Къэрэшей-Черкес Республикэм и Iэтащхьэ Темрезов Рэшид лэжьыгъэ IуэхукIэ IущIащ хэгъуэгум и ХэхакIуэ комиссэм и унафэщI Абазалиевэ Ларисэ. Зэпсэлъэныгъэм къриубыдэу ахэр тепсэлъыхьащ Урысей Федерацэм и Къэрал Думэм и IХ зэхуэшэсыгъуэм хэтыну депутатхэр хэхын Iуэхур ди республикэм зэрыщекIуэкIам.
«Хьэсэнбий ипхъу Ларисэ къипщытащ хэхыныгъэхэр къызэгъэпэщауэ, ягъэбелджыла хабзэхэм тету зэрекIуэкIар. Абы гу лъитащ щIэплъыкIакIуэхэми кандидатхэми къабгъэдэкIыу тхьэусыхи, лъэпощхьэпо гуэр зыхэлъ псалъэмакъи ХэхакIуэ комиссэми, нэгъуэщI IуэхущIапIэхэми къазэрыIэрымыхьам. Хэгъуэгум и ХэхакIуэ комиссэм и унафэщIым сызэрыщигъэгъуэзамкIэ, щIыпIэ комиссэхэмрэ хэхыпIэ участок 96-мрэ я деж видеощIэплъыкIыныгъэкIэ къызэгъэпэщауэ щытащ. Хэхыныгъэхэм кIэлъыплъащ щIэплъыкIакIуэ минитI, лэжьащ жылагъуэ щIэплъыкIакIуэхэм я Купсэ.
Федеральнэ мониторинг гупхэми уасэшхуэ хуащIащ хэхыныгъэ Iуэхугъуэхэр ди республикэм зэрыщекIуэкIам. АтIэ, абы къекIуэлIащ Къэрэшей-Черкес Республикэм щыпсэу цIыху мин 253-м щIигъу — ар хэхакIуэхэм я процент 85-рэ мэхъу. Iэ зыIэтахэм ящыщу процент 74-м я дзыхьыр ирагъэзащ «Зыуэ щыт Урысей» партым. Хэхыныгъэхэм цIыху куэд къызэрекIуэлIар, абыхэм къагъэлъэгъуа гъэлъэгъуэныгъэр щыхьэт тохъуэ Къэрэшей-Черкесым щыпсэухэр къэралым и жылагъуэполитическэ гъащIэм жыджэру зэрыхэлэжьыхьым, Урысейм и Президентым иригъэкIуэкI Iуэхухэр зэрыдаIыгъым. ФIыщIэ ин яхузощI хэхакIуэ комиссэхэм хэтахэм, щIэплъыкIакIуэхэм, хэхыныгъэ Iуэхум хэлIыфIыхьауэ хъуам къызэвгъэпэща, жэуаплыгъэ зыхэлъ лэжьыгъэмрэ IэщIагъэ IэпщIэлъапщIагъ хэлъу ар зэревгъэкIуэкIамрэ папщIэ! Щхьэхуэу фIыщIэ псалъэкIэ къыхэзгъэщыну сыхуейщ ди хэхакIуэхэр — къагъэлъэгъуа жыджэрагъ лъагэмрэ граждан бгъэдыхьэкIэмрэ папщIэ.
Си фIэщ мэхъу: зыIэрагъэхьа Iуэху зэхэщIыкIыр, мы Iуэхум хэлъа, фIагъ лъагэ зэдэлэжьэныгъэм дяпэкIи къулыкъу хуащIэнущ зэIухауэ, хабзэм тету, дзыхь хэлъу республикэм щекIуэкIыну хэхыныгъэхэм», — щитхащ социальнэ зэпыщIэныгъэхэм КъЧР-м и Iэтащхьэм.
Больше на Черкес хэку
Подпишитесь, чтобы получать последние записи по электронной почте.
