Черкесск къалэм дэт 13-нэ гимназием щызэхашащ мы еджапӀэм къыщӀэкӀа, зауэ операцэ хэхам и ветеран Плохой Владимир и цӀэкӀэ ЛӀыхъужьым и Партэ къызэӀухыным теухуа дауэдапщэ. ЗэӀущӀэм хэтащ Урысейм и Офицерхэм я жылагъуэ зэгухьэныгъэм ди хэ гъуэгум щиӀэ къудамэм и президиумым и тхьэмадэ, Афганистаным щекӀуэкӀа зауэхэм хэта Мамчуев ИссэАлий, лӀыхъужьым и анэ Плохая Аннэ, гимназием и унафэщӀ Цеикъуэ Радинэ, егъэджакӀуэхэмрэ еджакӀуэхэмрэ. Псалъэ гуапэхэмкӀэ къызэхуэсахэм захуигъэзащ Владимир и япэ егъэджакӀуэу щыта Къущхьэ Ӏэсят.
Ар къытепсэлъыхьащ и гъэсэн щӀалэм и еджэгъуэ илъэсхэр зэрыригъэкӀуэкӀам, къыхигъэщащ цӀыхугъэу, гуапагъэу, хьэл быдагъэу хэлъар. ЕгъэджакӀуэм жиӀащ и щӀалэгъуэм къыщыщӀэдзауэ абы жэуаплыгъэр, Хэкум хуэлэжьэну зэрыхьэзырыр къыхэщу зэрыщытар. ЛӀыхъужьым и цӀэкӀэ къызэӀуаха Партэр щагъэуващ Владимир здеджа кабинет дыдэм. «ЛӀыхъужьым и Партэм дэсыныр хуагъэфэщэнущ еджакӀуэ нэхъыфӀхэм — еджэнымкӀэ ехъулӀэныгъэ зэраӀэм, гъащӀэ жыджэрагъ зэрахэлъым, щапхъэ зэрыхъум папщӀэ. Ар щӀыхь зыхэлъ къудейкъым, атӀэ жэуаплыгъэшхуэщ», — и къэпсэлъэныгъэм къыхигъэщащ еджапӀэм и унафэщӀ Цеикъуэ Радинэ. «Мы махуэр гимназием дежкӀэ граждан зэхэщӀыкӀымрэ хэкупсэу щытынымрэкӀэ дерс щхьэпэ дыдэ хъуащ, лӀыхъужьхэр къызэрытхэтыр, абыхэм я фэеплъыр хъумэныр ди къалэн лъапӀэу зэрыщытыр псоми дигу къигъэкӀыжащ», — жиӀащ фэеплъ зэӀущӀэм къыщыпсэлъа дэтхэнэми.
Фигу къэдгъэкӀыжынщи, «ЛӀыхъужьым и Партэ» Урысейпсо егъэджэныгъэ проектыр — ар хэкуэгъу гъуэзэджэхэм, Хэку зауэшхуэм и лӀыхъужьхэм, зэпэщӀэувэныгъэ зэхуэмыдэхэм, зауэ операцэ хэхам хэтахэм я фэеплъыр хъумэным хуэунэтӀа жэрдэмщ. Апхуэдэ Партэр гъэсэныгъэ ӀуэхущӀапӀэхэм щагъэув икӀи абы епхащ ЛӀыхъужьым, абы и гъащӀэ гъуэгуанэм, и лӀыгъэм теухуа хъыбархэр.
УАЗАЕ Маринэ
Больше на Черкес хэку
Подпишитесь, чтобы получать последние записи по электронной почте.
