КъЧР-м щыпсэухэм социальнэ хуэIухуэщIэхэр ягъэгъуэтынымкIэ республикэ Купсэм и къудамэ щхьэхуэхэм планшетхэр хуагуэшащ. А Iуэхугъуэм теухуауэ щытащ накъыгъэм и 13-м Купсэм щекIуэкIа зэIущIэр.
Социальнэ лэжьакIуэхэм яхуэзащ КъЧР-м гуащIэдэкIымрэ социальнэ зыужьыныгъэмрэкIэ и министр Хачиров Кемал, Купсэм и унафэщI Чыкъуэ Нурбий сымэ. — Псом япэрауэ, си лэжьэгъухэ, сывохъуэхъу ТекIуэныгъэм и Илъэс 80 махуэщI блэкIамкIэ. УФ-м и Президентым мы гъэр ТекIуэныгъэм и Илъэс 80-м, Хэкум и хъумакIуэм я Илъэсу зэригъэувам ипкъ иткIэрэ, фэ лэжьыгъэшхуэ евгъэкIуэкIащ, адэкIи пывощэ.
Фи лэжьыгъэр, фи Iуэхухэр нэхъри езыгъэфIэкIуэн, щIэзыгъэпсынщIэн Iэмалу къыдолъытэ дяпэкIэ фызэрылэжьэну, нобэ фхуэдгуэшыну планшетхэр. ДяпэкIи фи гуащIэр нэхъри хэхъуэу фылэжьэну, узыншагъэ быдэ фыщымыщIэну сывохъуэхъу! ФIыщIэ фхузощI фызыдэлажьэ цIыхухэм фазэрыдэгуашэ гуапагъэм, хуабагъэм, угъурлыгъэм папщIэ! — жиIащ проектыр зи жэрдэм министрым.
ЖыIэпхъэщи, илъэси 6-7-кIэ узэIэбэкIыжмэ кърахьэжьэу зэпыужа Iуэхум и пыщэж хъуащ мыр. ИджыкIэ планшетхэр зылъагъэсар зи лэжьыгъэкIэ нэхъ пашэ Усть-Жэгуэтэ, Зеленчук район социальнэ къудамэхэмрэ Черкесск къалэм щылажьэ социальнэ лэжьакIуэхэмрэщ. ДяпэкIэ я мурадщ республикэм и социальнэ къудамэ псори планшетхэмкIэ щызу къызэрагъэпэщыну. ЗэIущIэм къыщыпсэлъахэм къызэрыхагъэщащи, лэжьэкIэ IэмалыщIэм лэжьыгъэр игъэпсынщIэнущ, псоми я сэбэп къыхэкIыу. Къызэрыхагъэщащи, тхылъымпIэхэм иратхэным ипIэкIэ планшетхэр къагъэсэбэпыныр иджы нэхъ Iэмал къулей, тынш, псынщIагъуэ хъунущ икIи апхуэдэ зэхъуэкIыныгъэфIым социальнэ лэжьакIуэхэр щымыгуфIыкIкIэ къэнакъым, жэрдэмыр къызыбгъэдэкIа министрым фIыщIэ псалъэхэр хуагъэфэщащ. Планшет 60 социальнэ къудамэхэмрэ Черкесск къалэм щылажьэ социальнэ лэжьакIуэхэмрэ хуагуэшащ а махуэм.
ТУАРШЫ Ирэ
Больше на Черкес хэку
Подпишитесь, чтобы получать последние записи по электронной почте.
