ПсэукIэ-Дахэ щызэхэта шуджэгур

Шууей IэкIуэлъакIуэхэри, балигъыпIэм имыт щIалэ жан, гурыхуэ цIыкIухэри къыхашэри бадзэуэгъуэм и 2-м ПсэукIэ-Дахэ къуажэм шуджэгу щрагъэкIуэкIащ. Ар сыт щыгъуи зэрызэхашэм хуэдэу гъэпсауэ щымыту, спорт дауэдапщэм шыгъажи хагъыхьащ. Лъэпкъ Iуэхур къехьэжьэным хэлэжьыхьащ КъЧР-м и Адыгэ Хасэмрэ и Шууей Хасэмрэ. Гуапэщ лъэпкъ Iуэхум илъэс 12-13 хъу, Хьэбэзрэ ПсэукIэ-Дахэрэ щыщ щIалэщIэхэр гупитIу ягуэшу зэрызэпрагъэуар шым тесынымкIи, шэсынымкIи…

Сыт а зэхьэзэхуэхэм я мардэу щытар жыпIэмэ, шэчыншэу, ар, япэрауэ, нэгъабэрей шуджэгухэм хэта чыипхъуэтми, фэзехьэми, ныпзехьэми ямыIа лъэпощхьэпо зэхуэмыдэхэм шууейхэр зэрыIуагъэщIаращ. Псалъэм къыдэкIуэу, шыгъажэ къыщыпщIым деж шыр гъэIурыщIэгъуафIэкъым, псэущхьэм и джабитIми уежэкI-укъежэкIыжыну пхущIыхьэфу, уздэжэм чыр къипхыфиплъхьэжыфу щытын зэрыхуейм къыхэкIкIэ. ИтIанэ, мы шуджэгум хэтахэм я пщэ илъар я Iуэху зэрыдагъэкIын закъуэратэкъым, атIэ, шууейхэм къыхуагъэуват зэдэхъуу, зэран зэхуэмыхъуу икIи зэжьэхэмыуэу гъэунэхуныгъэхэм блэкIыныр.

Абы хуабжьу лэжьыгъэшхуэ пылъщ, уеблэмэ ар къыщIэдзэнри ухынри гъуазджэ псо ирокъу. «Курыт еджапIэм щIэсхэр адыгэш щэджащэхэм я тесыкIэкIи я къэжэкIэкIи куэд щIауэ уанэгум исхэм къазэрыкIэрымыхур щыслъагъукIэ, си гур хагъахъуэт. ПсэукIэ-Дахэ щедгъэкIуэкIа шуджэгум иджыри зэ хьэкъ сщищIащ къыдэкIуэтей щIэблэр адыгэшым зэрытесым адыгэ фащэр къызэрыригъэщтэжыр, абы гулъытэ нэхъыбэ хуищIын хуейуэ и псэм къызэрыхуриджэр. Ар щIыжысIэр аращи, фащэ щымыгъыу некIуэлIауэ зы ныб жьыщIи слъэгъуакъым. Уанэ исыну зыхуэфащэр — адыгэ фащэкIэ хуэпаращ. Абы шэч къысхутехьэнукъым», — къыджиIащ КъЧР-м и Шууей Хасэм и тхьэмадэ Астэжь Амир.

Абы къызэрыхигъэщамкIэ, шуджэгум къыхашауэ хъуар зытесар езыхэм япIа, ягъэса адыгэшщ. АтIэ, хэти къыгурыIуэн папщIэ, хамэш утетIысхьэкIэ зы шуджэгуи, зы шыгъажи ухэтыфынукъым. А псэущхьэр дапхуэдизу щыпкъэу Тхьэм къимыгъэщIами, ар мыгъэIурыщIамэ, псэкIэ, бзэкIэ упэжыжьэмэ, укъидэнукъым, «мыр щIэ» жепIэкIи, ауи узэхихынукъым. Нэхъыщхьэращи — елъапIэхэр, чыхэр здыхэса дурэш дэкIыпIэхэр хэмыуакъуэу къыхузэнэкIынукъым. Нэгъабэ бжьыхьэм екIуэкIа шуджэгум адыгэшым и Кубокыр ВакIуэ-Жылэ къуажэм щызэIэпахауэ щытащ. А махуэщI дахэм хэтат Къэрэшей-Черкесми, КъэбэрдейБалъкъэрми, Адыгэ Республикэми, Краснодар крайми я адыгэ шууей нэхъыфIхэр. Ауэ шуджэгуу иджыблагъэ ПсэукIэ-Дахэ щрагъэкIуэкIар хэгъуэгузэпх мыхьэнэ иIэу щымытами, Тхьэм жиIэмэ, бжьыхьэ къакIуэм КъЧР-м и Шууей Хасэм зэхиублэн и мурад шуджэгум ухуэзыгъэхьэзыр екIуэкIыгъуэу плъытэ хъуну жиIащ Астэжь Амир. Мы шуджэгур къызэзыгъэпэщахэм къагуроIуэ адыгэшыр зэхьэ зэхуэхэм хэтыным нокIуэкIэ зыми зэрыхуимыгъэхьэзыфынур, уанэгум исым и зэфIэкIыр игъэлъэгъуэну, увыпIэфI къихьыну зэрыхуейм къинэмыщIауэ, шым пылъыным нэхъри тригъэгушхуэу гулъытэ зэрыхуэщIыпхъэр.

Аращи, еджакIуэ цIыкIуу шуджэгум хэтахэм нэхъ жэру икIи нэхъ IэкIуэлъакIуэу къахэкIахэм ирата ЩIыхь тхылъымрэ Кубокымрэ ахъшэ зэрыхущIагъуамкIэ, дауи, ягъэгуфIащ. Мы зэхьэзэхуэхэм хэтащ адыгэши, абазэхэм, нэгъуейхэм, къэрэшейхэм зэрахуэ шыхэри, лъэхъу, ущ къэжэкIэ зиIэхэр. Ахэр зэпеуащ гъуэгуанэ зэхуэмыдэхэр зэпычынымкIэ, дэтхэнэ къэжэгъуэми зи цIэ иIуа саугъэтхэр илъащ: зырКъардэн лIакъуэм къыбгъэдэкIауэ, етIуанэр — Малэ Зеленчук къуажэм псы щракIэу дэт «Элит-Аква» ООО-м Мамбэт Алий-Мухьэмэд Джэрий и къуэм и фэеплъу гъэувауэ, ещанэр — «Шишкин Лес» компанэм къикIыу ТIымыжь Виталий Едыдж и къуэм хуэгъэфэщауэ, еплIанэр- хыхьэхэкIырылажьэ Чэнджэщауэ Руслан «Терек» ООО-м и унафэщIа Чэнджэщауэ Мухьэжыр Умар и къуэм триIуауэ, етхуанэршы — спорт зэдэжэм хэтахэм папщIэ гъэшхэкI зэмылIэужьыгъуэхэр къыщIэзыгъэкI «Сатурн» фирмэм и генеральнэ унафэщI, КъЧР-м и ЦIыхубэ ЗэIущIэм (Парламен тым) и депутат Хъупсырокъуэ Алий къыбгъэдэкIауэ, еханэр — Социалистическэ ГуащIэдэкIым и ЛIыхъужь Аргун Iэбубэчыр (ПIатIэ) и унагъуэм къикIыу.

«Щхьэхуэу къыхэзгъэщыну сыхуейт Адыгэ-Хьэблэ и Адыгэ Хасэм и тхьэмадэ Хъупсырокъуэ Мурадин къуажэм и нэхъыжь Советым хэт, шыхъуэ Iэзэ МыкIытIэ Мухьэмэд нишэу зэхьэзэхуахэм гулъытэ нэс зэрахуригъэщIар. Ди нэхъыжьыфIым къэжэр шы тепхъуэ, шхуэрэ илъэс 200-м щIигъу ныбжь зиIэ лъэрыгъитIрэ тыгъэу яхуигъэфэщащ шыр нэхъыфIу зезыхьэу, абы и Iэпслъэпсым нэхъ егугъуу, псэущхьэм и теплъэм, и къабзагъэм нэхъ кIэлъыплъу къилъытахэм. Тепхъуэр иритащ спортсмен цIэрыIуэ КIыщ Рэмэзан, лъэрыгъхэр Хъумэрэн ЦIыкIу дэс Дыгъужь Амир, шхуэр АлиБэрдыкъуэ щыщ Бещто Мурат», — къыддогуашэ Шууей Хасэм и тхьэмадэр. Шуджэгум жыджэру зыкъыщызыгъэлъэгъуахэм я гуфIапщIэхэр къызыбгъэдэкIахэм Тхьэм къызыхахам щэнейрэ бэгъуауэ харигъэлъхьэж! ГъащIэ кIыхь ищI лъэпкъ Iуэхум я гупэ хуэгъэзауэ, нэхъыжьхэм зыщIагъэкъуэну хьэзыр, нэхъыщIэхэр зыгъэгушхуэхэр!

ЛЫХЬ Тимур