Адыгэ-Хьэблэ къуажэм щаухуэ еджапIэщIэм щекIуэкI лэжьыгъэр здынагъэсар зрагъэлъагъуну щIэплъыкIакIуэ гуп абы еблэгъащ. Къуажэдэсхэр куэд щIауэ еджапIэщIэм поплъэ. Мыбы ипэкIэ яIар 1930 гъэм яухуа унэрат. Абы иужькIэ къыпащIыхьыжами, ар зыкIи иджырей егъэджэныгъэ къэухьым хэзэгъэжтэкъым, сабийхэри щIэхуэжтэкъым.
Иджы еджакIуэ 600-м ятегъэпсыхьа, къатищу зэтет, зэбгъузэнатIэ мин 1000-м нэс еджапIэщIэр дращIеягъэххэу, и кIуэцIыр къищIыкIыным щIэгъэхуэбжьауэ йолэжь. Лэжьыгъэшхуэр «Молодежь и дети» лъэпкъ проектым ипкъ иту ирагъэкIуэкI. Ар здынагъэсамрэ ухуакIуэхэм я лэжьыгъэм и фIагъымрэ щIэзыплъыкIа гупым хэтащ КъЧР-м къыбгъэдэкIыу УФ-м и сенатор Къэзэнокъуэ Кърым, УФ-м и Къэрал Думэм и депутат Узденов Солтан, республикэм и ЦIыхубэ ЗэIущIэм (Парламентым) и депутатхэу Къардэн Фатимэ, Джамбаев Руслан сымэ, АдыгэХьэблэ район администрацэм и Iэтащхьэ Астэжь Мыхъутар, егъэджэныгъэ къудамэм къыбгъэдэкIахэр. УхуэныгъэщIэм и къатищми щекIуэкI лэжьыгъэм хэплъа нэужь, абы и фIагъымрэ зэман ягъэнэIуам ехъулIэу зэращIымрэ уасэ хуащIащ, дяпэкIэ гу зылъытапхъэ лъэныкъуэхэр къыхагъэщащ. Гупым хэтхэр епсэлъащ еджапIэм и унафэщI Кхъуэхъу Беллэ. Абы ахэр щигъэгъуэзащ къуажэм и гъащIэм еджапIэщIэм зэхъуэкIыныгъэу къыхилъхьэныр зыхуэдизым.
— ЕджапIэжь диIам ди сабийхэр щIэдгъэхуэжыфтэкъым, егъэджэныгъэ Iуэхур нэсу къытхузэгъэпэщтэкъым. Ди лъэIур зэхахри, еджапIэщIэм иужь ихьахэщ. Ар нагъэсмэ, шэджагъуакIуэ димыIэжу егъэджэныгъэр дгъэпсыфынущ. УхуакIуэхэр сыткIи къыдочэнджэщ — лэчхэм я плъыфэмкIэ, плиткэ лIэужьыгъуэхэр зыхуэдэнумкIэ, пщIантIэр зэрыщытынумкIэ егъэджакIуэхэми адэанэхэми я Iуэху еплъыкIэр къыхалъытэ. Спорт пэшышхуитI диIэ хъунущ — пэщIэдзэ, ику ит классхэм папщIэ. ЕджакIуэ 300 зыщIэхуэ шхапIэ, актовэ пэш Iэхуитлъэхуит диIэнущ. ПщIантIэм спорт утыкуитху щаухуэнущ ныбжь зэхуэмыдэхэм ятегъэпсыхьауэ, — жиIащ еджапIэм и унафэщIым.
ЕджапIэщIэр къызэIуахыжмэ абы зы ищIыжынущ пэщIэдзэ классхэри ику итхэри. Къуажэдэсхэр куэд щIауэ зыщIэхъуэпс Iуэхугъуэщ ар. Я бынхэм фIагъ зыхэлъ, зэманым декIу егъэджэныгъэ ягъуэтынымкIэ ар IэмалыфIщ. Мы зэманым къапэщылъ лэжьыгъэм и нэхъыбэр яухагъыххэщ: зыгъэхуабэ пкъыгъуэхэр щIашащ, иджы пэш кIуэцIхэр къращIыкI. Абы къыдэкIуэу, еджапIэ пщIантIэри къызэрагъэпэщ.
— Мыпхуэдэ щIэплъыкIыныгъэхэр идогъэкIуэкI зэпыт, ухуэныгъэ лэжьыгъэхэр нэIэм щIыдогъэт, къуажэдэсхэм допсалъэ, ухуэныгъэр езыгъэкIуэкIхэр зыпэщIэхуэ лъэпощхьэпохэри зыдогъэцIыху. Апхуэдэ бгъэдыхьэкIэм и фIыгъэкIэ зэхъуэкIыныгъэ зыхуэныкъуэ лъэныкъуэхэр, ныкъусаныгъэхэр игъуэу нэрылъагъу мэхъури, ар зэрызэрагъэзэхуэжыным сэбэп дыхуохъу. ДэркIэ нэхъыщхьэр — фIагъ хэлъу лъэпкъ проектхэр гъэзэщIа хъунращ, — жиIащ щIэплъыкIакIуэ гупым хэт, «Зыуэ щыт Урысей» партым и хэгъуэгу Исполкомым и тхьэмадэ Джамбаев Руслан.
ЩIэплъыкIакIуэ гупым зрагъэлъэгъуащ Адыгэ-Хьэблэ къуажэм и купсэм, «Къэрэшей-Черкесым и илъэс 25» утыкум къыщызэрагъэпэщ зыгъэпсэхупIэ щIыпIэм щекIуэкI лэжьыгъэри. Ар «Городская среда» партпроектым ипкъ иту ягъэзащIэ Iуэхущ. Мы зэманым асфальтыр иралъхьагъыххэу лъэсырызекIуэ лъагъуэм плиткэхэр ирагъэзагъэ. Зэман кIэщIкIэ мыбдеж тетIысхьэпIэхэр, кIэрыхубжьэрыху идзапIэхэр щагъэувынущ, щIыб лампIхэр щыфIалъхьэнущ. Зыгъэхьэзырар БОРЭНЫКЪУЭ Мадинэщ
Больше на Черкес хэку
Подпишитесь, чтобы получать последние записи по электронной почте.
