КъэкIуэнкIэ дызыщыгугъ

ХэIэтыкIауэ, дауэдапщэшхуэкIэ дымыгъэлъапIэми, физкультурникым и Махуэм гулъытэ хуэдмыщIынкIэ Iэмал иIэкъым, узыншагъэм, узыншэу псэуным и мыхьэнэр къыдгурыIуэкIэрэ, узыншагъэр емыкIэкIуэным, дефIэкIуэным зи къару мымащIэ езыхьэлIэ, спортым епхауэ лажьэхэм фIыщIэ яхуэтщIкIэрэ. Апхуэдэуи, дыхуейт дыкъытеувыIэну нэгъабэ щегъэжьауэ, кIуэ пэтми нэхъри зыкъызэкъуэзых, гулъытэ хэха ди хэгъуэгум щызыгъуэта спорт лIэужьыгъуэм — IэнэгущIыIу теннисым. 2025 гъэм «IэнэгущIыIу теннис» спорт лIэужьыгъуэм КъЧР-м спортымкIэ и Министерствэм къэрал аккредитацэ иритащ.

Абы кIэщIу и ужь иту, республикэм и район къэс къыщызэIуахащ секцэ 12, щIагъэуващ мы теннис лIэужьыгъуэм тегъэпсыхьа джэгупIэ-Iэнэ 70. Апхуэдэу жыджэру кърагъэжьа Iуэхум къыпэкIуа фIыгъуэхэри нэрылъагъу хъуагъэххэщ. Мы гъэ закъуэр къапщтэмэ, зэхьэзэхуэ хэIэтыкIа зыбжанэ екIуэкIагъэххэщ: накъыгъэм и 1-3 махуэхэм Зеленчук станицэм КъЧР-м и чемпионат щызэхэтащ. Абы хэлэжьыхьащ республикэм и район зэхуэмыдэхэм къикIа теннисист 90-м нэс. Мэлыжьыхьым и 27-м Кавказскэ жылагъуэм щекIуэкIащ еджапIэ спорт клубхэм я Спартакиадэ, финал джэгугъуэ Iыхьэр, райони 9-м и спортсменхэр зыхэтар. Мы гъэм мазаем КъЧР-м и цIыхухъу командэр (илъэс 16-м нэс зи ныбжьхэр) щIэбэнащ СКФО-м и пашэныгъэм икIи япэ дыдэу къилъэщащ «дыщэр».

Иджы ди гуапэщ дыкъытеувыIэну Хьэбэз къуажэм щекIуэкIа зэхьэзэхуэм. «Земля Спорта» Урысейпсо марафоным ипкъ иту, Хьэбэз къуажэм, «Хатт» ФОК-м деж IэнэгущIыIу теннисымкIэ зэхьэзэхуэшхуэ щызэхэтащ. Турнирым къызэхуишэсащ Хьэбэз районым и курыт еджапIэхэм я еджакIуэхэр. Ныбжь зэхуэмыдэм итми, ахэр псори зэригъэубыдащ дэтхэнэми и гур зыхуэмахэ IэнэгущIыIу теннисым, апхуэдэ зэныкъуэкъуныгъэ узыншэм хэтуи зэхьэрхуэрахэщ.

Мы зэхьэзэхуэм и къызэгъэпэщакIуэ, и жэрдэмщIакIуэу щытащ УФ-м мэкъумэш хъызмэтымкIэ и Министерствэр. Зэхьэзэхуэм и узэщIакIуэ-унэтIакIуэу щыIащ IэнэгущIыIу теннисымкIэ IэщIагъэлI Балэ Сэидин. Зэхьэзэхуэм ныбжьыщIэхэм зэфIэкI лъагэхэр къыщагъэлъэгъуащ, спорт пабгъэныгъэ быдэ къызыкъуахащ, дэтхэнэри елIэлIащ увыпIэ пашэхэм, ауэ зэхьэзэхуэ хабзэу, пашэхэри, абыхэм якIэлъыхьэным иджыри къару езыхьэлIэн хуейхэри игъэунэхуащ. Абы теткIэрэ, щIалэхэм деж япэ увыпIэр ихьащ Къэнэмэтхэ Амар, етIуанэр — Иуан Рамид, ещанэр — Лахъу Айнур. Пщащэхэм бжьыпэр зыхьар Даур Зарэщ, етIуанэр ихьащ Абидокъуэ Миланэ, ещанэ увыпIэм кIуащ Сэнэшокъуэ Даннэ.

Зэхьэзэхуэм къыщыунэхуащ «вагъуэщIэ». Илъэси 6 нэхъ мыхъуа, турнирым нэхъыщIэ дыдэу хэта Гъуэщокъуэ Амелия псоми я гур къитхьэкъуащ и ныбжьым емылъытауэ и пабгъэныгъэ, нэрыгъыгъэ лъэщкIэ. Амелия и гъэсакIуэр Даур Сэидэщ. Зэхьэзэхуэм хэта дэтхэнэми игу ирихьащ а махуэр зэрекIуэкIар, зэхыхьэр къызэрызэрагъэпэщар, утыкум къыщагъэлъэгъуа зэфIэкIхэр. Дэри дяпэкIэ дыпэплъэнущ апхуэдэ спорт зэхьэзэхуэ дахэхэм, абыхэм къыщыунэхуну ехъулIэныгъэхэм. IэнэгущIыIу теннисымкIэ Iуэхухэр псынщIэу зэрыкIуатэм, абы цIыхухэр зэрыдихьэхым уегупсысмэ, къэкIуэныфI зэриIэм, ехъулIэныгъэхэм дызэрыхэплъэнум шэч къытетхьэкъым.

ШЫБЗЫХЪУЭ Ирэ