Правокубанскэ жылагъуэм дэт еджапIэм щекӀуэкӀ зэгъэзэхуэжыныгъэ лэжьыгъэр и кӀэм нагъэс. Метр зэбгъузэнатӀэ мини 5,6-рэ къызэщӀэзыубыдэ ӀуэхущӀапӀэр 1985 гъэм яухуауэ щытат икӀи щӀэрыщӀэу зэрагъэпэщыжын хуейт. Зэгъэзэхуэжыныгъэхэр ирагъэкӀуэкӀащ Урысейм и Президентым и пщэрылъкӀэ зэхагъэува «ЩӀалэгъуалэмрэ сабийхэмрэ» лъэпкъ проектым хыхьэ «Сабийхэм я деж нэхъыфӀ псори» федеральнэ проектым ипкъ иткӀэ.
НобэкӀэ инженер коммуникацэхэр щӀэгъэувэнымкӀэ, пэшхэмрэ пщӀантӀэхэмрэ зэгъэзэхуэнымкӀэ лэжьыгъэ нэхъыщхьэхэр псори яухащ. Гулъытэ хэха хуащӀащ пэшхэр зыхуэныкъуэхэмкӀэ къызэгъэпэщыным. Апхуэдэу унэлъащӀэ хьэпшыпхэмрэ технологие оборудованэщӀэхэмрэ къащэхуащ, еджапӀэщӀэм щеджэну къэзыгъэзэжыну ныбжьыщӀэ цӀыкӀу миным нэхърэ нэхъыбэм щӀэныгъэфӀ зэрагъуэтынымкӀэ псори хьэзыр яхуэхъун папщӀэ.
«Мы гъэ еджэгъуэм зэрагъэзэхуэжауэ республикэм еджапӀиплӀ къыщызэӀутхащ — Курджиновэ, Эркен-Хьэлъкъ, Псэмэн къуажэхэм, Черкесск дэт е 17-нэ гимназием и етӀуанэ корпусыр. Апхуэдэуи, Хьэбэз дэт, Хъупсырокъуэ Е. и цӀэр зезыхьэ лицей-интернатым къатищу зэтет и корпусым и ухуэныгъэр яухащ, иджыри республикэм и еджапӀэ 15-мрэ сабий ӀыгъыпӀи 2-мрэ зэгъэзэхуэжыныгъэ лэжьыгъэхэр щокӀуэкӀ. Дэ ди къалэнщ дэтхэнэ еджапӀэри, сыт хуэдэ щӀыпӀэ щымытми, иджырей мардэхэм тету, сабийхэмкӀи егъэджакӀуэхэмкӀи шынагъуэншэу, тыншу къахузэгъэпэщыныр», — МАХ-м щиӀэ и напэкӀуэцӀым щитхащ республикэм и лӀыщхьэм.
ЕЗАУЭ Маринэ
Больше на Черкес хэку
Подпишитесь, чтобы получать последние записи по электронной почте.
