Мэлыл нэхъыбэ

Къэрэшей-Черкесым щыIэ «Дамате» компанэ гупым (ГК-м) 2024 гъэм мэлылу къилэжьащ тонн мини 4,5-рэ. Ар 2023 гъэм нэхърэ процент 24-кIэ нэхъыбэщ. 2024 гъэм компанэ гупым и предприятэм щагъэзэщIащ мазэм консерв банкэ мелуани 2-м нэблагъэ къыщIигъэкIыу линэр гъэиныным хуэунэтIа проект. Абы къыпэкIуэу, гуэгушылрэ мэлылу илъэсым къыщIагъэкIым хуэдищрэ ныкъуэрэкIэ хагъахъуэри, тонн мини 2,7-м нагъэсащ.
«Дамате» предприятэм нэгъабэ Прикубан районым и Ударнэ жылагъуэм деж иухащ псэущхьэ мин 50 яIыгъыным тегъэпсыхьа, мэл здагъашхэ комплексым и етIуанэ Iыхьэр ухуэныр. Мы утыр зэраутIыпщам лъэкIыныгъэ къаритащ заводым хуагъэхьэзыр сырьер куэдкIэ ягъэнэхъыбэну. — Хэгъуэгумрэ къэралымрэ я ерыскъы шынагъуэншагъэр къызэфIэгъэкIыныр мыхьэнэшхуэ зиIэу къытпэщыт къалэнщ, икIи ар ехъулIэныгъэ къыпэкIуэу догъэзащIэ Урысей Федерацэм и Президентыр къызэрыддэIэпыкъум и фIыгъэкIэ. Федеральнэ ЗэIущIэм хуищIа Зыхуэгъэзэныгъэм деж къэрал Iэтащхьэм зэрыщыщIигъэбыдащи, мэкъумэш хъызмэтым дэIэпыкъуным адэкIи пащэнущ, икIи Урысей агропромышленнэ комплексым и производствэм и къэухьыр 2030 гъэм ехъулIэу Iыхьэ плIанэкIэ хэхъуэн хуейщ, 2021 гъэм елъытауэ, — жиIащ Къэрэшей-Черкесым и Iэтащхьэм. Ари фигу къэдгъэкIыжынщи, Ищхъэрэ-Кавказ федеральнэ хэгъуэгум (СКФО-м) щыIэ «Дамате» предприятэм мэлылыр къэлэжьыным хуэунэтIауэ щагъэзащIэ проектым хохьэ мэлыл къыщIэзыгъэкI, Урысей Федерацэм щынэхъ ин дыдэхэм ящыщ заводыр, Iэщ хъубжапхъэхэр здапI, здагъашхэ утхэр, фермерхэм ядэлажьэ компанэр, хъубжапхъэ-генетическэ купсэр.