Гум имыхур мылIэжыныпсэщ

Хьэбэз районым щыщ лIыхъужь мымащIэ СВО-р къызэрежьэрэ зауэлIу дэкIащ зэхэуэхэр здекIуэкI щIыпIэхэм. Абыхэм дэтхэнэми дрогушхуэ, ахэр тфIэлIыхъужьщ, сыту жыпIэмэ, унэ хуабэр къэбгъанэу зауэм уIухьэныр Iуэху тыншкъым, псэкъару мыкIуэщI зыпылъщ. Апхуэдэу дэкIа ди лъэпкъэгъухэм я хъыбархэр куэду къытIэрохьэ: хахуагъэ зэрахьэхэр, я псэемыблэжыныгъэр, я хьэл быдэр…

Арами, жагъуэ зэрыхъущи, зауэр ажалым и блыгущIэтщи, хухэгъэщIыр хегъэщI, еш имыIэу. Апхуэдэ ди зы лIы хахуэщ накъыгъэм и 7-м Беслъэней къуажэм дэт курыт еджапIэм хуабагъэкIэ гъэнщIа фэеплъ Iуэхугъуэ – еджакIуэ цIыкIухэр зыпэрысыну «ЛIыхъужьым и партэр» къызэIухыныр – къызыхузэрагъэпэщауэ щытар. Ар СВО-р къыщежьэм зауэм пэрыхьауэ щыта ДыщэкI Руслан Едыдж (Эдик) и къуэращ. Руслан 1984 гъэм щIышылэм и 14-м Беслъэней къуажэм къыщыхъуауэ щытащ. Курыт еджапIэри абдеж къыщиухри, илъэс 18 щрикъум, дзэм къулыкъу щищIэну дэкIащ. И къулыкъур зауэ-хьэуа дзэхэм щрихьэкIащ икIи абы щыIэху парашюткIэ 10 къелъащ, танкыр зэрихуэуи щытащ. Къулыкъур къыщызэринэкIым, абы и къуажэ къигъэзэжри, лэжьэн щIидзащ. 2007 гъэм унагъуэ иухуащ икIи и щхьэгъусэмрэ езымрэ сабиих зэдагъуэтащ.

Руслан и адэ-анэр пасэу зэрыщхьэщыкIам къыхэкIыу езымрэ и къуэш нэхъыжь Аслъэнрэ (ари СВО-м лIыхъужьыгъэ зэрихьэу хэкIуэдащ) я гъащIэр езыхэм зэрагъэпсым хуэдэу зэрыщытыныр ящIэу къыдэкIуэтеящ. Руслан и къуэшым и мура дыр къызэрыхуимыдэнур ищIэти, абы иримыгъащIэу контракт итхри, зауэ операцэ хэхам хыхьауэ щытащ. Адыгэ щIалэр хахуагъэрэ лIыхъужьыгъэрэ къигъэлъагъуэу зауэм хэтащ. Жагъуэ зэрыхъущи, и зауэ къалэнхэр игъэзащIэу абы 2024 гъэм и накъыгъэ мазэу и дунейр ихъуэжащ… Беслъэней курыт еджапIэм щекIуэкIа дауэдапщэм къекIуэлIащ къуажэ администрацэм и Iэтащхьэ Тхьэгъэпсэу Гарри, къуажэм и нэхъыжьхэм я Советым хэтхэр, еджапIэм и унафэщI ХъытIу Ибрэхьим, лIыхъужьым и Iыхьлыхэр, и унагъуэр, и ныбжьэгъухэр, егъэджакIуэхэмрэ еджакIуэхэмрэ. Руслан и адэкъуэш ДыщэкI Назир фIыщIэ яхуищIащ дауэдапщэр къызэгъэпэщыныр, зауэлIым и цIэр фэеплъ мыужьыхыу къуажэм и тхыдэм къыхэнэныр гукъэкI зыщIа дэтхэнэми.

Тхьэгъэпсэу Гарри жиIащ Руслан зыхэкIуэда зауэр зэрыгуащIэр, абы ди щIалэ куэд зэрихьар. — Апхуэдэ зауэ ди нобэм къежьэну дигу къэкIтэкъым. Абы и гуащIэгъуэ дыдэм хэхуащ Руслан. Мы щIалэм апхуэдэ лIыгъэ къылъыкъуэкIыну хэт ищIэнт мамыр гъащIэм дыхэпсэукIти, ауэ зауэм хэт сыт и уасэми къетIэщI. Русланщи, езым псэкъару мыкIуэщI хэлъу къыщIэкIащ, абы къинэмыщIауэ, ирагъэгъуэта гъэсэныгъэми куэд елъытауэ къыщIэкIынт, — жиIащ къуажэ Iэтащхьэм. КъинэмыщIауэ, Тхьэгъэпсэум къыхигъэщащ «ЛIыхъужьым и партэ» Iуэхугъуэм мыхьэнэшхуэ зэриIэр: лIыхъужьым и фэеплъыр зэрихъумэр, ар къыдэкIуэтей щIэблэм щапхъэгъэлъагъуэ зэрахуэхъур. Iэтащхьэм жиIащ къуажэм дэсым псоми апхуэ дэ хэщIыныгъэр ягу къызэреуар.

Курыт еджапIэм и унафэщI ХъытIу Ибрэхьим и къэпсэлъэныгъэм къыщыхигъэщащ «ЛIыхъужьым и партэ» хэкупсэ Iуэхугъуэр Хэку зауэшхуэм хэта ди лIыхъужьхэм я цIэкIэ къежьауэ щытами, иджы ди нобэм хэпсэукI зауэлI хахуэхэм я фэеплъуи партэхэр зэраухуэр. — НэгъуэщIу жыпIэмэ, лIыхъужьхэр ди гъунэгъу дыдэ хъуащ: ахэр доцIыху, ди гъунэгъущ, ди Iыхьлыщ, ди ныбжьэгъущ. Руслан и Iыхьлыхэми, зэрылъэпкъыуи сыхуейщ мыпхуэдэ хэщIыныгъэ дымылъагъужыну. Ди мамыр гъащIэм папщIэ зи псэ зыта дэтхэнэ зауэлIми Тхьэр нэхъыфIу щыIэмкIэ къыхуреупсэ! — жиIащ унафэщIым. ДыщэкI Руслан и фэеплъу «ЛIыхъужьым и партэ»-р къызэIуахыну хуагъэфэщащ курыт еджапIэм и унафэщI Хъыту Ибрэхьимрэ и адэкъуэш ДыщэкI Назиррэ. Къыхэгъэщыпхъэщи, мы фэеплъ дауэдапщэм я псэ халъхьащ еджапIэм щеджэ ныбжьыщIэ цIыкIухэмрэ абыхэм я гъэсакIуэхэмрэ.

Абыхэм «Журавли» уэрэд гущIыхьэр жаIащ, къафэкIи къагъэлъэгъуащ, усэхэм къеджащ, зауэлIым пщIэ хуащIу и фэеплъым шэху уэздыгъэхэр щыпагъэнащ, удз гъэгъахэр тралъхьащ. Абы гу лъитащ Руслан и шыпхъу Жанни. — Фи ныбжьым емылъытауэ сабийхэм хуабжьу ди гум Iэ дэфлъащ. ДыщэкIхэ лъэпкъым къытхуэвмыщIа щыIэкъым. Дауэдапщэр къызэзыгъэпэщахэращи — къэралым и тхыдэм ди Руслан и цIэр зэи мыужьыхыну хэфтхащи, дэтхэнэми тхьэгъэпсэу вжызоIэ! Пэжщ, ди гуауэр ужьыхакъым. Ди лъэпкъ мыиным зэуэ зэкъуэшитIри – Аслъэни Руслани – хэкIуэдыкIащ. Ауэ нобэ мыбдеж къекIуэлIа псори ди гуауэр къыддэвгуэшыну фыкъэкIуащи, Тхьэм фигъэпсэу! Тхьэм псори мамыр гъащIэм икIэщIыпIэкIэ дыхуишэ! Нобэ СВО-м щыIэ дэтхэнэ ди зауэлIри узыншэу я унагъуэхэм яхигъэхьэж! — жиIащ Руслан и шыпхъум.

ДыщэкI Руслан хуэдэ щIалэ хахуэхэр, шынэрэ къэрабгъагъэрэ зи гум имылъхэр, псэ къару мыкIуэщI зиIэхэр дэтхэнэ зыми щапхъэ зытетхыпхъэхэщ. ИкIи мы псалъэхэм я щыхьэтщ Руслан къыхуагъэфэща ЛIыхъужьыгъэм и орденыр (дунейм ехыжа нэужь).