2025 гъэм мэлыжьыхьым и 18-м, Даур Аслъэн и цІэр зезыхьэ, щэнхабзэмрэ гъуазджэхэмрэкІэ республикэ колледжым, Черкесск къалэм, Ленин и цІэр зезыхьэ уэрамым и 8-нэ хьэщIапIэм Урысейпсо лэжьапІэ жармыкІэ щекІуэкІынущ, сыхьэтыр 10-м щегъэжьауэ.
«Работа России. Время возможностей» зи фІэщыгъэцІэ жармыкІэр ІыхьитІу гуэшащ. Абы и япэ, хэгъуэгу Іыхьэм и къалэн нэхъыщхьэр — лэжьапІэтхэмрэ лэжьапІэ къэзылъыхъуэхэмрэ зэшэлІэнращ. ЖармыкІэр плІанэпэ-плІанэпэкІэрэ, щІыпІэщІыпІэкІэрэ гуэшаурэ екІуэкІынущ. Абы и фІыщІэкІэ, лэжьапІэ къэзылъыхъуэ дэтхэнэми лъэкІыныгъэ иІэнущ лэжьапІэтхэм япсэлъэнымкІэ, и упщІэ яритынымкІэ. ЛэжьапІэ жармыкІэм республикэм и ІуэхущІапІэ 27-м зыкъыщагъэлъэгъуэнущ, зыхуэныкъуэ лэжьакІуэхэр, ІэщІагъэлІхэр ягъэнэІуэнущ. Апхуэдэщ: «Черкесск РТИ», «Водоканал», «Бумфа групп», «Газпром газораспределение Черкесск», «Газпром межрегионгаз Черкесск», «Кавказ-Мясо», «АрхызФрут Логистик», «Архыз Оригинал», «Сатурн» ООО-хэр, «Аквалайн», «Южный», «Кавказцемент» АО-хэр, «Хьэбэз жыпс завод» ОАО-р, «Почта России» АО-р, «Зеленый остров» ЧГМУП-р, нэгъуэщІхэри. ЛэжьапІэ ІуэхущІапІэхэм къинэмыщІауэ, жармыкІэм кърагъэблэгъащ егъэджэныгъэм телажьэ къулыкъу зэхуэмыдэ 12: Черкесск педколледжыр, «Синергия»-р, индустриальнэ колледжыр, аграрно-технологическэ колледжыр, «Многопрофильный колледж» КъЧР БПОО-р, цифровой технологиехэмкІэ колледжыр, нэгъуэщІхэри ЖармыкІэ махуэм къриубыдэу, «Кадровый центр КЧР» ТО РГКУ-м и жэрдэмкІэ, Уарп, Къэрэшей, Усть-Жэгуэтэ районхэм ит ІуэхущІапІэхэм цІыхухэм зыщрагъэплъыхьынущ, щагъэгъуэзэнущ абыхэм щагъуэтыну лэжьапІэхэм. ЖармыкІэр здекІуэкІыну щІыпІэхэм щылэжьэнущ лэжьапІэ къэзылъыхъуэхэм я упщІэхэм жэуапэгъу къаздыхуэхъуфыну утыкухэр. Апхуэдэу, лэжьэнущ цІыхухэм лэжьапІэ къахуэзыгъуэт купсэхэм я хуэІухуэщІэхэм нэхъ убгъуауэ зыздыщагъэгъуэзэфыну, лэжьапІэтымрэ лэжьапІэ къэзылъыхъуэмрэ здызэпсэлъэфыну, промышленнэ лэжьапІэхэм щылэжьэнухэр къыздыхахыну, лекцэхэр щекІуэкІыну утыкухэр. ІэщІагъэ къыздыщІах, ику ит еджапІэхэм я лэжьыгъэр, къыщІах ІэщІагъэхэр утыкум щагъэлъэгъуэфынущ. Гу зылъытапхъэщи, нэгъуэщІ хэгъуэгухэм щылэжьэну лэжьапІэ къэзылъыхъуэхэми зыхэдэн яІэнущ, сыту жыпІэмэ, Краснодар крайм, Тэн-Іут-Ростов къикІа, лэжьапІэтхэм я лІыкІуэхэр жармыкІэм къекІуэлІэнущ. А махуэм промышленнэ предприятэшхуэхэм я бжэхэр хузэІуахынущ лэжьыгъэм зыщызыгъэгъуэзэну хуейхэм, класс нэхъыжьхэм щеджэ еджакІуэхэм. «Фестиваль профессий» зи фІэщыгъэцІэ Іуэхугъуэ щІэщыгъуэ екІуэкІынущ. Ар яфІэгъэщІэгъуэн хъунущ еджапІэхэр, лицейхэр, гимназиехэр къэзыуххэм. Ахэр станц зэхуэмыдэхэм «щыхьэщІэнущ»: техническэ, экономикэ, медицинэ, егъэджэныгъэ творческэ хуэдэхэм. Абыхэм яхьэлІа ІэщІагъэхэм нэІуасэ зыхуащІыфынущ ныбжьыщІэхэм. — Урысейпсо лэжьапІэ жармыкІэр лэжьапІэтымрэ лэжьакІуэ хъунумрэ я зэпсэлъапІэ, лэжьапІэ къэзылъыхъуэм и зэфІэкІхэм я гъэунэхупІэ утыкущ. ЛэжьапІэ лъыхъуэм а махуэ дыдэм зригъэгъуэтыфынущ е гъэунэхуныгъэ пІалъэкІэ лэжьапІэ Іухьэфынущ, лэжьапІэтхэм зыхуэныкъуэ лэжьакІуэхэр къыхахынущ. Ар кІуэрабгъу тыншщ лъэныкъуитІымкІи, — журналистхэр щигъэгъуэзащ Кадровэ купсэм «Отдел активной занятости населения» и къудамэм и унафэщІ Пожидаевэ Наталье. — ЛэжьапІэ жармыкІэм и жэрдэмыр къыхэзылъхьар УФ-м гуащІэдэкІымрэ социальнэ хъумэныгъэмрэкІэ и Министерствэращ. Мэлыжьыхьым и 18-м къэралым и хэгъуэгуу хъуам щекІуэкІынущ жармыкІэм и япэ-хэгъуэгу Іыхьэм и лэжьыгъэр. ЕтІуанэ, федеральнэ Іыхьэр, мэлыжьыхьым и 27-м зэхашэнущ. ЖыІэпхъэщи, цІыхухэм лэжьапІэ къахуэгъуэтынымкІэ Купсэм ирегъэкІуэкІ зэпыт мыпхуэдэ жармыкІэхэр. Ар щхьопэ лэжьапІэтми лэжьапІэ къэзылъыхъуэхэми я хьэлэмэт зыхэлъыр ягъэкІуэтэным. ЖармыкІэм хэтыну хуей лэжьапІэтым, жармыкІэр щыщыІэнум ипэ къихуэу, лъэІу тхылъ къитын хуейщ, зыхуэныкъуэ лэжьакІуэхэр, щытыкІэхэр, лэжьапІэм, ІуэхущІапІэм, улахуэм ехьэлІа псори игъэнаІуэу, — жиІащ «Кадровый Центр КЧР»-м и унафэщІ Урчыкъуэ Альбий. ТУАРШЫ Ирэ
Больше на Черкес хэку
Подпишитесь, чтобы получать последние записи по электронной почте.
