«Сабийхэм гу лъыфтэ!» профилактическэ Iуэхугъуэм ипкъ иту, «Адыгэ-Хьэблэ МОВД-м и Къэралавтоинспекцэ къудамэм и къулыкъущIэхэмрэ сабийхэм гъуэгум щагъуэтынкIэ хъуну фэбжьхэр щымыгъэIэнымкIэ «Лаборатория безопасности» Купсэм и егъэджакIуэхэмрэ зэщIыгъуу, гъуэгу шынагъуэншагъэм гулъытэ хуэщIыныр я къалэн нэхъыщхьэу, Адыл-Хьэлъкъ, Икон-Хьэлъкъ курыт, АдыгэХьэблэ пэщIэдзэ еджапIэхэм япэ классым щIэтIысхьа еджакIуэ цIыкIухэм профилактическэ зэIущIэхэр драгъэкIуэкIащ.
Апхуэдэуи, жьэрыIуатэуи, практическэ лэжьыгъэкIи «Лаборатория безопасности» мобильнэ автокъалэ цIыкIур къагъэсэбэпкIэрэ, цIыкIухэр гъуэгу шынагъуэншагъэм ехьэлIа щытыкIэхэм щагъэгъуэзащ. Ягъэкуэш гъуэгу нагъыщэхэр, «зебрэ», светофор, сабий автокреслэр — «Лаборатория безопасности» мобильнэ автокъалэ цIыкIум иIэщ гъуэгу дыдэм хуэдэ къабзэу, абы тет сыт хуэдэ нагъыщэри, Iэмалхэри.
Уеблэмэ апхуэдэ пкъыгъуэ бжыгъэм лъэкIыныгъэ къыуат гъуэгум къыщыхъункIэ хъуну къэхъугъэ зэхуэмыдэхэр я нэIэм щIагъэкIыну, кIэлъыплъыну. НыбжьыщIэхэм ирагъэлъэгъуащ тэрэзу автокреслэм зэрызипхыхьыпхъэр, ягу къагъэкIыжащ гъуэгум сыт щыгъуи шынагъуэ къыщыхъункIэ Iэмал зэрыщыIэр, абы къыхэкIыу, гъэсэныгъэ яхэлъу абы зэрыщызекIуэныр бгъэдыхьэкIэ нэхъыщхьэу зэрыщытыр. ЩIаплъыкIащ пщыхьэщхьэхуегъэзэкI щыхъум деж цIуугъэнэ къэзыгъэхъу пкъыгъуэхэр зэрызэрахьэн хуейр, лъакъуэрыгъажэ е иджырей зэманым къежьа, гъуэгушхуэм къызэрыщажыхь нэгъуэщI Iэмэпсымэхэр зегъэкIуэным пыщIа упщIэхэри. Гурыхуагъ яхэлъу, къулыкъущIэхэр зытепсэлъыхь Iуэхугъуэхэр яфIэхьэлэмэ ту ныбжьыщIэхэр щIэдэIуащ чэнджэщхэм. Практическэ лэжьыгъэхэми жыджэру хэлэжьыхьащ, жэуаплыгъэ яхэлъу къалэнхэр ягъэзащIэу, ябгъэдэлъ щIэныгъэр къагъэлъагъуэу. Апхуэдэу, «самокат»-р зэрызэрагъакIуэр нэрылъагъуу утыку кърахьащ, «Гъуэгу нагъыщэхэр», лъакъуэрыгъажэм тесу къэзыжыхьым щыгъын хуей щыгъынхэр зэрацIыхур щыуагъэншэу жаIащ. КъулыкъущIэхэм къабгъэдэкIыу еджакIуэ цIыкIухэм цIуугъэнэ къэзыгъэхъу пкъыгъуэхэр саугъэту хуагъэфэщащ.
АСЛЪЭНЫКЪУЭ Iэминат, «Адыгэ Хьэблэ» МОВД-м и Къэралавтоинспекцэ къудамэм гъуэгум шынагъуэншэу щызекIуэным къыхуеджэнымкIэ инспектор, полицэм и капитан
Больше на Черкес хэку
Подпишитесь, чтобы получать последние записи по электронной почте.
