2026 гъэм мазаем и 24-м Хьэбэз къуажэм щыщ Тхьэкъуахъуэ Хъызыр Мэхьмуд и къуэм и ныбжьыр илъэс 90 ирикъуащ. А махуэм Хьэбэз къуажэ поселенэм и администрацэм и Ӏэтащхьэм и къуэдзэ Борсэ И., ӀэщӀагъэрылажьэ нэхъыжь Туаршы Ф. сымэ гуапэу ехъуэхъуащ абы и юбилеймкӀэ икӀи ди нэхъыжьыфӀым хуагъэфэщащ хъуэхъу тхылърэ ахъшэ саугъэтрэ. АбыкӀэ администрацэм и лӀыкӀуэхэм къагъэлъэгъуащ зауэ илъэсхэмрэ зауэ нэужь зэманымрэ Хъызыр ирихьэкӀа гуащӀэм папщӀэ фӀыщӀэ зэрыхуащӀыр. Хъызыр Мэхьмуд и къуэм гъащӀэ кӀыхь, купщӀафӀэ къикӀуащ.
Езым и ныбжьхэм яхуэдэу, гугъуехьхэм пхыкӀащ. Абы и гъащӀэм гуфӀэгъуэри гуауэри зэхэтащ. Тхьэкъуахъуэм и сабиигъуэри, и щӀалэгъуэри зауэ, зауэ нэужь зэманым техуащ. Илъэс 90 ирикъуами, Хъызыр и акъылыр къабзэщ, гъащӀэр фӀыуэ елъагъу. Абы игу къокӀыж и гуащӀэдэкӀ гъащӀэм хыхьа псори: ӀэкӀэ гъавэр хасэу, лэжьыгъэр къыхахыжу, мэкъу еуэу, ар зэщӀакъуэжу, трактор зэрихуэу зэрыщытар.
Абы ерыщагърэ хьэл быдагъэрэ зэрыхэлъар къыдэӀэпыкъуащ гъащӀэм зыпэщӀэхуа гугъуехьхэм пэлъэщыну Хъызыр Мэхьмуд и къуэр и гуащӀэдэкӀ лэжьыгъэм и мызакъуэу, и унагъуэкӀи щапхъэщ. И щхьэгъусэмрэ езымрэ бынитху зэдапӀащ, абыхэм къащӀэхъуащ къуэрылъхуипщӀ, абыхэм сабиибгъу къащӀэхъуэжащ. Нобэ ди нэхъыжьыфӀыр и къуэ нэхъыщӀэ Зунелрэ абы и бынхэмрэ и гъусэу мэпсэу зэгурыӀуэу, хьэщӀэгъафӀэхэу, и Ӏыхьлы гъунэгъухэм я гулъытэрэ я лъагъуныгъэрэ щымыщӀэу.
Хъызыр Мэхьмуд и къуэм дэри дохъуэхъу узыншагъэрэ гукъыдэжрэ иӀэу и щӀэблэм иджыри куэдрэ ящхьэщытыну!
Больше на Черкес хэку
Подпишитесь, чтобы получать последние записи по электронной почте.
