Ди хэгъуэгум щыщ щIалэгъуалэ куэд ди къэралым и щIыналъэ зэхуэмыдэхэм щытхъухэр яIэу щолажьэ. Абыхэм ящыщ зыщ нобэ зи гугъу фхуэтщIыну щIалэр. Ар Москва къалэм дэт, Савельевэ и цIэр зезыхьэ зи № 31-нэ сымаджэщым урологиемкIэ и къудамэм и дохутыр-уролог, медицинэ щIэныгъэхэм я кандидат ШЭПАР Борис Мурадин и къуэращ.
Адыгэ щIалэр илъэси 10-м зэрынохьэс Москва зэрыщылажьэрэ, шэч хэмылъуи, а зэманым къриубыдэу и лэжьыгъэм и пIалъэр хъарзынэу къищIащ икIи нобэ ар Iэзагъ зыбгъэдэлъ дохутыру къалъытэ. Борис лIакъуэкIэ Зеикъуэ къуажэм щыщ, Черкесск къалэр псэупIэ зыхуэхъуа Шэпархэ къатехъукIащ. Абы и адэ-анэ Мурадинрэ Жаннэрэ я IуэхущIафэ дахэкIэ къэзымыцIыху ди щIыналъэм искъым жытIэмэ, егъэлеиныгъэ хэлъыну къыщIэкIынкъым.
Мурадин республикэм и щIыуэпсыр, и къабзагъыр ихъумэу ««Центр лабораторного анализа и технических измерений» IуэхущIапIэм и унафэщIу илъэс куэдкIэ лэжьащ. Нобэ пенсэм щысщ. Жаннэ илъэс 40-м зэрынохьэс медицинэм зэрыхэтрэ. Лэжьащ дохутыр-кардиологыу, республикэ клиническэ сымаджэщым и дохутыр нэхъыщхьэм и къуэдзэу, мединститутым и директорым и къуэдзэу, иджы «Доктор М» клиникэм и унафэщIым и къуэдзэщ.
А илъэсхэм къриубыдэу, дохутыр Iэзэр сымаджэ мащIэкъым зыщхьэпар, я лъэ тригъэувэжар. ЦIыхум щхьэпэным сыт щыгъуи хущIэкъу апхуэдэ анэ гупцIанэм, гуапэм сабийр кIэлъыплъурэ гукъыдэж ищIащ дохутыр IэщIагъэр зригъэгъуэтыну. ЗэрыцIыкIурэ ар и адэ-анэм хуагъасэт цIыхум сэбэп хуэхъун зэрыхуейм икIи а ущиехэм, сэбэп ухъуным гуапагъэ зэрыхэлъыр зыхищIащ езыми иужькIэ. Борис Черкесск къалэм дэт е 13-нэ курыт еджапIэм щеджащ, еджапIэ гъащIэми жыджэру хэтащ. Езым зыкъызэриумысыжащи, предметхэр псори фIыуэ илъагъут, ауэ гуманитар лъэныкъуэхэр нэхъ фIэгъэщIэгъуэнт. Щынэхъ цIыкIум илъэс зэхуэмыдэхэм нэгъуэщI IэщIагъэхэм хуеплъэкIами, класс нэхъыжьхэм щынэсым, дохутыр IэщIагъэм тегушхуащ икIи химие, биологие предметхэр нэхъ куууэ иджу щIидзащ.
Апхуэдэу, еджапIэ нэужьым ар щIэтIысхьащ Пироговым и цIэр зезыхьэу Москва къалэм дэт лъэпкъ къэхутакIуэ медицинэ университетым «Лечебное дело» IэщIагъэмкIэ ищхьэ щIэныгъэ зригъэгъуэтыну. ЩIалэр еплIанэ курсым хэсу къалэ сымаджэщхэм щылэжьэн иублащ. Апщыгъуэм абы и мурадащ медицинэм и унэтIыныгъэ зэхуэмыдэхэм Iуэху щищIэурэ, псоми зыщигъэгъуазэу, адэкIэ и IэщIагъэ лэжьыгъэр зытриухуэнур къыхихыну, абыкIэ щIэныгъэ куу зригъэгъуэтыну. АрщхьэкIэ апхуэдэ гуращэхэр къызэпаудащ япэу лэжьэн здыщIидза урологие къудамэм нэIуасэ къыщыхуэхъуа дохутырхэм.
Абыхэм дохутыр ныбжьыщIэр трагъэгушхуэри, а лъэныкъуэгъазэр къыхихащ икIи медуниверситетыр къызэриухыу, и щIэныгъэм а унэтIыныгъэмкIэ Япэ Московскэ къэрал университетым и ординатурэм щыпищащ. Абдеж илъэситIкIэ щеджауэ, ар 2019 гъэм ехъулIэныгъэкIэ къиухри, а илъэс дыдэм аспирантурэм «Урологиемрэ андрологиемрэкIэ» и щIэныгъэм щыхигъэхъуащ. Къыхэдгъэщынщи, дохутыр ныбжьыщIэм и гуащIэдэкI лэжьыгъэр Москва къалэм дэт сымаджэщ зэхуэмыдэхэм урологыу щрихьэкIащ, иджыкIэ академик Савельевэ и цIэр зезыхьэ клиническэ сымаджэщым щолажьэ.
И лэжьыгъэм утепсэлъыхьмэ, тыншкъым, дауи, махуэ къэскIэ, цIыху бжыгъэм зырызыххэу я узыншагъэм сэбэп хуэхъуну Iэмэ псымэхэмкIэ уеIэзэныр, дэтхэнэми гуапэу, шыIэныгъэ пхэлъу уепсэлъэныр. Сымаджэр узым пэлъэщыныр куэдкIэ зэлъытар абы еIэзэ дохутырырщ, IэщIагъэлIырщ. Апхуэдэм къыбгъэдэкI гуапагъэм узыр псынщIэ пщещI, гукъыдэжи къыует, къоуз узми нэгъуэщIынэкIи урегъэплъ. Апхуэдэ дохутырхэм Шэпарыр зэращыщым щыхьэт тохъуэ интернет хъыхэм ар зэIэза цIыхухэм щыхуатха фIыщIэ псалъэхэр. Апхуэдэхэр Борис и куэдщ. ЖытIэнщи, зыдэлажьэ гупым и мызакъуэу, сымаджэу къекIуалIэхэми ягу дыхьэну хунэсащ щIалэщIэр. Абы и лэжьыгъэр нэхъ хуэунэтIащ урологие узыфэхэм, цIыхум и Iэпкълъэпкъым хэмыIэбащэу, эндоскопием и Iэмалхэр къигъэсэбэпурэ, сымаджэхэм я узыншагъэм еIэзэным, лазеркIэ, инвазивнэ хирургиекIэ операцэ щIыным.
Адыгэ щIалэр щIэныгъэ лэжьыгъэми жыджэру пэрытщ, IэмалыщIэхэр къэлъыхъуэным хуабжьу дехьэх, щIэныгъэ утыкухэм ирагъэблагъэ. «Си IэщIагъэм езгъэфIэкIуэнымкIэ, зызужьынымкIэ абы мыхьэнэшхуэ иIэщ», — жеIэ Борис. Апхуэдэу, дохутыр ныбжьыщIэр зэрылажьэм хуэдэурэ, кандидат диссертацэм иужь ихьэри, академик, профессор, медицинэ щIэныгъэхэм я доктор Камалов Армаис и щIэныгъэ унафэщIу «Оптимизация применения эмболизации простатических артерий в лечении доброкачественной гиперплазии предстательной железы» темэмкIэ и кандидат лэжьыгъэр игъэхьэзыращ икIи Санкт-Петербург къалэм ехъулIэныгъэкIэ щыпхигъэкIащ. КъинэмыщIауэ, еджагъэшхуэхэу Камаловымрэ Карповымрэ я гъусэу, «Рентгенэндоваскулярные методы диагностики и лечения в урологии и андрологии», «Эмболизация простатических артерий в лечении доброкачественных гиперплазии предстательной железы» тхылъитIыр къыдагъэкIащ, патентхэр итхащ, Урысей, Къэралыбэ щIэныгъэ Конгрессхэм хэтащ.
Апхуэдэу, Амстердам къалэм щызэхэта, илъэс къэс ирагъэкIуэкI урологхэм я Европей ассоциацэм ирагъэблагъэри, абдежми доклад къыщищIащ. Борис и ныбжькIэ щIалэми, и лэжьыгъэм, гурэ псэкIэ къыхиха IэщIагъэм и къару емыблэжу зэрыпэрытыр, зэрыхуэщыпкъэр къигъэлъэгъуэн лъокI. Ар къыхалъытэкIэрэ, илъэс зэхуэмыдэхэм ФIыщIэ тхылъхэр къыхуагъэфэщащ. Ахэр къабгъэдэкIащ МГУ-м и ректорым, Москва къалэм и мэрым, МГУ-м и МНОЦ-м и унафэщIым, нэгъуэщIхэми. Абы унагъуэ дахи иIэщ. Зэщхьэгъусэхэм щIалэ цIыкIу зэдапI. Дохутыр Шэпарым жеIэ абыкIэ къызэрымыувыIэнур, и щIэныгъэм нэхъри зэрыхигъэхъуэнур, мурадхэр куэду зэриIэр. Тхьэм уригъэфIакIуэ, уи мурадхэри къыбдигъэхъу!
ЕЗАУЭ Маринэ
Больше на Черкес хэку
Подпишитесь, чтобы получать последние записи по электронной почте.
