полоса 2

ДЫЩЭКI Iэюб IэщIэмыхьэжа зауэ нагъыщэхэр

admin4 недели спустя2 недели спустя03 минуты

Илъэс 80-м зэрынэхьэс текIыжауэ, сержант нэхъыжь ДЫЩЭКI Iэюб Хьэрун и къуэм ещанэ нагъыщэ зиIэ ЩIыхь Орденымрэ «Кавказыр зэрихъумам папщIэ» медалымрэ зэрыхуагъэфэщауэ щытам ехьэлIауэ къыдэкIа Унафэм ипкъ иту, фронтовикым и зауэ нагъыщэхэр и Iыхьлы бзылъхугъэм Iэрагъэхьэжынущ…
Хэкум и хъумакIуэ хъыжьэу зауэм хэкIуэда ДыщэкI Iэюб и фэеплъыр зыгъэщыпкъэжыну лэжьыгъэр едгъэжьауэ щытащ 2018 гъэм и мазае (февраль) мазэм. «РГ» сайтым, «Звезды Победы» проектым и лъыхъуапIэ базэм деж дэ тхыгъэ къытIэрыхьащ ДыщэкI Iэюб ещанэ нагъыщэ зиIэ ЩIыхь орденыр зэрылъэмыIэсыжам теухуауэ. ИкIи, иужь дихьащ къэтлъыхъуэну фронтовикым и унагъуэм щыщхэр, и Iыхьлыхэр. КъытIэрыхьащ хъыбар Iэюб зауэм щыдэкIам щхьэгъусэ зэриIамкIэ. Ауэ, сабий къащIэхъуэн яхущIыхьатэкъым. ЩIалэм и щхьэр Хэку зауэшхуэм щигъэтIылъащ.
Фигу къэдгъэкIыжынщи, а илъэсым иджыри къэрал нагъыщэхэм я удостоверенэхэр ар зыхуагъэфэщауэ щытахэм я Iыхьлыхэм ирату, ахэр Iыхьлы гъунэгъу дыдэу щытми, Урысей Федерацэм и къэрал нагъыщэхэм я Положенэм къыхэлъытатэкъым. Иджыщ а Положенэм зэхъуэкIыныгъэ халъхьэкIэрэ, лъэкIыныгъэ къыщыкъуэкIар, илъэсихкIэ узэIэбэкIыжмэ дигу идубыдауэ щытар зэдгъэхъулIэну.
ДыщэкI Iэюб къыщыхъуащ 1916 гъэм Дохъушыкъуей (иджы ВакIуэ-Жылэ) къуажэм. Черкесскэ РВК-м адыгэ щIалэр Дзэ Плъыжьым къулыкъу щищIэну ириджауэ щытащ 1939 гъэм и гъатхэпэ мазэм. Апхуэдэуи, Хэку зауэшхуэми хэхуащ…
Iэюб ящыщщ лIыхъужьыгъэ зезыхьэу Кавказыр бийм щызыхъумахэм. 1943 гъэм мазае мазэм щегъэжьауэ 31-нэ IэфIауэ дивизым хэту Краснодар ебгъэрыкIуэ операцэм хэлIыфIыхьащ. 1943 гъэм и мазаем и 12-м Краснодар хуит къэзыщIыжахэм яхэтащ.
Иужьым, Iэюб зыхэта дивизыр нэсащ Днепр, Дарницэ и Iэхэлъахэм фашист гупыр щызэтраукIащ. ИкIи, 1943 гъэм и фокIадэм икIэм Днепр псым зэпрыкIри, Днепропетровскэ областым и Криничанскэ районым хыхьэ Аулы жылагъуэм и Iэхэлъахэм къыщыхутащ.
Абы къыкIэлъыкIуэу, 1944 гъэм Iэюб хэтащ Корсунь-Шевченковскэ, Уманско-Ботошанскэ зауэ операцэхэм. Ясско-Кишинёвскэ операцэм ипкъ иту екIуэкIа зэхэуэ хьэлъэхэм лIыгъэ къыщигъэлъагъуэу къыхэщащ дохъушыкъуей щIалэр.
ДыщэкI Iэюб и зауэ гъуэгуанэмрэ къигъэлъэгъуа лIыхъужьыгъэмрэ дэ щыгъуазэ дыхуащI абы и цIэр къызэрыраIуа зауэ нагъыщэхэм. Феплъ а унафэм:
«Приказом командира 248-го стрелкового полка 31-й стрелковой Сталинградской ордена Богдана Хмельницкого дивизии 4-й гвардейской армии от 30 августа 1944 года №017/н командир отделения 2-й стрелковой роты 2-го стрелкового батальона сержант Дышеков Аюб Харунович был награждён медалью «За отвагу» – «за то, что 22 августа 1944 года личным примером увлёк бойцов в атаку и лично уничтожил двух солдат противника».
КъыкIэлъыкIуэу, а унафэм итщ ДыщэкI Iэюб Хэку зауэшхуэм и фронт куэдым зэрыIутар къэзыгъэлъагъуэ щытыкIэхэр: 1941 гъэм мэкъуауэгъуэм (июным) щегъэжьауэ 1942 гъэм и шыщхьэIум (августым) нэгъунэ – Ипщэ фронтым; 1942 гъэм и шыщхьэIум (августым) щыщIэдзауэ 1943 гъэм и мазаем (февралым) нэгъунэ – КавказщIыб фронтым; 1943 гъэм и мазае – мэлыжьыхь (апрель) мазэхэм – Ищхъэрэ-Кавказ фронтым; 1943 гъэм и мэлыжьыхь – мэкъуауэгъуэ (июнь) мазэхэм – СВО-м; 1943 гъэм и мэкъуауэгъуэм щыщIэдзауэ дыгъэгъазэм (декабрым) нэс – Ипщэ-КъухьэпIэ фронтым; 1943 гъэм дыгъэгъазэм щегъэжьауэ – етIуанэ Украинэ фронтым.
1943 гъэм мазаем и 3-м Iэюб мыхьэлъэу уIэгъэ хъуауэ щытащ.
ДыщэкI Аюб хэтащ Сандомир-Силезскэ, Нижнесилезскэ ебгъэрыкIуэ зауэ операцэхэм. 1945 гъэм мазаем и 19-м ДыщэкIым къыкIэлъыкIуэ зауэ нагъыщэр къызэрыхуагъэфэщэным щIэлъэIуу командованэм тхыгъэ къыбгъэдэкIауэ щытащ. А тхыгъэм мыпхуэдэу итщ:
«Во время форсирования реки Нида 13 января 1945 года тов. Дышеков несмотря на ураганный артиллерийско-миномётный огонь противника одним из первых со вторым отделением взвода вышел на окраину села Мотковице и, ворвавшись в траншею противника, лично уничтожил расчёт станкового пулемёта в количестве четырёх солдат, обеспечив тем самым успех действия всего взвода.
При форсировании реки Одер западнее села Штейне 25 января 1945 года, закрепившись на западном берегу реки, при отражении четвёртой – самой ожесточённой контратаки противника захватил станковый пулемёт, а его расчёт уничтожил.
За отличные боевые действия и личную отвагу тов. Дышеков достоин награждения орденом».
Ауэ, командованэр ДыщэкI Iэюб зауэ нагъыщэ зэрыхуэфащэм теухуа тхыгъэр щIагъэбыдэхункIэ, езыр зауэм хэкIуадэри, къыхуагъэфэщэну иратха нагъыщэр зауэлIым къыIэрыхьэжакъым.
31-нэ IэфIауэ дивизым игъуэта къэзмыгъэзэжыну хэщIыныгъэхэр къыздыщыгъэлъэгъуауэ 1945 гъэм мэлыжьыхьым (апрелым) и 4-м къыдэкIа, зи №42708-рэ дэфтэрым зэрыщитымкIэ, 248-нэ IэфIауэ Кишинёвскэ полкым и япэ IэфIауэ батальоным и къудамэм и командир, сержант нэхъыжь ДыщэкI Iэюб Хьэрун и къуэр 1945 гъэм гъатхэпэм (мартым) и 5-м зэхэуэм хэкIуэдащ. Япэ щIыкIэ здыщIалъхьэжар Германием и Силезие щIыналъэращ, Херцогсвальдаву жылагъуэм и ипщэ-къуэкIыпIэ къуажэбгъум, чырбыж заводым и ищхъэрэмкIэ метр 200-кIэ.
Суворовым и орденыр зезыхьэ, 248-нэ IэфIауэ Кишинёв полкым и командир, подполковник Тягульскийрэ полкым и штабым и унафэщI капитан Кавалеррэ 1945 гъэм гъатхэпэм и 9-м Ставрополь крайм хыхьэ Черкесскэ район зауэ комиссарым хъыбарегъащIэр къыхуагъэкIуащ (тхыгъэр зэратха дыдэм хуэдэу фи пащхьэ идолъхьэ):
«Прошу известить гр-ку Дишекову Геша проживающую Ставропольский край Черкеский р-н с. Вахожилье в том, что ее муж ст. сержант ком. отделения Дишеков Аюб. в бою за Социалистическую Родину, верный воинской присяге, проявив геройство и мужество, погиб 5 марта 1945 года. Похоронен с отданием воинских почестей на Юго Вост. окр. с. Херцогавальдау сев 200 м кирпичного завода провинция Силезия (Германия)».
МыдэкIэ, ДыщэкI Iэюб орден зэрыхуэфащэмкIэ ятхауэ щыта тхыгъэм мазитI текIауэ унафэкIэ щIагъэбыдащ.
«Приказом командира 31-й стрелковой Сталинградской Краснознамённой орденов Суворова и Богдана Хмельницкого дивизии 1-го Украинского фронта от 12 апреля 1945 года №036/н командир стрелкового отделения 1-го стрелкового батальона 248-го стрелкового Кишинёвского полка старший сержант Дышеков Аюб Харунович, кандидат ВКП (б) с 1944 года №7522234, был награждён посмертно орденом Славы III степени».
Зауэ нэужьым, орденыр къэзылъэщам щыхуамыгъэфащэм, езы нагъыщэми, щIыхь тхыгъэми Москва ирагъэгъэзэжри, ЗыхъумэжыныгъэмкIэ Министерствэм и архивым щетIысэхащ.
Жагъуэ зэрыхъущи, ДыщэкI Iэюб Хьэрун и къуэм и цIэмрэ и фэеплъымрэ щагъэщыпкъакъым ар етIуанэу здыщыщIалъхьэжами: совет, польскэ зауэлIхэмрэ гъэру къащтахэмрэ я кхъэм, Польшэ Республикэм и Болеславец къалэм, Нижнесилезскэ воеводствэм и Вилловэ уэрамым тетым.
ЗауэлI хахуэм и къуэшым ипхъу Мыкуминат дэ къыщытлъыхъуащ Черкесск къалэм. АбыкIи зыкъытщIигъэкъуащ Афэшагъэ Рэмэзан Алий и къуэм.
Зауэм хэкIуэда ДыщэкI Iэюб и къуэшым и пхъум къыбгъэдэкIыу, 2024 гъэм щэкIуэгъуэм (ноябрым) и 18-м дэфтэрхэр дгъэхьэзырри, УФ-м ЗыхъумэжыныгъэмкIэ и Министерствэм кадрхэмкIэ и Управленэ Нэхъыщхьэм лъэIукIэ захуэдгъэзат. УпщIэ нэхъыщхьэу дгъэувар зауэлIым къылъэмыIэсыжа, СССР-м и къэрал зауэ нагъыщэхэм я удостоверенэхэр и Iыхьлым къратыжыныр щIаплъыкIыну.
2024 гъэм дыгъэгъазэм (декабрым) и 4-м УФ-м ЗыхъумэжыныгъэмкIэ и Министерствэм кадрхэмкIэ и Управленэ Нэхъыщхьэм къыбгъэдэкIыу Мыкуминат Хъусин и пхъум тхыгъэ къыIэрыхьащ. Абы мыпхуэдэу итщ: «Зыкъызэрытхуэвгъэза, уи адэкъуэш ДыщэкI Iэюб къыхуагъэфэщауэ щыта, СССР-м и зауэ къэрал нагъыщэхэм ехьэлIа удостоверенэхэр уэттыжынымкIэ упщIэр, щIэтплъыкIащ.
СССР-м и къэрал нагъыщэхэм я удостоверенэхэр ар къызыхуагъэфэща, хэкIуэда фронтовикым (дунейм ехыжам) и унагъуэм щыщхэм, Iыхьлыхэм иратыжыным лъабжьэ хуэхъур военнэ командованэм и справкэ е архив дэфтэрхэращ, нагъыщэр къызэрыхуагъэфэщам е щIыхь зыхэлъ нагъыщэхэр къызэрыIэрымыхьэжам щыхьэт техъуэу.
Урысей Федерацэм ЗыхъумэжыныгъэмкIэ и Министерствэм и Купсэ архивым щIэлъ дэфтэрхэр щIэдджыкIкIэрэ, дэ зэхэдгъэкIащ ДыщэкI Iэюб къыхуагъэфэщауэ щыта нагъыщэхэр:
СССР-м и Ищхьэ Советым и Президиумым 1944 гъэм накъыгъэм (майм) и 1-м къыдигъэкIа Унафэм ипкъ иту – «Кавказыр зэрихъумам папщIэ» медалыр. Фронтовикым медалыр IэщIалъхьэжауэ хъыбар щыIэкъым;
1944 гъэм шыщхьэIум (августым) и 30-м 248-нэ IэфIауэ полкым и командирым къыдигъэкIа, зи №017/н УнафэмкIэ – «За отвагу» медалыр. Медалым и №1464723; пIалъэ удостоверенэм — Г №453173. Ар фронтовикым Iэрыхьэжащ;
1945 гъэм мэлыжьыхьым (апрелым) и 12 -м зи №036/н., 31-нэ IэфIауэ дивизым и командирым и УнафэмкIэ – ещанэ нагъыщэ зиIэ ЩIыхь орденыр. Фронтовикым и зауэ нагъыщэр и Iыхьлыхэм иратыжауэ хъыбар хэлъкъым.
ИщхьэкIэ къеттхэкIар къыхэтлъытэкIэрэ, «За отвагу» медалым и удостоверенэр фэттыжыну дыхэтынукъым.
ДыщэкI Iэюб Хьэрун и къуэм къыхуагъэфэща, ещанэ нагъыщэ зиIэ ЩIыхь орденымрэ «За оборону Кавказа» медалымрэ я удостоверенэхэр фIэрыдгъэхьэжыныр къызэдгъэпэщынущ ягъэбелджыла чэзум ипкъ иту, Урысей Федерацэм и Президентым къэрал нагъыщэхэмкIэ и Управленэм къыпыкIа нэужь».
Хэку зауэшхуэм щыгъуэ зауэлIым къилъэщауэ, къыхуагъэфэщауэ къратыжын хущIэмыхьа зауэ нагъыщэу дызылъыхъуам, къэтлъыхъуэжам и къыкIэлъыкIуэ лэжьыгъэр ехъулIэныгъэ хэлъу зэфIэтхащ.
Унафэм Iэпэ зэрыщIадзрэ илъэс 80-м зэрынэхьэсауэ, Цыгъурыгъу Мыкуминат Хъусин и пхъум Iэрагъэхьэжынущ и адэкъуэш, сержант нэхъыжь ДыщэкI Iэюб Хьэрун и къуэм къыхуагъэфэщауэ щыта, ещанэ нагъыщэ зиIэ ЩIыхь орденымрэ «Кавказыр зэрихъумам папщIэ» медалымрэ я удостоверенэхэр.
НЭХУЩ Ахьмэд БеталI и къуэр,
КъБР-м и УФНС-м и къэрал хьэкълыкъ инспектор нэхъыщхьэ,
УФ-м япэ класс зиIэ къэрал граждан къулыкъум и Чэнджэщэгъу