Лэжьыгъэм пащэ

2025 гъэм къриубыдэу хэгъуэгу, район мыхьэнэ зиІэ автомобиль гъуэгу километр 39-рэ зэгъэзэхуэжыныгъэ лэжьыгъэхэм къызэщІрагъэубыдэнущ.
Апхуэдэу гъуэгу хъызмэтым зрагъэужьынущ, гъуэгу-транспорт инфраструктурэр егъэфІэкІуэнымкІэ проектхэр пхагъэкІынущ. Республикэ бюджетым къыхэкІ ахъшэкІэ ирагъэкІуэкІыну лэжьыгъэхэм я лъабжьэщ «Региональная и местная сеть» федеральнэ проектымрэ абы щыщ Іыхьэ «Инфраструктура жизни» лъэпкъ проектымрэ.
Зы илъэскъым республикэм и гъуэгухэм лэжьыгъэхэр зэрыщекІуэкІыр. Абы къриубыдэу гъуэгущІэхэр яухуащ, зэрагъэзэхуэжащ, адэкІи пащэнущ. БжыгъэхэмкІэ къэдгъэлъэгъуэнщи, «Майкоп-Карачаевск» автомобиль гъуэгум и километри 7 зэрагъэзэхуэжынущ.
Къапщтэмэ, иужьрей илъэсхэм мы гъуэгу Іыхьэм лэжьыгъэфІ щекІуэкІащ икІи абыхэм я къэпщытэжыны-гъэу, километр 40 щытыкІэ мардэхэм екІуу зэтрагъэпсыхьыжащ. АдэкІи пащэ «Усть-Жэгуэтэ-Тэрэзэ» гъуэгум елэжьыным. Мыбы щыщу километр 16-м зэгъэзэхуэжыныгъэхэр щызэлъэщІагъыхьащ. Мы гъэм километри 8,8-м елэжьынущ.
Республикэ бюджетым къыхэкІыу, 2025 гъэм къриубыдэу зэлэжьыну автомобиль гъуэгухэр:
«Адыл-Хьэлъкъ — ПсэукІэ-Дахэ» — километр 1,2-рэ; Ударнэ жылагъуэм — километри 2; Марыхъу жылагъуэм — километри 5; «Карачаевск-Учкулан» — километри 10.
Къалэнхэм хэтщ «Малэ Зеленчук — Куэш-Хьэблэ» автомобиль гъуэгури зэгъэзэхуэжыныр. Али-Бэрдыкъуэ къуажэм хиубыдэ автомобиль гъуэгум гулъытэ хуащІынущ. Апхуэдэ щІыкІэкІэ, «Черкесск-Хьэбэз» автомобиль гъуэгум 2016 гъэм щегъэжьауэ щекІуэкІ лэжьыгъэхэм пащэнущ.
Мы гъэм зэрагъэзэхуэжыну гъуэгухэм ящыщщ «Къардэныдж — Къызыл-Октябрь» автотрассэм и километри 3,9-рэ. Иужьрей гъуэгу ІыхьитІми лэжьыгъэхэр щаухынущ мы гъэм икІэм нэгъунэ.