КъЧР-м и МВД-м административнэ хабзэ зэхэтыкIэр къэгъэсэбэпыныр къызэзыгъэпэщ и къудамэм и лэжьакIуэхэм никотин зыхэлъ, «снюс» жыхуиIэ ирамыф джырышкIийхэкIыр Черкесск дэт киоскым хабзэншэу щызыщэхэр къызэтрагъэувыIащ. Полицэм и лэжьакIуэхэм хабзэкъутэныгъэ къэзыгъэхъуа сатуущIэм административнэ протокол хуатхащ УФ-м и КоАП-м и 14,54-нэ статьям и етIуанэ IыхьэмкIэ. А статьям къихьыр аращи, лей зылэжьам сом мини 150-200-м къриубыдэу административнэ тезыр тралъхьэну хуитщ.
Киоскым хабзэншэу щащэу къагъуэта джырышкIийхэкIыр зейм къытрахри ягъэкIуэдащ. Хабзэхъумэ къулыкъухэм адэкIи пащэнущ рейдхэмрэ щIэплъыкIыныгъэхэмрэ егъэкIуэкIыным, снюсымрэ нэгъуэщI афиянхэкI пкъыгъуэхэмрэ республикэм ирагъэкъэбзыкIын папщIэ. Апхуэдэ дауэдапщэхэр зыхуэгъэпсар ди хэкуэгъухэм я узыншагъэр зэпIэзэрыту къызэтегъэнэнращ, псом хуэмыдэу — балигъыпIэ имыувахэр никотиным димыхьэхыу хъумэнращ.
Iэпашхэлъэпашхэхэм фахуэсакъ!
Республикэ къалащхьэм щыщ, илъэс 38-рэ ныбжьым ит бзылъхугъэм сом мин 700 зи уасэ дыщэхэкI пкъыгъуэхэр и ныбжьэгъум и унэм къыщIидыгъукIащ. Ар, къыщыщIам иригузавэу, УФ-м и МВД-м Черкесск щиIэ къудамэм екIуалIэу иджыблагъэ щытхьэусыхэм, жиIащ имынэIуасэ гуэрым и пэшым щIэт сырэм дэлъа хьэпшып лъапIэхэр зэрыфIидыгъуар. КъЧР-м и МВД-м и уголовнэ лъыхъуэныгъэ къудамэм и лэжьакIуэхэм ирагъэкIуэкIа дауэдапщэхэм къагъэлъэгъуащ ар мылъку зыфIэкIуэда бзылъхугъэм и ныбжьэгъуу, илъэс 27-рэ зи ныбжьу зэрыщытыр.
ЩIэпхъаджащIэр къагъуэтри полицэм и къудамэм ирашэлIащ икIи зыкърагъэумысыжащ 2024 гъэм и дыгъэгъазэ мазэм щыщIэдзауэ 2025 гъэм жэпуэгъуэм и 23-м пщIондэ ар дыгъуэурэ къызэрекIуэкIар. Хьэпшыпу зыIэригъыхьам и ныкъуэр пуду ищэри, ахъшэр къигъэщхьэпащ, имыщэфар къулыкъущIэхэм игъуэу къытрахащ.
КъЧР-м и МВД-м и пресс-къулыкъу
Больше на Черкес хэку
Подпишитесь, чтобы получать последние записи по электронной почте.
