Еджэныгъэм и семинар

Мы гъэм фокIадэ мазэм и 18-20 махуэхэм щыIэну хэхыныгъэхэм хуэкIуэу, хабзэфIым тету, КъЧР-м ХэхыныгъэхэмкIэ Комиссэм республикэм и СМИхэм семинар — егъэджэныгъэ ядригъэкIуэкIащ. Семинарым и къызэгъэпэщакӏуэу, гъэзэщӏакӏуэу щытащ КъЧР-м и ИК-м и лэжьакӏуэхэр. Егъэджэныгъэм хэтащ республикэм лъэпкъыбзэхэмкӏэ къыщыдэкӏ газетхэм, телевиденэхэм я лӏыкӏуэхэр, редактор нэхъыщхьэхэр, журналистхэр.

Еджэныгъэ семинарыр къызэӏуихкӏэрэ, Хэхыныгъэхэмкӏэ хэгъуэгу Комиссэм и секретарь Зиздок Аллэ къытепсэлъыхьащ хэгъуэгу СМИ-хэр зытетыпхъэ пӏалъэхэм, махуэхэм, телевиденэм — эфир зэману, газетхэм — напэкӏуэцӏ щӏыпӏэу кандидатхэм хуагъэнэӏуэн хуейхэм. Хэхыныгъэ къэс журналистхэр холажьэ. Абы папщӏэ, хэхыпӏэхэм щылэжьэнымкӏэ хуитыныгъэ яӏэн хуейщ. Апхуэдэ хуитыныгъэ иӏэщ ИК-м аккредитацэ зрита журналистым. Аккредитацэм теухуауэ щытыкӏэхэр игъэнэӏуащ Хэхыныгъэхэмкӏэ Комиссэм къызэгъэпэщыныгъэ лэжьыгъэмкӏэ и къудамэм и унафэщӏ Жантемыр Еленэ. Хэхыныгъэ агитацэхэм, хъыбарегъащӏэхэм яхьэлӏа хабзэкъутэныгъэхэм къытепсэлъыхьащ ИК-м хабзэхэмкӏэ и къудамэм и унафэщӏ Эбзеев Мурат. Семинарым и кӏэм упщӏэ-жэуап щытыкӏэм тету лъэныкъуэхэр зэпсэлъащ, зэчэнджэщащ.

ТУАРШЫ Ирэ

ЩIэплъыкIакIуэхэр ирагъаджэ

Фокӏадэм и 18-м къыщыщӏэдзауэ и 20 пщӏондэ Урысейм щекӏуэкӏыну, Къэрал Думэм и хэхыныгъэ кампанэм хэтыну жылагъуэ щIэплъыкIакӏуэхэм я егъэджэныгъэр «Спутник» щIэныгъэ гуэдзэ Купсэм щрагъэжьащ.

Егъэджэныгъэ программэр къыхэзылъхьар икӏи къызэзыгъэпэщар Къэрэшей-Черкес Республикэм и Жылагъуэ палатэращ. Икӏи апхуэдэ лэжьыгъэмкIэ къалэн зыхуагъэувыжащ щIэплъыкIакӏуэ корпусым хэтхэм я ӏэщӏагъэ лъагагъым хагъэхъуэну, щIэм хурагъэджэну. «Мыхьэнэшхуэ иӏэщ жылагъуэ щIэплъыкIакӏуэхэр иужьрей Хабзэм къыщыхъуа зэхъуэкӏыныгъэхэм ехьэлIауэ зэрырагъаджэм. Етӏуанэрауэ, щхьэхуэу щызэпкърахынущ республикэм и мызакъуэу, къэралым и хэхыпӏэхэм щекӏуэ кӏа щытыкӏэ пыухыкӏахэр, ныкъусаныгъэу, щыуагъэу ипэкIэ зэхагъэкIахэр. КъызэрымыкIуэу мы Iуэхугъуэр щхьэпэнущ къытпэщылъ хэхыныгъэхэр нэхъри тегъэчынауэ, тэмэму екIуэкIыным», — къыхигъэщащ УФ-м и Президентым и РАНХиГС-м и Ищхъэрэ-Кавказ институтым и унафэщI, УФ-м и Жылагъуэ палатэм хэт Лъыс Азэмэт. Егъэджэныгъэм ипкъ иткӏэ щIэплъыкIакӏуэхэм яджынущ я лэжьыгъэр зэкӏэлъызыгъакӏуэ мардэхэмрэ унафэхэмрэ. Къызэгъэпэщакӏуэхэм зэрыжаӏэмкӏэ, егъэджэныгъэр сэбэп мэхъу щIэплъыкIакӏуэхэр хэхыпӏэхэм щылэжьэным хуэгъэхьэзырыным и мызакъуэу, цӏыхухэм хабзэ хуитыныгъэхэр къахузэгъэпэщынми. Егъэджэныгъэ ӏуэхум хабзэ, практикэ ӏуэху куэд къызэщӏеубыдэ. ЩIэплъыкIакӏуэхэм куууэ зэхагъэкӏ блэкӏа хэхыныгъэ кампанэм иужькIэ къару зыгъуэта хэхакӏуэ Хабзэм халъхьэ зэхъуэкӏыныгъэхэм. Мыпхуэдэ егъэджэныгъэр щекIуэкIынущ республикэм и районхэми.

ХЬЭТАЙ Мадинэ