«НЭХЪЫЖЬЫР гъэлъапIи – уи щхьэр лъапIэ хъунщ» жиIащ адыгэм… Ар шэчыншэщ. ИкIи, а хабзэ дахэм тету, иджыблагъэ Къэрэшей-Черкес Республикэм и ЦIыхубэ ЗэIущIэм (Парламентым) и депутатхэр: Щнахъуэ Кърымрэ Гуэнэ Игоррэ Зеикъуэ къуажэм дэс, ныбжьышхуэм нэса БОТЭЩ Зухьэд и унагъуэм гуфIэгъуэ IуэхукIэ еблэгъащ. Фигу къэдгъэкIыжынщи, мы нанэ Iумахуэр илъэси 100 щрикъуам адыгэ газетым, си щхьэкIэ — тхыгъэшхуэ тезухуауэ щытащ, апщыгъуэми дриплъэжат нэхъыжьыфIым къикIуа гъащIэ гъуэгуанэ гугъум, Iуэху бгъэдыхьэкIэм, щIэблэр гъэсэным хуиIэ еплъыкIэм…
КIэщIу фигу къэдгъэкIыжынщи, Зухьэд 1917 гъэм къалъхуащ, Хэку зауэшхуэм и ветеранщ, тылым гугъу зыщезыгъэхьахэм ящыщщ, жыпIэнурамэ, ныбжьышхуэ зиIэу районым щыпсэу нанэ Iумахуэщ – иджы дыдэ Зухьэд илъэси 109-рэ ирикъуащ. Мы бзылъхугъэ гуапэ цIыкIум и гъащIэр хуабжьу хьэлъэу екIуэкIащ. ГуащIэдэкI лэжьыгъэ гугъум епхауэ колхозым илъэс куэдкIэ щылэжьащ, зауэр щекIуэкIым, нэгъуэщIхэми яхуэдэу, сыт и лъэныкъуэкIи гугъуехьыр къытегуплIауэ ирихьэкIащ. Фашистхэр хэгъуэгум щитам, я къуажэм хьэкъувэкъуу, хьэкIэпычу зэрыдэтам фIы дыдэу я гугъу къытхуи щIыжауэ щытат Зухьэд.
Псибл зыхэтым хуэдэу фронтым хуэлэжьахэм ящыщщ мы нанэ цIыкIур. Зауэр иухри, пщащэр унагъуэ ихьащ. Ауэ, бзылъхугъэ насыпым щIэх дыдэ хэкIыжащ Зухьэд, и щхьэгъусэр сымаджэ хьэлъэ хъури. Абы къыкIэлъыкIуэу, езым и адэ-анэр пIэм хэгъуэлъхьащ… Къыдалъхуахэр, и унагъуэм щыщхэр илъэс 18-кIэ зэрихьащ, игъэтIылъыжахэщ. ИтIанэ езы ми колхозым игъэзэжри, и къару къихьыху гуащIэ дэкI лэжьыгъэ хьэлъэм пэрытащ.
Зухьэд гуауэу илъэгъуам я щхьэж хъуащ игъуэнэмысу IэщIэкIа и къуэ закъуэр. Сабий бын — пщащиплI нысэм къыIэщIэнэри, Зухьэд и щIалэ Мухьэмэд дунейм ехыжат. Анэм хэщIыныгъэ хьэлъэ дыдэ къылъыIэсами, нанэ Зухьэд мыбдежми и бгыр щIикъузэри, нысэм пщащэ цIыкIуиплIыр дипIащ, къыдиIэтащ. Нобэ нанэ Зухьэд ягъэлъапIэ, и гур яIэт а пщащэхэм къыбгъэдалъхьэ фIылъагъуныгъэ мыкIуэщIым, къызэрыкIэлъыплъым, абыхэм къащIэхъуэжа щIэблэр илъагъуну лъэкIыныгъэ Тхьэм къызэрыритам.
А сабийхэри нэрыбги 8 мэхъу, Тхьэм и шыкуркIэ. Зухьэд и махуэщIым ипкъ иту Ботэщхэ я унагъуэм еблэгъа депутатхэр нанэ цIыкIум хуэхъуэхъуащ узыншагъэ быдэкIэ, гъащIэ кIыхькIэ, къыщIэхъуа щIэблэм гу ящихуэну, гукъыдэж иIэу иджыри куэд дыдэрэ ящхьэщытыну, и гур хэзыгъахъуэ Iуэхугъуэхэм щымыщIэну. «Ботэщ Зухьэд Шухьэиб и пхъум хуэдэ цIыхухэр – Хэкум, зыщалъхуа щIыналъэм, къуажэмрэ унагъуэмрэ папщIэ псэемыблэж гуащIэ зыгъэтIылъхэм я щапхъэ нэсщ. ЦIыху къызэрыкIуэр, гуащIэрылажьэр сыт щыгъуи лъабжьэ быдэ хуэхъуащ ди къэралым и зэфIэувэныгъэм, ар щытыкIэ хьэлъэ щихуа лъэхъэнэхэми — апхуэдэхэращ къару нэхъыщхьэу диIар, ноби диIэр», — къыхэщащ Гуэнэ Игорь и псалъэхэм. Мы махуэм Ботэщ Зухьэд хъуэхъу псалъэхэр къыхуагъэфэщащ УФ-м и Президент Путин Владимири, Къэрэшей-Черкесым и Iэтащхьэ Темрезов Рэшиди. Зеикъуэ къуажэм и Iэтащхьэ Зэубыд Рустам я жылагъуэр зэрыгушхуэ, зэрыин нэхъыжьыфIыр езым къыбгъэдэкIа гулъытэкIэ, саугъэткIэ игъэлъэпIащ.
АБИДОКЪУЭ Люсанэ
Больше на Черкес хэку
Подпишитесь, чтобы получать последние записи по электронной почте.
