ГъэлъэгъуэныгъэфIхэр

«Къэрал къабзэ» («Чистая страна») парт проектым и къэухьхэм иту ирагъэкIуэкI Iуэхухэм нэхъапэу хыхьа хэгъуэгуи 5-м ящыщщ Къэрэшей-Черкесыр.
Проектым и федеральнэ координатор, Урысей Федерацэм и Къэрал Думэм экологиемкIэ и Комитетым и унафэщI Кобылкин Дмитрий и унафэм щIэту урысей хэгъуэгухэм папщIэ ирагъэкIуэкIа селектор зэIущIэм къыщапщытэжащ 2024 гъэм ягуэщIа лэжьыгъэм и къыпэкIуэныгъэхэр. Республикэм деж цIыху мин 400-м щIигъу хэтащ партым иригъэкIуэкIа щIыуэпс акцэхэм. 2024 гъэм «Къэрал къабзэ» проектым къызэщIиубыдащ цIыху мелуани 4.

Ахэр хэтащ Урысей псом щызэхаша щIыуэпс Iуэху мин 57-м. Хэгъуэгу пашитхум ящыщу Къэрэшей-Черкесым зыIэригъэхьащ пщIэ зиIэ е 4-нэ увыпIэр. Ар къыпэкIуащ псы Iуфэхэр зэрагъэкъэбза «Воды России», «Особенности национальной уборки» зэщIэкъуэныгъэ Iуэхухэм яхуэдэ дауэдапщэ убгъуахэм. 2021 гъэм къыщегъэжьауэ, экологие IэнатIэмрэ щIыщIагъ хъугъуэфIыгъуэхэр къызэрагъэсэбэпымрэ ятеухуауэ къащтащ хабзэ 60. Ахэр зэхэлъхьэным хэтащ цIыху мелуани 4-м нэблагъэ. Партыр кIэлъоплъ пхъэнкIий идзыпIэхэр зэрыIуахыжымрэ абыхэм къахьа зэраныр зэрагъэкIуэдыжымрэ. Апщыгъуэми, жэуаплыгъэ зэгъэза къулыкъухэр къыхуреджэ Iуэхугъуэ зэхэщIыхьахэр зэфIэхыным. — Ди хущIэкъуныгъэхэр зэрыдгъэубыдмэщ къалэн гугъухэр — пхъэнкIий идзыпIэхэр лъэныкъуэ егъэзыныр, псы Iуфэхэр гъэкъэбзэныр, экологие бэзхэр зэфIэгъэувэжыныр, щIыналъэхэм къэкIыгъэ щхъуантIэхэр щыхэсэнымрэ цIыхухэм щIыуэпс щIэныгъэхэр яхэлъхьэнымрэ — щыдгъэзэщIэфынур. «Къэрал къабзэ» парт проектыр апхуэдэ Iуэхухэр зэращIэ Iэмэпсымэ гъерэтыфIэщ, — жиIащ Кобылкин Дмитрий. Абы хэгъуэгу координаторхэм фIыщIэ яхуищIащ гъерэтыфIэу зэрылажьэм папщIэ. АЛЪЭСЧЫР Мухьэз