ХыхьэхэкIым къыщыхэщу

Дыгъэгъазэм и 2-м, КъЧР-м и Правительствэм и Унэм щагъэлъэпIащ хыхьэхэкI цIыкIумрэ ику итымрэ зи гуащIэ щызыгъэтIылъ, ехъулIэныгъэфIхэр зиIэ хьэрычэтырылажьэхэр. Iуэху гуапэм хэтащ Министерствэ зэхуэмыдэхэм, «Зыуэ щыт Урысей» партым, республикэм и ЦIыхубэ ЗэIущIэм къабгъэдэкIа лIыкIуэхэмрэ пшыхьыр зыхуэгъэзахэмрэ.

— 2008 гъэм щегъэжьауэ накъыгъэм и 26-м илъэс къэс ягъэлъапIэ урысей хьэрычэтыщIэхэм я IэщIагъэ махуэщIыр. Къэрэшей-Черкес Республикэми и мащIэкъым мы къудамэм щылажьэр икIи дэтхэнэми и гуащIэм хуэфащэу и цIэр гъэIуным, и щIыхьыр Iэтыным хуэунэтIауэ мызэ-мытIэу зэIущIэхэр едгъэкIуэкIащ. Иджырейр «Декада предпринимательства» зи фIэщыгъэцIэу щыта Iуэхухэм я иужьрейщ. ЩIыхь на гъыщэхэр яхуэдгъэфэщэнущ хьэрычэтым щылажьэхэми, абыхэм я Iуэху псори зэкIуэлIэж, лэжьыгъэр зыдагъэкIуатэ, властым хэт къулыкъущIэ зыбжанэми, — жиIащ декадэр егъэкIуэкIыныр зи жэрдэм Жылагъуэ советым и пашэ, ЦIыхубэ ЗэIущIэм (Парла ментым) и депутат, экономикэмрэ хьэрычэтымрэкIэ Комитетым и тхьэмадэм и къуэдзэ, «Зыуэ щыт Урысей» партым и «Выбирай своё» проектым и унэтIакIуэ Гуэнэ Игорь.

— ХьэрычэтыщIэхэм IэщIагъэ зэфIэкIышхуэ зэвгъэгъуэтауэ фи Махуэм фекIуэлIащ. СВО-р щекIуэкI пIалъэ хьэлъэм фи дэIэпыкъуныгъэр къызэрымыкIуэу игъуэщ. ФIыщIэ псалъэхэр фхуэфащэщ. Тхьэм фигъэпсэу фи Iэгу ущIахэм, жумартхэм папщIэ! ДяпэкIи дызэгъусэу Iуэху куэд зетхьэнущ! — жиIащ экономикэ политикэмрэ хыхьэхэкIымрэкIэ Комитетым и тхьэмадэ Ганшин Алексей.

«Зыуэ щыт Урысей» партым къыбгъэдэкIыу къэпсэлъа Къардэн Фатимэ къыхигъэщащ хьэрычэтым зы щIэгъэкъуэнымкIэ хабзэ акт 200-м нэс СВО-р къызэрежьэрэ партым и жэрдэму зэрылажьэр. А псоми Правительствэр, Жылагъуэ Советыр, властыр зэрытелажьэр жиIащ. — Япэрауэ, къыхэзгъэщыну сыхуейщ хьэрычэтырылажьэхэм ядгъэгъуэт гулъытэм, мы къекIуэкI Iуэхухэм я жэрдэмщIакIуэ Гуэнэ Игорь, ар зи пашэ Жылагъуэ Советым ирагъэкIуэкI, фIыщIэ зыхуэфащэ лэжьыгъэ иныр. Жылагъуэ советыр нобэ къаруушхуэ зиIэ зэгухьэныгъэщ.

Абы къыкъуэтщ властри, хьэрычэтри. Республикэм кърихьэжьэ, иригъэкIуэкI Iуэху псоми зи гуащIэрэ зи Iыхьэрэ хэзылъхьэ хьэрычэтыщIэхэм ядгъэгъуэт гулъытэ мащIэщ нобэрей пшыхьыр, абы хуэ дэхэр. ИкъукIэ гуапэщ республикэм и хьэрычэт къудамэм зэрызиужьыр. НобэкIэ хыхьэхэкI цIыкIуу, ику итым хуэдэу республикэм щыщIэтхащ мин 15-м щIигъу. Иужьрей илъэситхум къриубыдэу хьэрычэтым процент 35-кIэ хэхъуащ.

Гуапэ мэхъу хьэрычэтыщIэхэм къэралым къыщекIуэкI Iуэхухэр, политикэр къагурыIуэу, нэхъри зызэщIакъузауэ, дэIэпыкъуэгъурэ щIэгъэкъуэнрэ хъууэ зэрылажьэр. Псори зы къарууэ дызэкъуэту УФ-м и Президентым къытхуигъэув къалэнхэр дгъэзэщIэным дыхуэпабгъэн хуейщ икIи а къалэнхэм дыпэлъэщынымкIэ хьэрычэтым куэд дыдэ елъытащ, — жиIащ КъЧР-м экономикэ зыужьыныгъэмкIэ и министр Езауэ Артур.

Пшыхьыр зытеухуауэ щыта хьэрычэтырылажьэхэм хуагъэфэща хъуэхъу, фIыщIэ псалъэхэм щIагъужащ республикэм и ЦIыхубэ ЗэIущIэм, Президиумым, экономикэ зыужьыныгъэмкIэ Министерствэм, Жылагъуэ Советым къабгъэдэкIа ЩIыхь тхылъхэр. Мы гъэм япэу утыку кърахьащ икIи зыбжанэм хуагъэфэщащ хыхьэхэкI цIыкIумрэ ику итымрэ я щIыхь бгъэхэIур. Удз гъэгъа Iэрамэхэр, гукъинэж сурэтхэр пшыхьым и гуIэфIтещIэж гуапэ хъуащ.

ТУАРШЫ Ирэ