«Кадры» лъэпкъ проектым ипкъ иту «Зи IэщIагъэкIэ нэхъыфI» Урысейпсо зэпеуэр илъэс етIуанэ хъуауэ йокIуэкI. Зэпеуэм и къалэн нэхъыщхьэщ ӏэщӏагъэм хуэӏэкӏуэлъакӏуэхэр къыхэгъэщыныр, ӏэщӏагъэхэм я пщӏэм хэгъэхъуэныр. Зэпеуэм и федеральнэ Iыхьэр бадзэуэгъуэм и 30-м къыщыщӏэдзауэ шыщхьэӏум и 1 пщӏондэ Вологдэ къалэм щекIуэкIынущ. Абы ипэ къихуэу «Повар» унэтIыныгъэмкIэ зэпеуэхэр хэгъуэгухэм щекIуэкIащ.
Ди республикэм а Ӏэщӏагъэмкӏэ нэхъыфӏыр щагъэбелджылащ Черкесск къалэм дэт «Индустрия питания, туризма и сервиса» колледжым. «ПщафIэ нэхъыфI» щIыхьыцIэм щIэбэнащ нэрыбгитху. Абыхэм яхэтащ а IэщIагъэм хуезыгъаджэхэри, зи щхьэ хуэлэжьэж, уней шхапIэхэм щыпщафIэхэри. Зэпеуэм къызэщIрагъэубыдащ теориери практикэ лэжьыгъэри. ӏэмэпсымэхэм, шынагъуэншагъэм, санитарием, технологие картэхэм зэрырилажьэр, ӏэщӏагъэ кейсхэр зэрызэпкърахыр ягъэбелджылащ. Сыхьэтищым къриубыдэу пщафIэхэм шхыныгъуищ ягъэхьэзыращ. Жюрим щхьэхуэу ахэр къапщытэжащ икIи къыхалъытащ пщафIэм бгъэдэлъ IэкIуэлъэкIуагъыр, ерыскъым и ӏэфӏагъыр, гугъуагъыр, бдзэжьейм, джэдылым къыхэщӏыкӏа шхын щӏыӏэм, пщтырым и тыкIэмрэ гъэхьэзырыкIэмрэ.
ПщафIэхэм я зэпэщIэтыныгъэр хуабжьу гугъуу екIуэкIащ. ИкIи къэпщытакIуэхэм яхэта, Къэрэшей-Черкес Республикэм и Кадровэ Купсэм и унафэщI Урчыкъуэ Албий къызэрыхигъэщамкIэ, пщафIэ псоми япэ увыпIэр яхуэбгъэщэ фыну апхуэдэт — дэтхэнэми я IэщIагъэмкIэ зэрынэхъыфIыр зэпеуэм къыщигъэлъэгъуэфащ. «Жылагъуэ шхапӏэм щылажьэ ӏэщӏагъэрылажьэхэм нобэ хэгъуэгум дежкӏэ мыхьэнэшхуэ яӏэщ. Ар епхащ хэгъуэгум гастротуризмэм зегъэужьыным. ИкIи нобэрей зэпеуэр — я зэфӏэкӏхэмкӏэ здызэхъуажэ, ӏэзагъ нэс здыщагъэлъагъуэ утыкуу екIуэкIащ», — къыхигъэщащ Урчыкъуэм. Зэпеуэм япэ увыпIэр къыщихьащ мы колледжым и егъэджакIуэ Эдиевэ Маринэ (сурэтым щыволъагъу). ЕтIуанэ увыпIэри къэзылъэщар мыбдеж щылажьэ егъэджакIуэ Джатэ Луизэщ, ещанэр — зи щхьэ хуэлэжьэж пщафIэ Патчаевэ Абинэщ. Зэхьэзэхуэм щытекIуахэм саугъэтхэмрэ фIыщIэ тхылъхэмрэ хуагъэфэщащ.
АСЛЪЭНЫКЪУЭ Мадинэ
Больше на Черкес хэку
Подпишитесь, чтобы получать последние записи по электронной почте.
