Гъатхэ дэшыгъуэр

Мэлыжьыхьым и 1-м Урысей Федерацэм щрагъэжьащ гъатхэ къулыкъу дэшыгъуэ кампанэр. Абы ипкъ иту КъЧР-м и военком, полковник БЕЛОБОРОДОВ Сергей республикэм и СМИ-хэм я журналистхэм зэпсэлъэныгъэ ядригъэкIуэкIащ.

Ар теухуауэ щытащ мыгъэрей гъатхэ къулыкъу дэшыгъуэ кампанэм, 2024 гъэм къулыкъу дэшынымкIэ я Iуэхухэр зэрызэкIэлъыкIуам, дяпэкIэ къапэщыт къалэнхэм. — Илъэс кIуам къытпэщыта къалэнхэм щызу дапэлъэщащ. Узэда Къарухэм  зауэлI къулыкъур щрахьэкIыну ди хэгъуэгум щыщу нэрыбгэ 400 дунэтIащ. Си гуапэщ къыхэзгъэщыну зи лэжьыгъэкIэ нэхъ къыхэжаныкIахэр. Апхуэдэщ Черкесск къалэр, Зеленчук, Уарп, Хьэбэз, Абазэ районхэм я военкоматхэр. Абыхэм щылажьэ гупхэм, военкомхэм фIыщIэ яхузощI, хабзэфI зэрахуэхъуам тету, лэжьэкIэфI къызэрагъэлъэгъуам папщIэ.

Мыгъэрей гъатхэ дэшыгъуэ кампанэр мэлыжьыхьым и 1-м щегъэжьауэ бадзэуэгъуэм и 15-м нэгъунэ екIуэкIынущ. Мэлыжьыхьым и 10-м призывной пунктхэм текIынурэ япэ гупхэр къулыкъу гъуэгум техьэнущ. Къулыкъу щIэным зэхъуэкIыныгъэ къыхыхьакъым. ИпэкIи хуэдэу, илъэскIэ къулыкъу ящIэнущ. Къулыкъу дэшыгъуэхэр къызэзыгъэпэщ пунктхэм дежи, гъуэгум тетыхункIи къулыкъум дэкIхэр ерыскъыкIи, псэупIэкIи, щыгъынкIи къызэгъэпэщауэ щытынущ.

Зи къулыкъу дэкIыгъуэхэми, абыхэм я анэ-адэхэми я упщIэ нэхъыщхьэм жэуап язот: СВО-р щекIуэкI щIыпIэхэм, апхуэдэ къабзэуи УФ-м и хэгъуэгущIэхэм: Донецк, Луганск цIыхубэ республикэхэм, Херсон, Запорожскэ областхэм зыри яшэнукъым. Къулыкъум дэкIхэм языныкъуэхэм зауэлI IэщIагъэхэр зрагъэгъуэту, мази 5 хуэдизкIэ ирагъэджэнущ, абыхэм ятещIыхьауэ военно-учет IэщIагъэхэр къыхуагъэфэщэнущ.  Языныкъуэхэр военнэ частхэм яунэтIынущ, дэтхэнэми и щIэныгъэ, IэщIагъэ, узыншагъэ елъытакIэрэ.

Къулыкъум дашынымкIэ унафэ къэхьыныр къыщыщIедзэ муниципальнэ къэхъугъэхэм щылажьэ призывной комиссэхэм. И узыншагъэкIэ, нэгъуэщI IуэхукIэ къулыкъум щIыдамышын щхьэусыгъуэ имыIэмэ, повесткэр къратынурэ республикэ екIуэлIапIэ пунктым къаунэтIынущ. ЖысIэну сызыхуейращи, къулыкъум дашым районхэми, республикэми, уеблэмэ дзэ пакIэхэм щынэсами къащыкIэлъоплъ, и узыншагъэ, и гукъыдэж, и псэ щытыкIэ щIаплъыкI. Щхьэусыгъуэ, дагъуэ гуэр зыхуащIар къулыкъум пэрагъэувэнукъым. КъинэмыщIауэ, анэ-адэхэр къыхузоджэ я быным къулыкъу ящIэным щымышынэным. Абыхэм яхуэмыхьын, яхуэмыгъэкъаруун, я узыншагъэм къытехьэлъэн зыми къатрилъхьэнукъым.

Ауэ, нэхъыщхьэращи, призывной комиссэхэм, медкомиссэхэм щызу ирахьэлIэн хуейщ я быным и узыншагъэм ехьэлIа дэфтэрхэр, къулыкъум пIалъэкIэ е зэгуэрми дамышынымкIэ хуитыныгъэ къайзытхэр.

Къулыкъум щIэныгъэ зиIэ щIалэ нэхъыбэ дашын папщIэ, колледжхэм еджэныр щаух, мэкъуауэгъуэбадзэуэгъуэ пIалъэм дэшыгъуэр нэхъ трагъэщIэнущ.

Мэлыжьыхьым и 10-м щегъэжьауэ лэжьэн щIидзэнущ Генеральнэ штабым и телефон зэпыщIэныгъэ псынщIэм. Ар цIыхухэм ядэлэжьэнущ гъубж, махуэку махуэхэм сыхьэтыр 10-м щегъэжьауэ 12-м нэгъунэ. Гъатхэ дэшыгъуэ кампанэм и къалэнхэмрэ мардэхэмрэ къытхуигъэнэIуащ Ипщэ военнэ округым икIи, сыт щыгъуи хуэдэу, согугъэ а къалэнхэр дгъэзэщIэным властри, военкоматхэри, цIыхухэри дызэдытелэжьэну. Зи къулыкъу щIэгъуэр зыуха къулыкъущIэхэр игъуэу я къулыкъухэм къыхагъэкIыжынущ, — жиIащ КъЧР-м и военнэ комиссарым.

ТУАРШЫ Ирэ