Къэрэшей-Черкесым и Iэтащхьэ Темрезов Рэшид лэжьыгъэ IуэхукIэ яIущIащ лъэпкъ проектхэмрэ профильнэ федеральнэ программэхэмрэ гъэзэщIэныр зи нэIэм щIэту, республикэм и Правительствэм хэтхэм.
«Нобэ АПК-р — ди хэгъуэгум и экономикэм зезыгъэужьхэм ящыщщ. Промышленностымрэ туризмэмрэ щIыгъуу, абы валовэ хэгъуэгу продукт нэхъыщхьэр къыщIегъэкI», — жиIащ Темрезов Рэшид. Министрхэм ди хэгъуэгум и унафэщIыр щагъэгъуэзащ 2024 гъэм зэфIагъэкIа лэжьыгъэхэм, 2025 гъэм отраслым зегъэужьынымкIэ я мурадхэмрэ мэкъумэш хъызмэт хьэпшыпхэр къыщIэзыгъэкIхэм зэрызыщIагъэкъуэну Iэмалхэмрэ. ЗэIущIэм хэтахэр щхьэхуэу хэплъащ IэщхъуныгъэмкIэ, къэкIыгъэрэ жыг хадэрэ къэгъэкIынымкIэ инвестпроектхэр гъэзэщIэным ехьэлIа упщIэм. Темрезов Рэшид и лэжьэгъухэм яхуигъэбелджылащ Урысейм зегъэужьынымкIэ ди къэралым и Президентым ищIа унафэр къыхэлъытауэ, лэжьыгъэр нэ хъыщхьэу зыхуаунэтIыну лъэныкъуэхэр. — Къуажэдэсхэр лэжьапIэкIэ къызэгъэпэщыныр республикэм и Правительствэмрэ мэкъумэш хъызмэтымкIэ и Министерствэмрэ я къалэн нэхъыщхьэхэм ящыщ зыуэ къызолъытэ. ЦIыхухэм къэрал дэIэпыкъуныгъэ ягъэгъуэтыным и гъэлъэгъуэныгъэ нэхъыщхьэу щытын хуейри аращ — лэжьапIэ щIыпIэхэр, Iэщ щхьэ бжыгъэр, къыщIагъэкI мэкъумэш хъызмэт продукцэр хэгъэхъуэныр, бюджетым къихьэ хьэкълыкъыр нэхъыбэ щIыныр, — жиIащ ди хэгъуэгум и унафэщIым. Тепсэлъыхьащ къуажэхэм загъэужьынымкIэ лажьэ программэм. Темрезов Рэшид жиIащ цIыхухэр псы къабзэкIэ къызэгъэпэщыным нэхъ гулъытэ хуащIыну.
Больше на Черкес хэку
Подпишитесь, чтобы получать последние записи по электронной почте.
