Хэгъуэгум и социально-экономическэ зыужьыныгъэм

ЧАЙКА Юрий и пашэу екIуэкIа зэIущIэ убгъуам щхьэихауэ щытепсэлъыхьащ мазиблым къриубыдэу хэгъуэгум игъуэта социально-экономическэ зыужьыныгъэм, адэкIи республикэм игъэзэщIэну Iуэхухэм. ЗэIущIэм хэтащ КъЧР-м и Iэтащхьэ Темрезов Рэшид, власть къулыкъухэм я унафэщIхэр. Зэпсэлъэныгъэм къриубыдэу къаIэтащ отрасль зэхуэмыдэхэм лъэ быдэкIэ зэрызаужьым, цIыхухэр лэжьапIэ IэнатIэкIэ къызэрызэрагъэпэщым, СВО-м щыIэ къулыкъущIэхэм зэрызыщIагъакъуэм, нэгъуэщI лъэныкъуэгъазэхэми теухуа упщIэхэр.

Чайка Юрий къызэрыхигъэщамкIэ, ныбжьэгъугъэкIэ къыткъуэмыт къэралхэм къабгъэдэкI текъузэныгъэхэм зэрыщамыгъэтми, санкцэ пыбзыкIыныгъэхэм ямылъытауи, Къэрэшей-Черкес Республикэм иIыгъщ фIагъ зыхэлъ щытыкIэ, отрасль нэхъыщхьэхэм я лъэныкъуэкIэ. Псалъэм и жыIэгъуэкIэ, щIым щIэлъ хъугъуэфIыгъуэхэр къыщIэхыным, электрокъарукIэ, коммунальнэ пкъыгъуэхэмкIэ зэхуригъэкъуным, нэгъуэщI отраслхэмкIи нэгъабэрей гъэлъэгъуэныгъэхэм щхьэпрытхуащ. Мэкъумэш хъызмэтым и продукцэм и производствэ гъэлъэгъуэныгъэр, илъэсым и пэщIэдзэм елъытауэ, ефIэкIуащ, былымхъуныгъэм епха лъэныкъуэгъазэ зэмылIэужьыгъуэхэри абы хэту. Арами, полпредым тегъэчынауэ къыхигъэщащ зерновой гъавэр зэщIэкъуэжыным, бжьыхьэ Iухыжыгъуэ кампанием мэкъумэш хъызмэтым телажьэхэм защIэгъэкъуэным гулъытэ нэхъыщхьэр ирагъэгъуэтыпхъэу.

«ЗыIэрыдгъыхьа бгъэдыхьэкIэхэр дымыгъэкIуэдын папщIэ, мыхьэнэ хэха иIэщ мылъку нэхъыщхьэм инвестицэ къешэлIэным. Ар комплекснэ гъэлъэгъуэныгъэщ, икIи абы республикэм щыпсэу цIыху къэс хэлъхьэныгъэ хуищIыпхъэщ. Iэмал имыIэу къэтщтэн хуейщ зичэзу комплекснэ Iэмалхэр, хыхьэхэкIырыла жьэхэм я жэрдэмхэр ядэIыгъынымрэ защIэгъэкъуэнымрэ хуэгъэзауэ, абыхэм я хыхьэхэкI Iуэхухэр зегъэкIуэныр нэхъ тынш щIыным, бюрократическэ лъэпощхьэпохэр, къекуэдэкI зегъэкIуэныгъэхэр IудгъэкIуэткIэрэ», — зэIущIэм хэтахэр къыхуриджащ полпредым. КъыщIигъужащ къэралым и хэгъуэгухэм къалэн къазэрыхуэувыр къэгъэщIыныгъэ Iуэхухэм СВО-м и къулыкъущIэхэр къыхэшэнымкIэ, хэгъэлэжьыхьынымкIэ. «ЩытыкIэ хьэлъэхэм деж жэуаплыгъэ зэрахьыфыр ягъэщыпкъэжкIэрэ, СВО-м и къулыкъущIэхэм ябгъэдэлъщ управленческэ Iуэху зэхэщIыкI телъыджащэ, жылагъуэр зыхуэныкъуэм ехьэлIауэ. Абыхэм яхэлъ псэ къарум, хэкупсагъэм зэфIэкI инхэр къагъэщIынущ экономикэмрэ социальнэ гъащIэмрэ егъэфIэкIуэным, зэхъуэкIыныгъэфIхэр къэгъэхъуным хуэгъэзауэ», — къыхигъэщащ Чайка Юрий. Къэрэшей-Черкесым а лэжьыгъэр бгъуфIэу ирегъэкIуэкI «Защитники Отечества» Фондым щIыгъуу.

АтIэ, СВО-м и ветеран бжыгъэм нобэкIэ республикэм и власть къулыкъухэм IэнатIэ лъагэхэр щагъэзащIэ. Хэгъуэгум къыщызэрагъэпэщ федеральнэ, хэгъуэгу дэIэпыкъуныгъэхэр, гуащIафIэу щолажьэ «Зыуэ щыт штаб», къулыкъущIэхэмрэ абыхэм я унагъуэхэмрэ защIэгъэкъуэным хуэунэтIауэ. УпщIэ къэс и нэIэм щIэт республикэм и лIыщхьэм. «Урысейм и Правительствэмрэ УФ-м и Президентым и полномочнэ лIыкIуэу СКФО-м щыIэм и Аппаратым и лэжьакIуэхэмрэ пыщIэныгъэ куу ядэтIыгъыу зэдэдлэжь Iуэхухэм гуащIафIэу, купщIэ хэлъу пыдощэ. Ахэр зыхуэунэтIар ди республикэм дяпэкIэ и зыужьыныгъэращ. НобэкIэ ди къалэн пажэу къэувыр республикэм щыпсэухэм я пащхьэ щытхь социальнэ жэуаплыгъэхэр, УФ-м и Президентым и унафэхэр, полномочнэ лIыкIуэм къытхуищIа пщэрылъхэр Iэмал имыIэу дгъэзэщIэнращ», — къыщIигъужащ КъЧР-м и лIыщхьэм