Сабий зыгъэпсэхупIэщIэ

Къэрэшей-Черкесым и Iэтащхьэ Темрезов Рэшид видеоконференц щIыкIэм тету УФ-м ФедерацэмкIэ и Советым и спикер Матвиенко Валентинэ щигъэгъуэзащ къалэщIыб сабий лагерхэр ухуэнымкIэ программэр зэрагъэзэщIам.

Апхуэдэу, игъэлъэгъуащ Зеленчук районым хыхьэ Даусыз къуажэм дэт «Сосенка» лагерыр, сабии 100 зыщIэхуэну IуэхущIапIитI къызыпащIыхьыжар. Къыхэдгъэщынщи, программэр ягъэзащIэ Урысейм и Президент Путин Владимир и жэрдэмкIэ, Матвиенко Валентинэ и нэIэм щIэту. Темрезов Рэшид Урысейм ФедерацэмкIэ и Советым и спикерымрэ просвещенэмкIэ и министр Кравцов Сергейрэ фIыщIэ яхуищIащ Къэрэшей-Черкесыр программэм зэрыхагъэлэжьыхьым папщIэ икIи жиIащ республикэм и къалэщIыб сабий лагерхэр егъэфIэкIуэным адэкIи зэрыпащэнур. Видеоконференцым хэтащ КъЧР-м и Парламентым и спикер Иванов Александр, республикэм и Правительствэм и тхьэмадэм и къуэдзэ Поляков Евгений, егъэджэныгъэмрэ щIэныгъэмрэкIэ и министр Кравченко Иннэ сымэ. КъинэмыщIауэ, Матвиенко Валентинэ драгъэкIуэкIа видеозэпсэлъэныгъэм хэтащ 34-нэ мотострелковэ бригадэ щхьэхуэм хэт къулыкъущIэхэм я сабийхэр. Ахэр псори зауэ-хэкупсэ зэхыхьэхэм, нэгъуэщI Iуэхугъуэхэм жыджэру хэлэжьыхьащ, зэпеуэ зэхуэмыдэхэм щытекIуа защIэщ. Темрезов Рэшид зэрыжиIамкIэ, ахэр «Хэку, хэкупсагъэ, Хэкур хъумэн псалъэхэр зэрысабийрэ зыхэзыщIэщ, зи адэхэр абыкIэ гъащIэм щапхъэ щыхъуа хэщ». Къэрэшей-Черкесым и Iэтащхьэм ди Лъэпкъ пашэ Путин Владимир фIыщIэ хуищIащ мы гъэр Хэкум и хъумакIуэм и Илъэсу зэригъэувам папщIэ. «Хэкупсагъэ унэтIыныгъэр мы лагерым зэрыщынэхъыщхьэнур си фIэщ мэхъу», — къыхигъэщащ Темрезов Рэшид. Фигу къэдгъэкIыжынщи, «Сосенка» сабий лагерыр зэрагъэзэхуэжащ УФ-м и Президентым и унафэкIэ зэхагъэува, сабий зыгъэпсэхупIэ лагерхэр егъэфIэкIуэнымкIэ программэм ипкъ иту, апхуэдэ лэжьыгъэхэр здыщрагъэкIуэкIыну лагерхэр къыхэхынымкIэ ирагъэкIуэкIа зэпеуэм зэрыщытекIуам къыхэкIыу. Проектыр ягъэзэщIащ республикэ бюджетым къыхэкIа мылъкукIэ