф. Абы къыдэкIуэу дэри, гъэсакIуэхэми, махуэ къэс зыдужьыным, ди щIэныгъэм хэдгъэхъуэным драгъэувалIэ, — къыддогуашэ Анжелэ. Апхуэдэ зыужьыныгъэмкIи армукъым ди псэлъэгъур. АтIэ, Гъуэзджэш Анжелэ зыгъэ «Воспитатель года» щIыхьыцIэр къыхуагъэфэщауэ щытащи, абы хуэфэщэныр, дзыхьыр гъэпэжыжыныр и гъуазэу мэлажьэ. Сабий IыгъыпIэм къехьэлIа мардэхэм, хабзэхэм ену зыщегъэгъуазэ, тхылъ куэд щIеджыкI, нэхъыфIыр щапхъэ зыхуещI.

Махуэм сабийхэм яхэта бзылъхугъэр и унагъуэм екIуэлIэж ми апхуэдэщ зыхыхьэжыр. Арами, и быным зы нэрыбгэми лъэныкъуэгъазэ зищIкъым, сыткIи анэм зыщIагъакъуэ, дэтхэнэми и Iуэху кIапэ дех. Махуэр иухыу, бынунэр и пIэ щизэгъэжкIэ, АнжелэкIэ а дакъикъэхэр нэхъ насыпыфIэ дыдэщ, апщыгъуэращ нэхъри гукIи, псэкIи къыщыпкърыхьэр сабийм къыдэкIуэ насыпымрэ берычэтымрэ. Махуэм къриубыдэу хэт сыт ищIами, фIэгъэщIэгъуэнами, игу къеуами — псори зэхуаIуэтэжу, тхъэжу быныр зэхэсщ. — Лэжьыгъэр къызэхъулIэмэ, ар си закъуэкъым зи фIыщIэр. Мис мы цIыкIу заулым махуэ еным Iэнэ къахутригъэувэу, игъашхэу, илъэщIу, игъафIэу, я пIэ цIыкIухэр яхуидзыжу, яхузэщIикъуэжу, Iуэху куэд дыдэ дех си дэIэпыкъуэгъу, МыкIытIэ Маринэ.

Сыт хуэдэ лэжьыгъэ къетхьэжьэми, анэ-адэхэм жыджэру зыкъытщIагъакъуэ. Езы нанухэр Iущыцэ защIэщи, нэхъыбэж язгъэцIыхуным нэхъри сытрагъэгушхуэ. Бын куэдым сыщIэхъуэпст, зыкъэзумысыжынщи, ауэ сысей дыдэу тху сиIэну, илъэс куэдкIэ мыпхуэдиз сабий бжыгъэм сахэтыну сегупсыстэкъым, — гушыIэу зыкъеумысыж Анжелэ. — Арами, си унагъуэкIи, си лэжьапIэкIи сабийхэр си дуней хъуащи, сынасыпыфIэу, гъащIэм сызыхуейм сытеIэбауэ къызолъытэ. Си лэжьэгъухэм, гъэсакIуэр зи IэщIагъэ Махуэ дэтхэнэми сохъуэхъу бэшэчагъ инкIэ, узыншагъэ быдэкIэ, къарури жьагъдыри къызыдэкIуэ цIыкIухэм илъэс куэдкIэ яхэтын насыпым щымыщIэну!

ТУАРШЫ Ирэ