ЛэжьапIэхэр зэдэзыхьыну хуейхэм я Iуэхухэр дауэрэ ягъэпсыпхъэ? Сыт хуэдэ пыбзыкIыныгъэхэр щыIэ лэжьапIэ зэдэхьыным ипкъ иту? Сыт хуэдэ хуитыныгъэхэр яIэ лэжьапIэхэр зэдэзыхьхэм? А упщIэхэм жэуап къарет Къэрэшей-Черкесым и Къэрал гуащIэдэкI инспекцэм и унафэщIым и пщэрылъхэр пIалъэкIэ зыхь Биджиев Руслъан.
— Сыт зыщIысыр лэжьапIэхэр зэдэхьыныр?
— Ар гуащIэдэкI зэгурыIуэныгъэм и къэухьхэм иту, ауэ лэжьапIэ нэхъыщхьэм къыщыдэхуэкIэ, игъэзащIэ, пщIэ зыщIат лэжьыгъэщ.
— Мыбдежым лэжьэгъуэ зэманыр дауэ зэпэгуэша хъурэ?
— Нэхъыщхьэм дахь лэжьыгъэр махуэм сыхьэти 4-м (лэжьэгъуэ махуи 5-м и махуэ ныкъуэ мардэм) щIигъу хъунукъым.
— Сыт щыгъуэ махуэ псо лажьэ щыхъунур?
— ЛэжьапщIэр ягъэгувэу лэжьыгъэ нэхъыщхьэр къыщызэтрагъэувыIэкIэ, лэжьыгъэ нэхъыщхьэм махуэ псо къыщыдэхуэкIэ, узыншагъэкIэ лажьэ мыхъуу лэжьакIуэр къыщыIуагъэкIкIэ, нэгъуэщI IэнатIэ ягъэкIуэн хуей щыхъукIэ, ауэ апхуэдэ IэнатIэр щыщымыIэкIэ, е езы лэжьакIуэр нэгъуэщI щIыпIэ ягъэкIуэну щыхуэмейкIэ.
— Хэт лэжьапIэхэр зэдэзыхь мыхъунур?
— Илъэс 18 мыхъуахэм. ЛэжьапIэ шынагъуэхэм гугъу зыщезыгъэхьхэм, дахьыну лэжьапIэри щытыкIэ шынагъуэхэм япхауэ щытмэ. Лэжьыгъэ нэхъыщхьэр транспортыр зегъэкIуэным зэрепхам хуэдэу абы дахьыну лэжьыгъэри транспортыр зегъэкIуэным епхамэ.
— ЛэжьапIэ зэдэзыхьхэм отпуск и лъэныкъуэкIэ сыт хуэдэ хуитыныгъэхэр яIэ?
— ЛэжьапIэ нэхъыщхьэм хуэдэ къабзэу гъэ къэси кърат отпускыр, аванс отпуск, мази 6 мылэжьамэ. ЛэжьапщIэ къыщырамыт отпуск (зэдихь лэжьыгъэм къыщылъыс отпускыр лэжьапIэ нэхъыщхьэм деж нэхърэ пIалъэкIэ нэхъ мащIэмэ).
— «Совместительство», «совмещение» мыхьэнэхэр дауэ зэщхьэщыкIрэ?
— Совместительство: лэжьыгъэ лейр ягъэзащIэ IэнатIэ нэхъыщхьэм къыщыдэхуэкIэ. ГуащIэдэкI зэгурыIуэныгъэ щхьэхуэ зэдащI. Ущылажьэ хъунущ а лэжьапIэт дыдэм дежи, нэгъуэщIым дежи.
Совмещение: лэжьыгъэ лейр а лэжьапIэт дыдэм деж щагъэзащIэ лэжьэгъуэ махуэм, ауэ абы щхьэкIэ пщIэ лей кърату. ГуащIэдэкI зэгурыIуэныгъэ щхьэхуэ зэдащIкъым.
ПАЩIЭ Хьэдис
Больше на Черкес хэку
Подпишитесь, чтобы получать последние записи по электронной почте.
