ЕхъулIэныгъэфIхэр я щIэдзапIэу

ЩIэныгъэм хуэпабгъэ щIалэгъуалэр плъагъуныр гухэхъуэщ. Иужьрей тхьэмахуэхэм социальнэ зэпыщIэныгъэхэм я фIыгъэкIэ ди нэгум къыщIохуэ зэпыт курыт, ику ит, ищхьэ еджапIэхэр ехъулIэныгъэ пылъу къэзыуха щIалэгъуалэ насыпыфIэхэм я сурэтхэр. Апхуэдэхэм уи фIэщ ящI ди лъэпкъми, хэкуми я къэкIуэнур нэхуу зэрыщытынур. Хьэбэз районым щыIэ курыт еджапIэхэм щекIуэкIа къэзыпщытэж экзаменхэр мы гъэм пылъхьэншэу, хабзэкъутэныгъэ гуэри къэмыхъуу зэрекIуэкIам дыщигъигъуэзащ Хьэбэз муниципальнэ районым егъэджэныгъэмкIэ и Управленэм и унафэщI IэнатIэр пIалъэкIэ зыгъэзащIэ Аслъэныкъуэ Светланэ.

Абы къыхигъэщащ экзаменхэр тыншу къызэгъэпэща зэрыхъуар, еджакIуэхэм я щIэныгъэр нэгъэсауэ къызэрагъэлъэгъуар. Мы гъэм районым деж ЕГЭ-р еджакIуи 111-м, ОГЭ-р 368-м ятащ. ЕГЭ-р зытахэм ящыщу щIэныгъэ нэхъ лъагэ дыдэ нэрыбгитIым къагъэлъэгъуащ — Хьэбэз къуажэм дэт Хъупсырокъуэ Екатеринэ и цIэр зезыхьэ лицей-интернатым и еджакIуэхэу Абдокъуэ Аминрэ Гундэхъу Алинэрэ. Хьэбэз районым иджыри къэс зэи къыщамыхьауэ биологиемкIэ ЕГЭ-м балли 100 япэ дыдэу кърихащ КуэшХьэблэ къуажэм щыщ ГУНДЭХЪУ Алинэ Мурат и пхъум. Ари лицей-интернатым медицинэмкIэ классым и еджакIуэщ. Биологием куэдкIэ къыкIэрыхуакъым адрей предметхэри: химиемкIэ — балл 97-рэ, урысыбзэмкIэ — балл 94-рэ пщащэм къихьащ.

Алинэ еджэныр фIы дыдэу илъагъуу, зыхуигъэувыж къалэным ерыщу хуэкIуэ, жэуаплыгъэ зыхь еджакIуэу сыт щыгъуи еджапIэм щIэсащ. НыбжьыщIэм и гъащIэр ирипхын и мурадщ цIыхухэм я узыншагъэр хъумэным — ар щIохъуэпс дохутыр IэщIагъэм хуеджэну. АБДОКЪУЭ Амин Ахьмэд и къуэр ПсэукIэ-Дахэ къуажэм щыщщ, Бэвыкъуэ къуажэм щопсэу. ЕджапIэм зэрыщIыхьэ лъандэрэ фIы дыдэу щоджэ. Е 8-нэ классым ар Хьэбэз лицейм и медицинэ класс щхьэхуэм хэтIысхьэжащ, нэхъ куууэ а лъэныкъуэм зыхигъэгъуэзэн мурадкIэ. Ар ехъулIэныгъэ пылъу къиухащ, дыщэ медалри иIэу. Илъэс бжыгъэкIэ химием егугъуурэ къыдэкIуэтеящ икIи а предметымкIэ экзаменым балли 100 кърихащ. УрысыбзэмкIи балл 91-рэ къихьащ. ЩIэныгъэ нэс бгъэдэлъщ ныбжьыщIэм инджылызыбзэмкIи.

Амин зыщеджа еджапIэхэм щыжыджэращ. Ар олимпиадэхэм, зэпеуэхэм сыт щыгъуи зрипщытт, ехъулIэныгъэфIхэри къыщигъэлъагъуэт. Псом хуэмыдэу химиер къахигъэщхьэхукIт. ЕджакIуэхэм я Урысейпсо олимпиадэм и муниципальнэ Iыхьэм щытекIуащ, «Иннагрика» агротехникэмкIэ Урысейпсо зэпеуэми пхыкIауэ щытащ. НыбжьыщIэм и мурадщ дяпэкIэ и IэщIагъэр химием ирипхыну, нэхъри нэхъ куууэ ар иджыну. Къапщтэмэ, мы гъэм ЕГЭ-м къигъэлъэгъуа ехъулIэныгъэхэм уриплъэжмэ, щхьэхуэу къыхэгъэщыпхъэу къыщIэкIынщ Хьэбэз дэт лицейм и медицинэ классыр. Лицейм и унафэщI КIытIэ Еленэ дызэрыщигъэгъуэзамкIэ, мы илъэсым а классым щIэныгъэ лъагэ къагъэлъэгъуащ.

Апхуэдэу, балли 100 къэзыхьа ныбжьыщIитIым къакIэрыхукъым биологиемкIэ балл 98-рэ, химиемкIэ балл 97-рэ, урысыбзэмкIэ балл 91- рэ къэзыхьа Щохъужь Алии. КъинэмыщIауэ, а классым щыщу иджыри балл лъагэхэр къизыхахэм ящыщщ Сидакъ Фатимэ, ПIапIшу Лианэ, Аргун Ангелинэ, Нэхущ Элинэ, Щохъужь Арианнэ, Иуан Янэ, нэгъуэщIхэри. Шэч хэлъкъым, адрей къуажэхэми щIэныгъэ нэс къэзыгъэлъэгъуа ныбжьыщIэхэр зэрахэтым. Къэзыпщытэж экзаменхэр зэфIэкIащи, адэкIэ къыкIэлъыкIуэр ныбжьыщIэхэр зыщIэхъуэпс ищхьэ еджапIэм щIыхьэфынращи, дэтхэнэми я мурадхэр къадэхъуну, ехъулIэныгъэхэфIхэм нэсыну, лъэпкъри, республикэри, Хэкури зэрыгушхуэн цIыху къахэкIыну Тхьэм жиIэ!

БОРЭНЫКЪУЭ Мадинэ