ГъукIэмыхъу Ехья Жэмбэч и къуэр — 1942 гъэм Ленинград блокадэр тезыхыжахэм яхэтащ. Прибалтикэм и лъэмыжхэм лагъымщIэхыу щыIащ 1944 гъэм. Зауэр щиухым Эстонием яунэтIащ щIэпхъаджащIэ гупхэр хигъэщIэну. Къыхуагъэфэщащ «Германием зэрытекIуам папщIэ», «ГуащIэдэкI хьэлэлым папщIэ» медалхэмрэ етIуанэ нагъыщэ зиIэ Хэку зауэшхуэ орденымрэ.
Жэгуэтэн Iэюб Екъуб и къуэр — фронтым доброволецу Iухьащ 1941 гъэм. Дыгъэгъазэ мазэм ягъэуващ 38-нэ дзэм и 300 Краснодар фочауэ дивизэм и 1049-нэ фочауэ полкым и шуудзэ тIасхъэщIэх ротэм и политрукыу, лейтенантащ. Японием и квантуныдзэм езэуахэм яхэтащ. Абы иIэщ япэ нагъыщэ зиIэ Хэку зауэшхуэ орденымрэ «Вагъуэ Плъыжь» орденитIрэ.
Дзэмыхь Джатэгъэжь Зэчрей и къуэр — мы зауэлI хъыжьэр хэтащ 136-нэ, 141-нэ гвардейскэ фочауэ полкхэм, 1038-нэ фочауэ полкым. Ар Кърым хытIыгуныкъуэр хуит къэзыщIыжахэм ящыщщ. Японием езэуащ 185-нэ лагъымщIэх батальон щхьэхуэм хэту. «Зауэ фIыщIэхэм папщIэ», «Германием зэрытекIуам папщIэ», Японием зэрытекIуам папщIэ» медалхэр, ещанэ нагъыщэ зиIэ ЩIыхь
орденыр къыхуагъэфэщащ.
Дзэмыхь Къурмэн-Алий Екъуб и къуэр — ИпщэКхъухьэпIэ фронтым и 753-нэ, 1032-нэ, 1085-нэ фочауэ полкхэм хэту зэхэуэ гуащIэхэр игъэунэхуащ. 42-нэ гвардейскэ фочауэ полкым и япэ Украинэ фронтым старшинауэ хэтащ. Къурмэн-Алий къуажэм къыдыхьэжащ япэ нагъыщэ зиIэ Хэку зауэшхуэ орденыр, «Вагъуэ Плъыжь» орденитIыр, «Хахуагъэм папщIэ, «Сталинград зэрахъумам папщIэ», «Москва зэрахъумам папщIэ», «Прагэ хуит къызэращIыжам папщIэ», «Германием зэрытекIуам папщIэ» медалхэр и Iэрылъхьэу.
Дыгъужь Хьэж-Мусэ Екъуб и къуэр — и къулыкъур щригъэжьащ 231-нэ топыдзэ гупым и запасу щыт фочауэ полкым хэту. И командирым и унафэкIэ 1945 гъэм Забайкальскэ хэгъуэгум ягъэIэпхъуэ япон квантуныдзэ ябгэм япэщIэтхэм защIигъэкъуэну. Абы иIэщ «Японием зэрытекIуам папщIэ», «Германием зэрытекIуам папщIэ» медалхэр.
Куэбл Хьэлым Iэсхьэд и къуэр — 101-нэ топыдзэ полкым и фронт зэхуэмыдэхэм щыIащ. Зауэм ипэкIэ трактор бригадэм и унафэщIащ. 1941-1945 гъэхэм ар
итащ Сталинградрэ Курск дугамрэ я зэуапIэхэм. «Хахуагъэм папщIэ», «Кенигсберг къызэращтам папщIэ», «Германием зэрытекIуам папщIэ» медалхэмкIэ и цIэр къыхагъэщащ.
Темыр Хьэж-Мусэ Жамбот и къуэр — Гомельскэ пулемет училищэр лейтенанту къиухащ. 1941-1946 гъэхэм ар фронтым щыщыIам, ротэми, батальоным и штабми я унафэщIу щытащ. Бийм IэщIимыгъыхьэу къызэтригъэнащ Орёл, Москва къалэхэр, ихъумащ Москварэ Ленинградрэ зэпызыщIэ гъущI гъуэгухэр. Хьэж-Мусэ ящыщщ япэ, етIуанэ нагъыщэ зиIэ «Хэку зауэшхуэ» орденхэмрэ «Вагъуэ Плъыжь» орден лъапIэмрэкIэ къыхагъэщахэм.
Сталинград зэхэуэхэм хэтахэм ящыщщ Жэгуэтэн Зэчрей, Дзэмыхь Мыхьэмэт, Ещэрхэ Мыхьмудрэ Iэубэчыррэ, Куэбл Борис, Темырхэ Сослъэнбэчрэ Алийрэ, Лъэбышэ Къэрал сымэ. ГъукIэмыхъу Чэшифрэ Алэкъей Тэлостэнрэ, жагъуэ зэрыхъущи, фронтым зи псэ щызына зауэлIхэщ…
Лыхь Тимур
Больше на Черкес хэку
Подпишитесь, чтобы получать последние записи по электронной почте.
