Москва къалэм щыIэ «Зарядье» паркым «Театральная неделя» зи фIэщыгъэцIэ Iуэхугъуэ гъэщIэгъуэн щекIуэкIащ. Ар къызэрагъэпэщащ Урысей Федерацэм и театр Iуэхузехьэхэм я Союзыр илъэси 150-рэ зэрырикъум ехъулIэу ирагъэкIуэкIа «Россия — Театр — Общество» Урысейпсо марафон-фестивалым ипкъ иту. ИкIи, нэхъыщхьэращи, а утыкум зыкъыщигъэлъэгъуащ Адыгэ Республикэм и Концерт зэгухьэныгъэм щыщ «Золотой кувшин» гуащэ театрым. Абыхэм къагъэлъэгъуа спектаклыр ягъэуващ ди хэкуэгъу, усакIуэ, драматург, журналист Бемырзэ Зураб и «Господин Дракон» пьесэмкIэ. Къыхэгъэщыпхъэщи, философие куумрэ иджырей сценэм и бзэмрэ зэпызыщIа Бемырзэм и пьесэр ЮФО-м къыбгъэдэкIыущ утыкушхуэм зэритар.
Адыгэ Республикэм щэнхабзэмкIэ и Министерствэм къызэрыхагъэщащи, спектаклыр «аншлаг»-у екIуэкIащ, къалащхьэм щыщ театреплъхэмрэ гъуазджэм и IэщIагъэрылажьэхэмрэ яфIэгъэщIэгъуэнащ. Езы пьесэм и гугъу тщIынщи, «Господин Дракон»-р таурыхъщ. Абы и лIыхъужь нэхъыщхьэр Щауэ цIыкIу зи цIэ щIалэщ. Ар нарт-лIыхъужь хъуну щIохъуэпс. ИкIи и хъуэпсапIэр къехъулIэн папщIэ абы лIыхъужьыгъэ зэрихьэн хуейщ.
ЩIалэ цIыкIум зыхуигъэувыжа къалэным хуопабгъэ. Абы хэту сабийм къыпэщIохуэ КIуху зи цIэ хъыджэбз угъурсыз цIыкIумрэ къэрабгъагъэр зи Iэпэгъу мыщэмрэ. Зэрыгъуэта гу пым зы защIри, аузыр псэупIэ зыщIа, къуажэ бжыгъэ псыншэу къэзыгъэна Благъуэм текIуэну мурад ящI. Гугъуехь куэд къызэранэкIри, гупыр Благъуэм полъэщ, ар ныбжьэгъуи къахуохъу. Щауэ-цIыкIуи зыщIэхъуэпсар — нарт хъуну — къохъулIэ. Къыхэгъэщыпхъэщи, Москва къалэм щекIуэкIа дауэдапщэм ипэ къихуэу гуащэ театрыр Санкт-Петербурги щыIащ. Абдеж артистхэм спектаклищ къыщагъэлъэгъуати, Бемырзэм и пьесэри абыхэм яхэтащ. ИкIи къалэжьым щыщ критикхэмрэ театреплъхэмрэ гуапэу, ягу зэрырихьар къыхагъэщу «Господин Дракон»-м къыпэджэжащ. Адыгэ Республикэм щыщ театрми Бемырзэ Зураби дохъуэхъу апхуэдэ ехъулIэныгъэкIэ, дяпэкIи я творческэ зэдэлэжьэныгъэм щIыхьрэ къыпэджэжэныгъэрэ иIэну!
ЧЫРБЫЖ Иринэ
Больше на Черкес хэку
Подпишитесь, чтобы получать последние записи по электронной почте.
