ЦIыхур лэжьапIэ щыкIуэкIэ е къыщыкIуэжкIэ, къылъыс дэтхэнэ фэбжьри производствэм епхауэ къызэрамылъытэр фщIэрэ? АтIэ ар зэхэдывгъэгъэкI. АбыкIэ диIэ упщIэхэм аргуэру жэуап къаритынущ КъэрэшейЧеркесым и Къэрал гуащIэдэкI инспекцэм и унафэщIым и пщэрылъхэр пIалъэкIэ зыхь БИДЖИЕВ Руслан.
— Сыт щыгъуэ фэбжьыр производствэм епхауэ къыщалъытэр?
1. Къулыкъу транспортым уису лэжьапIэ ущыкIуэм зэжьэхэуэныгъэм ухэхуамэ. Псалъэм и жыIэгъуэкIэ, къулыкъу автобусым лэжьапIэм ущишэм деж. 2. Уи машинэм уису къулыкъу IуэхукIэ ущызекIуэкIэ.
Псалъэм къыдэкIуэу, уи автомобилыр гуащIэдэкI зэгурыIуэныгъэм къызэрыщыгъэлъэгъуам хуэдэу къыщыбгъэсэбэпкIэ. Щапхъэ къэтхьынщи, дэфтэрхэр уи автомобилымкIэ хьэкълыкъ къулыкъум щыпшэкIэ, мыхъумыщIагъэ ухэхуэмэ. 3. ЛэжьапIэтым къыпхуищIа пщэрылъыр щыбгъэзащIэкIэ. Лъэсу е жылагъуэ транспортымкIэ уи унафэщIым къыпхуищIа пщэрылъыр щыбгъэзащIэм фэбжь хэпхамэ. 4. Командировкэ ущыщыIэм. Командировкэ ущыкIуэм е укъыщыкIуэжым мыхъумыщIагъэ гуэр къохъулIамэ.
— Сыт щыгъуэ фэбжьыр производствэм емыпхауэ къыщалъытэр? 1. КъызэрыкIуэ фэбжьыр. Псалъэм и жыIэгъуэкIэ, лэжьапIэ уздэкIуэм гъуэгум ущыцIантхъуэрэ уджэламэ, ар производствэм епхауэ къалъытэкъым. 2. Уи уней Iуэхухэр щыбгъэзащIэм. Псалъэм папщIэ, лэжьапIэм уздэкIуэм, тучаным ущыщIыхьэм е уи ныбжьэгъум деж уздэкIуэм фэбжь къыплъысамэ. 3. КъызэрыкIуэ гъуэгум утету лэжьапIэ ущыкIуэкIэ. Псалъэм и жыIэгъуэкIэ, автобускIэ е уи уней автомобилымкIэ лэжьапIэ ущыкIуэм зыгуэр къыпщыщIамэ.
— Сыт пщIэн хуейр, фэбжь къыптехуамэ? 1. Уи лэжьапIэтым хъыбар егъащIэ. КъыпщыщIам уи унафэщIыр кIэщIрэ псынщIэу щыгъэгъуазэ. 2. Фэбжь къызэрыптехуам щыхьэт къытехъуэ тхылъ зэхэлъхьэ. Дохутырым зыхуэгъази, узэрымылэжьэфынумкIэ тхылъ къеIых.
Мыбы гу лъыфтэ! ЛэжьапIэ ущыкIуэкIэ, ущылажьэкIэ е укъыщыкIуэжкIэ, къыптехуа фэбжьыр производствэм епхауэ къалъытэ, ар уи лэжьыгъэм епха къалэнхэр щыбгъэзащIэм къохъулIамэ. Фэбжьыр производствэм епхарэ-емыпхарэ тегъэчынауэ ягъэувын щхьэкIэ, ар зэхигъэкIыпхъэщ абы папщIэ къызэрагъэпэща комиссэм.
Зыгъэхьэзырар ЗЕКIУЭЛI Хьэмыщэщ
Больше на Черкес хэку
Подпишитесь, чтобы получать последние записи по электронной почте.
