Урысейм и вице-премьер Хуснуллин Марат лэжьыгъэ ӀуэхукӀэ Къэрэшей-Черкесым къеблэгъащ. Ди республикэм и Ӏэтащхьэмрэ УФ-м и вице-премьерымрэ зэӀущӀэ зэдрагъэкӀуэкӀащ. Ахэр тепсэлъыхьащ ди хэгъуэгум и социально-экономикэ зыужьыныгъэм.
Темрезов Рэшид УФ-м и вице-премьерым и пащхьэ ирилъхьащ мыхьэнэшхуэ зиӀэ псэупӀэ инфраструктурэм и проектышхуитӀыр — «Северный», «Спутник» микрорайонхэр. Ахэр хуэунэтӀащ цӀыху мин пщӀы бжыгъэм я тыншыгъуэм: зэманым тегъэпсыхьа социальнэ инфраструктурэр, гъуэгухэмрэ инженер коммуникацэхэмрэкӀэ къызэгъэпэщащ. «Северный» микрорайоным 2012 гъэм щегъэжьауэ зрагъэужь.
Абдеж щаухуагъэххэщ метр зэбгъузэнатӀэ мин 70 къызэщӀэзыубыдэ псэупӀэ, еджапӀэхэмрэ сабий ӀыгъыпӀэхэмрэ, поликлиникэмрэ онкологие диспансерымрэ, агропромышленнэ паркыр щаухуащ. ИджыкӀэ «Сейсмика» программэмкӀэ псэупӀитхум я ухуэныгъэр жыджэру йокӀуэкӀ. «Спутник» микрорайоным 2021 гъэм елэжьын щӀадзащ. Абдеж псэупӀэу къыщызэрагъэпэщыр цӀыху мин 35-м ятещӀыхьащ. Гектар 200-м щӀигъу щӀыпӀэм метр зэбгъузэнатӀэ мин 570-м нэс къызэщӀэзыубыдэ псэупӀэ, еджапӀэхэр, сабий садхэр ящӀынущ. Иджыпсту абы гъуэгухэр, инженер инфраструктурэр ирашалӀэ. А проектхэр зэрекӀуэкӀым, къэрал дэӀэ пыкъуныгъэу къаӀэрыхьэм Темрезов Рэшидрэ Хуснуллин Маратрэ тепсэлъыхьащ. «Зэрыщыту къапщтэмэ, Къэрэшей-Черкесым мыӀейуэ зеужь.
ПсэупӀэхэмкӀэ нэгъабэ нэхърэ процент 12-кӀэ нэхъыбэу проектыщӀэхэр къызэщӀрагъэубыдащ. МыпсэупӀэ ухуэныгъэхэмкӀэ къагъэсэбэпыр проценти 107-м щӀегъу. Ахэр гъэлъэгъуэныгъэфӀщ. Апхуэдэу щытми, псэупӀэхэр ухуэнымкӀэ лэжьыгъэр нэхъри щӀэгъэхуэбжьэн хуейщ. Гъуэгухэм яхьэлIа лэжьыгъэми ехъулӀэныгъэ щыӀэщ: къалэ агломерацэхэм я гъуэгухэм я процент 87,85-рэ мардэм тетщ», — жиӀащ вице-премьерым.
Зэпсэлъэныгъэ нэужьым, Хуснуллин Марат микрорайоныщӀэхэм зыщиплъыхьащ, зригъэлъэгъуащ ухуэныгъэ лэжьыгъэхэр зэрекӀуэкӀыр, инфраструктурэр зэрырагъэфӀакӀуэр. ИужькӀэ ар щыхьэщӀащ сабий, щӀалэгъуалэ зэчиифӀэхэр къыщӀэгъэщынымрэ абыхэм ядэӀэпыкъунымрэкӀэ «Спутник» купсэм. Абдеж хьэщIэхэм къаплъыхьащ музей комплексыр, шахмат джэгупӀэр, щыӀащ «IT-КУБ. КЧР» цифровой егъэджэныгъэмкӀэ купсэм. Робототехникэм елэжь инженер ныбжьыщӀэхэм хьэщӀэхэм кърагъэлъэгъуащ я проектхэр.
Больше на Черкес хэку
Подпишитесь, чтобы получать последние записи по электронной почте.
