Абы теткІэрэ — я тхыдэ щІэнгъуазэри, я Іэпкълъэпкъ лъэкІыныгъэ-псыхьыныгъэхэри гъэунэхун лъэныкъуэхэри къызэщІаубыдэ. Мы тхьэмахуэм Черкесск къалэм дэт, зи № 18 гимзанием Іуэхугъуэ хьэлэмэт щекІуэкІащ, еджакІуэхэри, егъэджакІуэхэри, кърагъэблэгъа хьэщІэхэри хэту. Ар нэхъыщхьэу зытеухуауэ щытар гимназием илъэс зэхуэмыдэхэм и унафэщІу щыта, подполковник Данильченко Юрий Леонидовичщ.
ЖыІэпхъэщи, мы еджапІэм щылажьэхэм хуабжьу ялІалІэу яхъумэ Юрий Леонидович и фэеплъыр икІи абы хуэфэщэн лэжьыгъэ, Іуэхугъуэ зэмылІэужьыгъуэхэр ирагъэкІуэкІ зэпыт. Абыхэм ящыщ зы хъуащ иужьрейхэр. Класс зэхуэмыдэхэм щекІуэкІащ «200 дней стойкости и героизма», «Великая Сталинградская битва» фІэщыгъэцІэхэр зрата, лІыгъэм и дерсхэр. Абыхэм щызэпкърахащ, те плъэгъуэкІэрэ къыщагъэлъэгъуащ Сталинград къалэр нэмыцэ зэрыпхъуакІуэхэм щаІыгъам, ди дзэхэм хуит къыщащІыжам теухуа тхыдэр Дерсхэм пащащ мазаем и 4-м екІуэкІа линейкэмкІэ, фэеплъ пэкІумкІэ. ТІури зытеухуауэ щытар Данильченко Юрийщ.
Е 4-нэ классхэм щеджэ еджакІуэхэм къагъэлъэгъуащ зауэлІ дзэхэм я пэкІу. Узыгъэгушхуэ, къэкІуэнумкІэ фІэщхъуныгъэр нэхъри зыгъэбыдэ телъэгъуэ дахэт ар. АтІэ, класс къэскІэ хэс еджакІуэхэм а махуэм зыщатІэгъащ ди къэралым IэщэкIэ узэда и Къарухэр зэрызэхэт дзэхэм я зауэлІ фащэхэр. Къэпщытэжыныгъэ нэужьым, ягъэнэІуащ зи утыку къихьэр нэхъыфІу щытар: ар е 4-нэ «г» классрауэ къалъытащ икІи гупым и командирым ІэщІалъхьащ Данильченко Юрий и цІэкІэ зэІэпах кубокыр.
Шэч хэлъкъым а дакъикъэхэм дэтхэнэ еджакІуэми и гум гушхуэныгъэ къызэрихьар — и къэралымкІэ, абы и къарумкІэ, езы цІыкІур абы щыщ Іыхьэу зэрыщытымкІэ. Мы зэман зэхэтхъуам, къэралым къегъур куэд щыхъуам, СВО-м и гуащІэгъуэу щекІуэкІым, апхуэдэ гупсысэ узыншэм щІэблэм и акъылыр тепшэным гъэсэныгъэ и лъэныкъуэкІи, цІыхугъэкІи мыхьэнэ ин иІэщ…
А махуэр зи цІэкІэ зэхаша Данильченко Юрий Леонидович и фэеплъ пхъэбгъум удз гъэгъахэр, блэрхэр щагъэтІылъащ, дакъикъэкІэ щыму псори щытащ.
Больше на Черкес хэку
Подпишитесь, чтобы получать последние записи по электронной почте.
