Гъунапкъэхъумэхэр

ФСБ-м Къэрэшей-Черкес Республикэм щиІэ гъунапкъэхъумэ Управленэм мазаем и 17-м къекІуэлІащ зи къулыкъу щІэгъуэ нэсауэ ираджа зауэлІ къулыкъущІэхэр. ЖыІэпхъэщи, Къэрэшей-Черкес гъунапкъэхъумэ Управленэм къулыкъу щезыхьэкІыну къекІуэлІа етІуанэ гупщ мыр. Япэ гупыр нэгъабэ жэпуэгъуэ мазэм къеблэгъауэ щытащ.

— Нобэ фи гъащІэм щыщ лъэбакъуэщІэ фчынущ — зауэлІ къулыкъум фыхыхьэнущ. Шэч къытесхьэкъым, учебкэхэм нэхъри зыщыфпсыхьащ икІи вджар, зызыхуэвгъэсар иджы къыфщхьэпэжынущ. Фи адэхэм адэжьхэм яхуэдэу, пщІэрэ щІыхьрэ пылъу фи къулыкъур ефхьэкІ. Абыхэм яхэлъа лІыгъэм, гуеигъэм, Хэкум хуаІа икърарым папщІэ къэрал, зауэлІ нагъыщэ, дамыгъэ мащІэкъым къалъэщар. ЗауэлІ къулыкъущІэ лъапІэхэ! Фи хэкупсагъэр, граждан зэхэщІыкІ лъагэр, хьэлщэн щыпкъэр къыфщхьэпэнущ фи конституцэ къалэныр щІыхь пылъу вгъэзэщІэнымкІэ.

Узыншагъэ быдэ, къэмыланджэ фІэщхъуныгъэ, ехъулІэныгъэщІэхэр, къулыкъу тынш — а псомкІи сывохъуэхъу! — зауэлІ къулыкъущІэ гупым захуигъазэу жиІащ КъЧР-м и гъунапкъэхъумэ Управленэм и унафэщІ, генерал-майор Самороков Андрей. Гупым захуигъэзащ гъунапкъэхъумэ къулыкъум и ветеран Байрамуков Рэшид икІи яхъуэхъуащ я къулыкъур бэІутІэІуншэу, узыншэу ирахьэкІыну, щІыхь пылъу къэралым, жылагъуэм къулыкъу хуащІэну. ЩІэблэщІэм къыбгъэдэкІыу зауэлІкъулыкъущІэхэм яхуэзащ Черкесск къалэм егъэджэныгъэмкІэ и купсэм, зи №11-м и еджакІуэхэр, «Юные друзья пограничников» гупым хэтхэр. — Фи къулыкъур къалэн къудейкъым, атІэ, икІи щІыхьщ! Ар къэралым, лъэпкъ куэду зэхэт цІыхубэм и пащхьэм щыфхь жэуаплыгъэ инщ.

Дэ, щІэблэщІэмкІэ, фэ — гъэсэныгъэм, бэшэчагъым, лІыгъэм фрищапхъэщ. Шэч лъэпкъ къытетхьэкъым фи зэхэщІыкІ лъагэм къыпэкІуэу лъэпощхьэпо, гугъуехь псори гъащІэм деж къызэрызэвнэкІыфынум, абыхэм фазэрыпэлъэщынум. Хэкур хъумэным нэхъ щІыхь зыпылъ ІэщІагъэ щыІэкъым. Дывохъуэхъу ди гъунапкъэхъумэ «унагъуэшхуэм» и зы Іыхьэ нобэ фызэрыхъуам и щІыхькІэ! — жиІащ еджакІуэ Кузьмичёв Матвей. АдэкІэ зауэлІ къулыкъущІэхэр щхьэж и къулыкъур здрихьэкІыну щІыпІэхэм яунэтІынущ. Сэлэтхэм я къулыкъур къызыхуэтыншэу ирахьэкІынымкІэ щытыкІэ псори къыхузэрагъэпэщащ. Апхуэдэщи, яІэнущ жеипІэ пэшхэр, абыхэм хэтщ санитар-къабзагъэ зехьэпІэхэр. Кабинетхэр зэтегъэпсыхьащ проекторхэмкІэ, стендхэмкІэ. Зыгъэпсэхугъуэ зэманри гъэщІэгъуэну здагъэкІуэн плІанэпэхэр щыІэщ. ШхапІэхэр сэлэтхэм къапоплъэ ерыскъы пщтыркІэ, къэуатыфІэкІэ.

Гъунапкъэхъумэ Управленэм и подразделенэхэм спортзалхэр, спорт зыпсыхьыпІэ утыкухэр, музей бейхэр яІэщ. Псори хуэгъэщІащ щІалэхэм я къулыкъур тыншу ирахьэкІыным, «сэлэт щІэныгъэщІэр» щызу зыІэрагъэхьэным.