НэIэм щIэтынущ

Къэрэшей — Черкес Республикэм и Iэтащхьэ Темрезов Рэшид хэгъуэгум щыпсэухэм яхуэзащ УФ-м и Президент Путин Владимир Черкесск къалэм щиIэ зэIущIапIэм.

 ЩIаплъыкIащ Прикубан, Зеленчук районхэм, Карачаевск къалэм къикIахэм къаIэта упщIэхэр. ЗэIущIэм икIэм, Темрезов Рэшид къыкIэлъыкIуэ пщэрылъхэр ищIащ:

— 2025 гъэм накъыгъэм (майм) и 9-м нэгъунэ зэгъэзэхуэжын Кавказскэ жылагъуэм щыIэ, Коммунальнэ уэрамымкIэ ирикIуэ, еджа­пIэм, сабий IыгъыпIэм, щэнхабзэмкIэ Унэм хуэкIуэ щIыщIагъ гъуэгур;

— мы илъэс екIуэкIым и фокIадэ (сентябрь) мазэм и 1-м Исправнэ станицэм спорт утыку зэIуха къы­щызэIухын; абдеж щагъэу­вын хуейщ уэрам трена­жер зэмылIэужьыгъуэхэр, спорт оборудованэ, абы хэтыпхъэщ ГТО мардэхэм хуэгъэпсахэри;

— 2025 гъэм жэпуэгъуэм (октябрым) икIэм нэгъунэ Карачаевск къалэм и Ленинэ уэрамым тет, къат куэду зэтет, зи № 17, 19, 21-рэ  унэхэм я пщIантIэ Iэхэлъахэр къэгъэщIэрэщIэжын.

Абы хеубыдэ пщIантIэхэм узэрекIуалIэ гъуэгухэм асфальт гъэтIылъыныр, архитектурэ лIэужьыгъуэ зэ­хуэмыдэхэр гъэувыныр, сабий утыкуитIрэ зы спорт зыгъэсапIэ зэIухарэ щыу­хуэныр. ИкIи, мыхьэнэшхуэ иIэу къалъытащ а утыкухэр зи узыншагъэкIэ да­гъуэ зиIэхэм, земыкIуэфхэм ятегъэпсыхьауэ зэры­щытынум.

Хэгъуэгум и лIыщхьэм КъЧР-м ухуэныгъэмрэ ЖКХ-мрэкIэ и министрым пщэ­рылъ хуищIащ а унэхэм щыпсэухэм япсалъэу, ищхьэкIэ зи гугъу тщIа ухуэныгъэхэр здыщагъэувыну, езыхэмкIэ нэхъ тынш здэхъу­ну щIыпIэхэр къыхрагъэхыну. Пщэрылъу хъуамрэ ахэр щагъэзэщIэну пIалъэхэмрэ нэIэм щIагъэуващ.