Къэрэшей-Черкесым и Ӏэтащхьэ Темрезов Рэшид лэжьыгъэ ӀуэхукӀэ ӀущӀащ республикэм и Правительствэм и тхьэмадэ Аргун Мурат. Ахэр Урысейм и Президент Путин Владимир и унафэхэр гъэзэщӀэнымкӀэ къалэн нэхъыщхьэхэмрэ 2026 гъэм социально-экономикэ зыужьыныгъэмкӀэ мурадхэмрэ тепсэлъыхьащ.
Апхуэдэу, мыхьэнэ зиӀэ унэтӀыныгъэ зыбжанэм хэплъахэщ. «АдэкӀи делэжьэнущ узыншагъэр хъумэнымкӀэ бэзым зегъэужьыным, егъэджэныгъэм и фӀагъыр къэӀэтыным, демографие щытыкӀэр егъэфӀэкӀуэным. Унафэ щхьэхуэщ икӀи икъукӀэ мыхьэнэшхуэ зиӀэ Ӏуэхущ СВО-м хэтхэмрэ абыхэм я унагъуэхэмрэ сыт и лъэныкъуэкӀи защӀэгъэкъуэныр. Ар ди къалэнщ икӀи ди пщэрылъщ», — жиӀащ ди хэгъуэгум и лӀыщхьэм.
КъинэмыщӀауэ, абыхэм зэпкърахащ лъэпкъ проектхэмрэ мыхьэнэшхуэ зиӀэ программэхэмрэ гъэзэщӀа хъунымкӀэ къалэнхэр. Мы гъэм гулъытэ хэха хуащӀынущ ЖКХ-м зегъэужьыным, псалъэм папщӀэ, цӀыхухэр псы къабзэкӀэ къызэгъэпэщыным. НэӀэ тет зэпыту щытынущ социальнэ псэуалъэхэм я ухуэныгъэр, псэупӀэхэмрэ гъуэгу инфраструктурэмрэ, жылагъуэ щӀыпӀэхэр зэгъэпэщыныр, ТКО-р зэхуэхьэсынымрэ гъэкӀуэдыжынымрэ я бэзым зегъэужьыныр. Апхуэдэщи, ахэр ирипсэлъащ экономикэм и лъэныкъуэгъазэхэм защӀэгъэкъуэнымкӀэ щыӀэ Ӏэмалхэм. «Ди мурадыр — лэжьапӀэщӀэхэр къызэгъэпэщынырщ, ди щӀыналъэм инвестицэ нэхъыбэ къешэлӀэнырщ», — жиӀащ Темрезов Рэшид.
ЗэӀущӀэм гулъытэ хэха щыхуащӀащ КъЧР-м щыпсэу лъэпкъхэм я псэкупсэ, щэнхабзэ щӀэиным и Илъэсыр къызэгъэпэщынымрэ егъэкӀуэкӀынымрэ. «Ар ди республикэм и щэнхабзэ-тхыдэ хъугъуэфӀыгъуэ гъуэзэджэр хъумэнымрэ гъэбэгъуэнымрэ, къытщӀэхъуэну щӀэблэм лъабжьэ быдэ яхуэгъэувынымкӀэ Ӏэмал хъарзынэщ», — пищащ республикэм и унафэщӀым. Темрезов Рэшид Правительствэм пщэрылъ хуищӀащ пӀалъэ кӀэщӀ дыдэкӀэ къэкӀуэну илъэс псом тещӀыхьа ӀуэхугъуэхэмкӀэ зэхэгъэува, гъэнщӀа план къыхалъхьэну, Урысейм щыпсэу лъэпкъхэм я зэкъуэтыныгъэм и Илъэсу Путин Владимир зэригъэувари къыхалъытапхъэу.
ЕЗАУЭ Маринэ
Больше на Черкес хэку
Подпишитесь, чтобы получать последние записи по электронной почте.
