IуэхуфIхэмкIэ гъэнщIауэ

Ди республикэр бейщ дэIэпыкъуныгъэ хуэныкъуэхэм мылъкукIэ, юридическэкIэ, нэгъуэщI IэмалхэмкIэ зыщIагъэкъуэну хьэзыр цIыху гумызагъэхэмкIэ. Апхуэдэм деж гъерэтыфIэу цIыху щхьэхуэхэм ящхьэпэн щхьэкIэ, зэрыубыдын хуейщ фондхэмрэ мысату организацэхэмрэ.

ЦIыхухэм я хуитыныгъэхэр хъумэным зи Уставыр тещIыхьа псапащIэ фондхэм я лIыкIуэхэр IущIащ Къэрэшей-Черкесым цIыхухэм я хуитыныгъэхэр хъумэнымкIэ и Уполномоченнэ Умалатовэ Заремэ.
ЗэIущIэм хэтащ «Российский детский фонд» Урысейпсо жылагъуэ псапащIэ фондым и Къэрэшей-Черкес хэгъуэгу къудамэм и лIыкIуэхэр: фондым и унафэщI Къул Фэрдаус, фондым и правленэм хэтхэу Агбэ Иннэ, ФызыкIэ Иннэ, медицинэ, педагогическэ, индустриально-технологическэ колледжхэм я волонтерхэу Узденовэ Беллэ, Алботовэ Айсанат, Варичевэ Валерия, Баисов Iэдэм, Лоу Алисэ, «Очаг добра» социальнэ проектым и унафэщI икIи «Самира» псапащIэ организацэм и соучредитель Зэгъэщтокъуэ Мариам, нэгъуэщIхэри.
Умалатовэ Заремэ къытепсэлъыхьащ республикэм цIыхухэм я хуитыныгъэхэмкIэ и Уполномоченнэм и лъэкIыныгъэхэмрэ и пщэрылъхэмрэ, къэрал унафэщI, хабзэхъумэ къулыкъухэм зэрадэлажьэм, цIыхухэм я лъэIухэм зэрыпэджэжым. — Дэ псори дызэлъыкъуегъэувэ цIыхухэм я хуитыныгъэхэр хъумэным дызэрытелажьэм. Дэ тщыщ дэтхэнэри зэрыхузэфIэкIкIэ ядоIэпыкъу щытыкIэ гугъу иувахэм. Дэ жыджэру дыпылъщ цIыхухэм я хуитыныгъэхэм ятеухуа щIэныгъэхэр янэтхьэсыным, икIи ар ди лэжьыгъэм и кIуэрабгъу нэхъыщхьэу къыдолъытэ, — къыхигъэщащ абы. ЗэIущIэм деж зэпсэлъэныгъэхэр екIуэкIащ нэ гъуэщI IуэхухэмкIи. Къул Фэрдаус къызэхуэсахэм къадэгуэшащ «Урысей сабий фонд» псапащIэ фондым щылажьэм зыIэригъыхьа гъащIэ зэхэщIыкIымкIэ, къы теувыIащ зи узыншагъэкIэ дагъуэ зиIэ сабийхэм, мылъку зи мащIэ унагъуэ быныбэхэм, республикэм и социальнэ къулыкъущIапIэхэм щаIыгъ сабийхэм ядэIэпыкъуным хуэунэтIауэ ирагъэкIуэкI федеральнэ, хэгъуэгу акцэхэм.
— Дэ къыдолъытэ псапащIэ Iуэхум щIалэгъуалэр къыхэшапхъэу. Абы къыхэкIыу дэ Къэрэшей-Черкесым гуащIэдэкIымрэ социальнэ зыужьыныгъэмрэкIэ и Министерствэм иригъэкIуэкIа зэпеуэм къыщытхьа грантымкIэ фондым и къэухьхэм иту къызэIутхащ «КъЧР-м и волонтерхэм я еджапIэ». НобэкIэ а еджапIэм щIэсщ медицинэ, педагогическэ, индустриально-технологическэ колледжхэм я студенту, Черкесск къалэм и еджапIэхэм щеджэ сабийуэ 40-м щIигъу. Волонтерхэм я еджапIэр жыджэру мэлажьэ, волонтер нэхъыжьхэм нэхъыщIэхэр ягъасэ.
Студент-волонтерхэр хэтщ фондым и республикэ къудамэм иригъэкIуэкI Iуэху псоми. Гу зэрылъыттэщи, иужьрей илъэсхэм ди студентхэмрэ еджакIуэхэмрэ волонтер лэжьыгъэм нэхъ дихьэх хъуащ Абыхэм я IуэхуфIхэмкIэ щIагъэбыдэ ди фондым и къыхуеджэныгъэр: «IуэхуфIхэр махуэл имыIэу!» Къул Фэрдаус щIэлъэIуащ сабий 17 зэрыс унагъуэшхуэм дэIэпыкъуным хуэунэтIауэ лэжьэнхэу. Унагъуэм иджы дыдэ я анэр яфIэкIуэдащ, абы ис сабийхэр я ныбжькIэ илъэси 2-м къыщегъэжьащ. Абыхэм я щытыкIэ хьэлъэм щыгъуазэ унагъуэхэр дэIэпыкъуэгъу яхуохъу ерыскъыхэкIхэмкIэ, щыгъынхэмкIэ.
Псалъэм и жыIэгъуэкIэ, абыхэм ящыщщ росгвардейцхэр, Росреестрым и щIалэгъуалэ советыр, Чымхэ, КIыщмахуэхэ я унагъуэхэр. «РусГидро» ПАО-м и Къэрэшей-Черкес къудамэм и дэIэпыкъуныгъэкIэ унагъуэм къащэхуащ зэрыжьыщIэ, жьыщIыгъэхэр зэрагъэгъущ машинэшхуэ. Мы унагъуэм дэIэпыкъуну зэрыхьэзырыр къигъэлъэгъуащ Зэгъэщтокъуэ Мариами. — «Очаг добра» организацэм махуэ къэси шхыныгъуэ пщтырхэр яIэрегъыхьэ ди нэIэм щIэт цIыху 50-60-м. Дэ гугъуехь пэщIэхуа унагъуэм запытщIэнщи, абы исхэр шхыныгъуэ пщтырхэмкIэ махуэ къэс къызэдгъэпэщынщ. Дэ ар тхузэфIэкIынущ, — жиIащ абы. ЗэIущIэм икIэм Умалатовэ Заремэ фIыщIэ яхуищIащ псапащIэ, мысату организацэхэм я лIыкIуэхэм, зи узыншагъэкIэ дагъуэ зиIэ сабийхэм, унагъуэ быныбэхэм, социальнэ къулыкъущIапIэхэм зэрадэIэпыкъум папщIэ. Волонтер еджапIэм къыбгъэдэкIыу, Умалатовэ Заремэ къратащ сабий фондым и логотип зытет фэеплъ тыгъэ цIыкIу.
АГБЭ Иннэ