Ищхъэрэ-Кавказ Парламент Ассоциацэм и ХII конференцым и Ӏуэхугъуэ нэхъыщхьэр — пленар зэӀущӀэр — Архъыз зыгъэпсэхупӀэ жылагъуэм щекӀуэкӀащ. КъЧР-м и Ӏэтащхьэмрэ и Правительствэмрэ я Администрацэм и унафэщӀ Уэз Мурат къеджащ ди республикэм и лӀыщхьэ ТЕМРЕЗОВ Рэшид конференцым хэтхэм зэрызахуигъэза хъуэхъу псалъэхэм.
Абы Ищхъэрэ-Кавказ, Ипщэ федеральнэ хэгъуэгухэм, Абхъаз, Ипщэ Осетие къуэш республикэхэм я Парламентхэм къабгъэдэкӀа хьэщӀэ лъапӀэхэр ди хьэщӀагъафӀэ щӀыналъэм къызэреблэгъар зэригуапэр къыхигъэщащ. «Ищхъэрэ-Кавказ Парламент Ассоциацэм и е 12-нэ конференцыр щокӀуэкӀ илъэс псом зэӀуха курортым, псори щӀэрыщӀэу здыщаухуа, иджыри зызыужь Архъыз зыгъэпсэхупӀэм. ИкӀи, сэ къызэрысщыхъумкӀэ, ди Президент Путин Владимир и унафэм щӀэту иужьрей илъэсхэм ди къэралым зэрызихъуэжым ар и щыхьэт нэрылъагъущ, къэралкӀуэцӀ туризмэм и мызакъуэу, экономикэм, социальнэ ӀэнатӀэм я нэгъуэщӀ къудамэхэми псынщӀэу заужь, гъуэгу, коммунальнэ инфраструктурэр яухуэ, цӀыхухэм я щыӀэкӀэ-псэукӀэм и фӀагъым хохъуэ.
А зыужьыныгъэм фэри, хабзэкъэгъэщIхэри, ди цӀыхухэри фыхэтщ. Парламент Ассоциацэм ипкъ иту зэдэлэжьэныр — ди щӀыналъэхэм я пащхьэ къит Ӏуэхугъуэ нэхъыщхьэхэм здыщытепсэлъыхьыну ӀэмалыфӀщ. Дэ зэхуэдэу къытпэщытщ къалэнхэр, зэщхьщ ди гугъуехьхэмрэ мурадхэмрэ икӀи зэпсэлъэныгъэм, абыхэм ящыщу хэгъуэгу хабзэубзыху ӀэнатӀэм и зэфӀэкӀхэр тегъэщӀапӀэ тщӀыкӀэрэ, зэгъусэу хэкӀыпӀэ тэмэмхэр къэдгъуэтыфынущ», — итщ ди республикэм и Ӏэтащхьэм и хъуэхъум. Ипщэ-Урысей Парламент Ассоциацэм и лӀыкӀуэхэм къабгъэдэкӀыу конференцым хэтхэм захуигъэзащ Адыгэ Республикэм и Къэрал Советым — Хасэм и унафэщӀ Нарожный Владимир. — Ищхъэрэ Кавказымрэ Урысейм и Ипщэмрэ нобэ жыджэру заужь, ди хэхакӀуэхэм я псэукӀэм и фӀагъым хэгъэхъуэнымкӀэ Ӏэмалхэр къызэгъэпэщащ.
АбыкӀэ мыхьэнэшхуэ яӀэщ СКПА-мрэ ЮРПА-мрэ. Дунейпсо щытыкӀэ мытынш зэрыщыӀэм, зауэ операцэ хэха щрагъэкӀуэкӀ зэманым зэи хуэмыдэу ерыскъы шынагъуэншагъэм, СВО-м хэтхэмрэ абыхэм я унагъуэ хэмрэ дэӀэпыкъуныгъэ ягъэгъуэтыным теухуа Ӏуэхухэр къызэгъэпэщынымкӀэ ди зэкъуэтыныгъэр уасэншэщ.
ФӀыщӀэ яхузощӀ Урысейм и зауэлӀхэм, абыхэм ди хэкуэгъухэр куэду яхэтщ», — жиӀащ Нарожный Владимир. Абы къыхигъэщащ лъэпкъ куэд зыщыпсэу Урысейм и Ипщэр гъэбыдэнымрэ цӀыхухэр зэкъуэгъэувэнымрэкӀэ СКПА-мрэ ЮРПА-мрэ лъэкӀ къызэрамыгъанэр. ХабзэкъэгъэщӀ ӀэнатӀэм щиӀэ ехъулӀэныгъэхэм я фӀыщӀэу Адыгейм и спикерым КъЧР-м и ЦӀыхубэ ЗэӀущӀэм (Парламентым) и тхьэмадэ Иванов Александр къритащ Къэрал Советым — Хасэм и къулыкъу дамыгъэ нэхъыщхьэр — «Хабзэ. Къалэн. Напэ» жыхуиӀэр.
АдэкӀэ, Иванов Александр и нэӀэм щӀэту екӀуэкӀа конференцым и зэӀущӀэм хэтахэр тепсэлъыхьащ Ӏуэхугъуэ 26-м. ЗэӀущӀэм ипкъ иту Ищхъэрэ Кавказым и парламентхэм федеральнэ властым и къулыкъухэм зэрызыхуагъэза, къыхалъхьахэмрэ хабзэ проектхэмрэ зэдащтащ. Ахэр социальнэ, мэкъумэш ӀэнатӀэхэм, административнэ кодексым, хьэкълыкъхэм я Ӏуэхухэм, промышленностым, щӀалэгъуалэ политикэм, хэгъуэгухэм загъэужьыным, нэгъуэщӀхэми ятеухуащ.
Абыхэм ящыщу 13-р Къэрэшей-Черкесым и ЦӀыхубэ ЗэӀущӀэм (Парламентым) къыхилъхьащ икӀи зэӀущӀэм хэтахэр абыхэм арэзы техъуащ. Конференцым ипкъ иту КъэрэшейЧеркесым и Парламентымрэ Дагъыстанымрэ Ингушымрэ я хабзэкъэгъэщӀ къулыкъухэмрэ зэдэлэжьэным теухуа ЗэгурыӀуэныгъэхэм Ӏэпэ щӀадзащ. ЗэӀущӀэм и кӀэм къалэнхэр зэӀэпахащ — къыкӀэлъыкӀуэ XIII конференцыр егъэкӀуэкӀынымкӀэ эстафетэр Дагъыстан Республикэм ищтащ.
КъЧР-м и Iэтащхьэмрэ и Правительствэмрэ я пресс-къулыкъу
Больше на Черкес хэку
Подпишитесь, чтобы получать последние записи по электронной почте.
