ПсыхэкIхэм щагъащIэкъым

Мазаем и 4-м Черкесск икIыу, «Зыуэ щыт Урысей» партым къыбгъэдэкIыу, къыкIэлъыкIуэ гуманитар дэIэпыкъуныгъэр зышэну машинэхэр яузэдри гъуэгу трагъэхьащ.
Япэ хьэлъэзешэ машинэм ирагъэзэгъащ псы литри 5, литрэрэ ныкъуэрэ зэрыхуэ бащырбэхэр зэрыт ашычышхуэхэр. А псыхэр хуашэнущ Запорожскэ областым. ЕтIуанэ хьэлъэзешэ машинэшхуэри, апхуэдэ къабзэу, яузэдащ псыкIэ. Ахэр Iэрыхьэнущ госпиталым. — МашинитIми тонни 10 зырыз псыуэ идгъэзэгъащ. Зыр Запорожьем щыпсэухэм, етIуанэр Ростов щыIэ госпиталым хуашэнущ. Гуманитар дэIэпыкъуныгъэ лэжьыгъэр зэпымыууэ йокIуэкI, КъЧР-м и Iэтащхьэ Темрезов Рэшид и унафэр и лъабжьэу.

Иджырей гуманитар дэIэпыкъуныгъэр зи фIыщIэр УФ-м и Федеральнэ ЗэIущIэм ФедерацэмкIэ и Советым КъЧР-м къыбгъэдэкIыу хэт сенатор Къэзэнокъуэ Кърымщ. ДэIэпыкъуэгъу хъуащ УФ-м зыхъумэжыныгъэмрэ шынагъуэншагъэмрэкIэ и Комитетым и Советым и тхьэмадэм и къуэдзэ Бондарев Виктор. Къапщтэмэ, КъэрэшейЧеркесым и оперативнэ штабым лэжьыгъэ шэщIа ирегъэкIуэкI. ЦIыху гумызагъэхэм, властым, Правительствэм, партым, штабым… — псоми я къару зэхэлъ, я гъерэт, я жэрдэм халъхьэ СВО-м щыIэхэм, абыхэм я унагъуэхэм защIэгъэкъуэным. Псоми фIыщIэ яхузощI абы папщIэ.
Лэжьыгъэр зэпыунукъым, адэкIи пыдощэ. Шэч къытесхьэкъым, апхуэдэ жылагъуэ пабгъэныгъэм, зэдэщтэныгъэм къыпэкIуэнущ ди ТекIуэныгъэр! — жиIащ КъЧР-м «Зыуэ щыт Урысей» партым и зыгъэзащIэ комитетым и уна фэщI Джамбаев Руслан. ЖыIэпхъэщи, гуманитар дэIэпыкъуныгъэхэр зэхуэмыдэщ: щыгъын, ерыскъыхэкI, псы, медицинэ хьэпшыпхэр, хущхъуэхэр, зауэ техникэ, къинэмыщI. Тэн-Iут-Ростов щыIэ госпиталым и мызакъуэу, Став рополь щыIэми, Украинэм щыIэхэми, ди зауэлIхэм къыздеIэзэхэм, ирагъашэ. Джамбаев Руслан зэрыжиIащи, гуманитар дэIэпыкъуныгъэр зэхуахьэс къызыщIэлъэIуар зыхуэдэм, зыхуэдизым елъытауэ. Апхуэдэу зэгъэзэхуа Iуэху зехьэкIэм сэбэп къехь ди зауэлIхэри, мамыр цIыхухэри, сымаджэщхэри зыхуэныкъуэмкIэ тыншу къызэгъэпэщынымкIэ. Гуманитар хьэлъэзешэ машинэхэм ящIыгъуну МЧС къулыкъум хэтым зэрыжиIащи, 20 нэхърэ нэхъыбэ дэIэпыкъуныгъэхэр хуашащ СВО-р щекIуэкI щIыпIэхэм. Мазаем и 4-м ирагъэжьа псым а щIыпIэм щыIэ цIыхухэр хуэныкъуапэщ, сыту жыпIэмэ зэфэ, къагъэсэбэп хъун псы къабзэкIэ хуабжьу Iэслъэсщ иджыкIэ. Машинэхэр япэ щIыкIэ Ростов екIуэлIэнущ, адэкIэ — Запорожскэ областым. СВО-р зэрыщIидзэрэ, «Зыуэ щыт Урысей» партым и хэгъуэгу къудамэм и нэIэм щIэту гуманитар хьэлъэу ирагъэшащ тонн 1200-м щIигъу.