IэпщIэлъапщIагъым и нагъыщэу

Республикэм и экономикэмрэ хъызмэтымрэ я зыужьыныгъэм хэлъхьэныгъэшхуэ хуэзыщIщ «Сатурн» фирмэр. ФIагъ хуабжь зиIэ шэхэгъэкI продукцэхэмкIэ ди республикэм и къэухьым куэд щIащ ар зэрикIрэ. Урысейм и хэгъуэгу 16-м къанэмыщIауэ, продукцэр щызэбграш Абхъазым, Азербайджаным, Къэзахъстаным.

Сыт хуэдэ IуэхущIапIэми, фирмэми къыщIагъэкI продукцэм и фIагъыр — абы щылажьэхэм, зыгъэлажьэхэм я Iуэху бгъэдыхьэкIэм, гуащIэдэкI ехъулIэныгъэхэм зэрелъытар шэчыншэщ. Лэжьыгъэм фIагъ хэзылъхьэщ къызэрыгуэкI лэжьакIуэхэм гулъытэ щагъуэткIэ, щагъэгушхуэкIэ…
Фирмэм и генеральнэ унафэщI, КъЧР-м и ЦIыхубэ ЗэIущIэм (Парламентым) и депутат Хъупсырокъуэ Алий и жэрдэмкIэ, IуэхущIапIэм куэдрэ къыщызэрагъэпэщ IэщIагъэ IэпщIэлъапщIагъыр зыгъэбелджылы зэпеуэ зэхуэмыдэхэр. Апхуэдэхэм япкъ итуи, лэжьакIуэ нэхъыфIхэр, жыджэру лажьэхэр къыхагъэщ, ягъэлъапIэ. Апхуэдэ бгъэдыхьэкIэкIэ лэжьакIуэхэр ягъэгушхуэ къудейкъым, атIэ производствэм и дэтхэнэ лъэныкъуэми щыгъуазэу, продукцэм и фIагъым нэхъри хэгъэхъуэным тегъэчынауэ лэжьэным хущIагъэкъу.
Мы мазэми, «День качества» къэралыбэ махуэм хуэкIуэу, «Сатурн» IуэхущIапIэм щылажьэхэр зэпеуэм хэтащ. ЖыпIэнурамэ, производствэмрэ лабораторэмрэ щылажьэхэм зызэрапщытащ я IэнатIэм нэхъыфIу хэзыщIыкIымкIэ. Ахэр: цех зэхуэмыдэхэм зи гуащIэ щызыгъэтIылъхэщ.
Мазэм къриубыдэу ирагъэкIуэкIа щIэплъыкIыныгъэ лэжьыгъэм ипкъ иту, къыхахащ зи лэжьыгъэм псом нэхърэ нэхъыфIу хэзыщIыкI нэрыбги 10-р. Ахэр финалым зэпрагъэуэжри, «Сатурн»-м и лэжьакIуэ нэхъыфIыр ягъэбелджылащ.
Фирмэм и генеральнэ унафэщIри зэпеуэм и Iыхьэхэр зэрекIуэкIым, абы и къэпщытэжыныгъэм хэ-плъащ, и лэжьакIуэхэм ябгъэдэлъ щIэныгъэр зригъэлъэгъуащ.
Апхуэдэу, япэ увыпIэр къэзыхьар, икIи «Лаборант» нэхъыфI цIэр къэзылъэщар Жьакуэ къуажэм щыщ Мэшэжь Иринэщ. Ар фирмэм зэрыIухьэрэ илъэсым щIигъуа къудейщ. Абы ипэкIэ, илъэс 20-м нэскIэ химиемрэ биологиемрэкIэ егъэджакIуэ IэнатIэм пэрытащ. Апхуэдэ гъащIэ зэхъуэкIыныгъэхэм къримыгъэкIуэту, зыпэрыува IэнатIэщIэм и ехъулIэныгъэр зыIэригъэхьэфащ.
Иринэ къыхегъэщ IуэхущIапIэм деж лэжьакIуэм гулъытэ ин къызэрыхуащIыр, зэрагъэгушхуэр, улахуэ къалэжьым къыпэкIуэу, езыхэми я лэжьыгъэм ирахьэлIэ гуащIэм нэхъри зэрыхагъахъуэр.
ЖыIэпхъэщи, Иринэ хуэдэу, IэнатIэ зэхуэмыдэхэр ягъэзащIэу мы фирмэм нэрыбгэ 500-м зэрынэхьэс щолажьэ. Апхуэдиз цIыхум я унагъуэ япIыжынымкIэ, псэунымкIэ я дэIэпыкъуэгъу къызэрымыкIуэщ «Сатурн»-р.
Зи гуащIэр, зи ехъулIэныгъэхэр здынэса лъагапIэхэм къыщымыувыIэхэм ящыщщ мы фирмэр. Зэпы-мыууэ я лэжьыгъэм ирагъэфIакIуэ, ипэкIэ ягъэкIуатэ. А псоми къыдокIуэ дэтхэнэ и лэжьакIуэми пщIэ зэрыхуащIыр, гулъытэ нэхъуса зэрырагъэгъуэтыр.
Тхьэм нэхъри иригъэфIакIуэ, зи лэжьыгъэкIэ республикэр зыгъэбжьыфIэ IуэхущIапIэ лъэрыхьыр!
АСЛЪЭНЫКЪУЭ Мадинэ