Дохутыр гумызагъэ

«Псом щхьэкІи псэкІэ согузавэ», — узым хигъэзыхьу медицинэм и дэІэпыкъуныгъэ хуэныкъуэ щыхъум деж, тхьэм ирещІи, дэтхэнэри зыщІэхъуэпсыр а псалъэхэр зи лэжьэкІэ гъуазэ дохутырщ. Апхуэдэращ зыхужаІар «И псалъэри хущхъуэщ» жэуэ. АтІэ, и псалъэкІи, и лэжьэкІэкІи, и зэфІэкІкІи щапхъэ зытрах дохутырхэр диІэщ, гуапэ зэрыхъущи. Нэхъ гуапэжщ къалэшхуэхэм щылажьэ ди лъэпкъэгъухэм я фІыщІэ зэхэпхыныр.
Къызэредгъэжьа псалъэхэри, тхыгъэри зэхьэлІар къэралым и щыхьэр Москва къалэм дэж зи №5 поликлиникэм и къудамэ е 3-нэ поликлиникэм и дохутыр пашэ УЭЗ Тезадэ Юрэ ипхъуращ. ЖыІэпхъэщи, Тезадэ ипэкІи дытетхыхьауэ щытащ. Апщыгъуэм ди тхыгъэм щхьэусыгъуэ хуэхъуат Москва щекІуэкІа «Активный гражданин» интернет — Іэ ІэтымкІэ ар къалэм и терапевт нэхъыфІ дыдэу къалъытэу цІыхубэм къызэрыхихар.

АтІэ, хэти зэрезэгъынщи, цІыхубэ дзыхьымрэ фІылъагъуныгъэмрэ ауэ нокІуэкІэ къыпхуэлэжьынукъым, ар зэрыщІэбгъэбыда фІыгъуэ пкІэрымылъу. Апхуэдэ фІыгъуэщ Тезадэ цІыхухэм далъагъу гуапагъэр, зэхэщІыкІыр, щІэныгъэ нэсыр. Апщыгъуэми, къыхэгъэщыпхъэщи, «Активный гражданин» Іэ Іэтым Уэзым и пашэныгъэм къеныкъуэкъуфын къигъэнакъым: езым хуэдэу лажьэ терапевт мини 3-м щІигъум я пашэ хъуащ. Іэ Іэтым москвадэс мин 200-м щІигъу хэлэжьыхьауэ щытащ апщыгъуэм.

ЖыпІэнуракъэ, хэхыныгъэм хэтар цІыхубэращ, дохутырхэр зыдэлажьэ цІыху щхьэхуэхэращ. Балли 10-кІэ дохутырым и лэжьыгъэр цІыхухэм къалъытэну апхуэдэти, Уэз Тезадэ балли 9,69-рэ хуагъэуващ. ЖыІэпхъэщи, 2014, 2016 гъэхэми, нэгъуэщІхэми ирагъэкІуэкІа къыхэхыныгъэхэм ди лъэпкъэгъу бзылъхугъэр пашэ щыхъуащ. Иджыри зэ Уэз Тезадэ дытетхыхьын щхьэусыгъуэ хьэлэмэт хуэхъуащ и лэжьэкІэ щапхъэфІыр, и иужьрей ехъулІэныгъэм газетым еджэхэр щыдгъэгъуазэмэ я гуапэу Тезадэ и Іыхьлыхэм зыкъызэрытхуагъэзар. Илъэс кІуам, дыгъэгъазэ мазэм икІэхэм Москва гуфІэгъуэ дауэдапщэ щекІуэкІащ. Ар теухуауэ щытащ ипэкІэ ирагъэкІуэкІа зэхьэзэхуэм, «Искусственный интеллект»-мкІэ терапевт нэхъыфІыр щагъэнаІуэм къыхэжаныкІахэр, бжьыпэр къэзыхьахэр утыкум ишэным, яхъуэхъуным. АтІэ, апхуэдэ зэхьэзэхуэ лъэрыхьым аргуэру зиш къыхэжари, бжьыпэр къэзыхьари ди Уэз Тезадэщ.

Москва къалэм и мэр Собянин Сергей и Іэпэрэ мыхъуррэкІэ щІэгъэбыда ФІыщІэ тхылъыр Тезадэ и лэжьэкІэфІым и щыхьэту щІыхь утыкум къыщыхуагъэфэщащ. ИужькІи, гуфІэгъуэ дауэдапщэ иращІэкІащ дохутырыныр ІэщІагъэу къыхэзыхахэм, медицинэм хуащІа тхьэлъанэ псалъэм икъраррэ напэ хужьрэкІэ бгъэдэтхэм. « Уэз Тезадэ Юрэ и пхъур — дохутырыныр зи лъым хэлъу къалъхуа» зыхужаІэхэм ящыщщ. Апхуэдэхэр ди зэманым зырызыххэщ. Абы дэтхэнэми бгъэдыхьэкІэ, псалъэ гуапэ къыхуегъуэтыф, егъэхъуж. Ар щІагъэбыдэж цІыхухэм, я Іэ ІэткІэ Тезадэ фІым я нэхъыфІыжу къыщалъытэкІэ», — аращ Уэзым и унафэщІхэм къыхужаІэр. Пэжщ а псалъэхэр, Тезадэ и лъым дохутырыныр хэту къэхъуам шэчышхуэ къытепхьэфынукъым. АтІэ, курыт еджапІэ нэужьым Къэрэшей-Черкес мединститутым щІыхьащ. Абы щеджэурэ санитаркэуи лажьэт. Къиуха нэужь, щылэжьащ рес публикэ къалэ поликлиникэм, Хьэбэз район сымаджэщым дохутыр-терапевту, ПсэукІэДахэ сымаджэщым и дохутыр нэхъыщхьэу. 2012 гъэм щегъэжьауэ Москва щолажьэ. Езым зыкъеумысыж зэрысабийрэ дохутыр ІэщІагъэм щІэхъуэпсу зэрыщытар икІи ищІа мурадым текІакъым, зригъэхъулІащ. «Апхуэдизу сызыщІэхъуэпсар къызэрызэхъулІам, си лэжьэкІэр цІыхухэм ягу зэрырихьыр зэрагъэнэІуам нэхъри сытрегъэгушхуэ, нэхъри сыхуэпэбгъэнущ си къару, си лъэкІыныгъэ къихь псори сщІэным, цІыхубэ дзыхьыр згъэпэжыжыным», — жеІэ Тезадэ.

Ахэр зэрымыпсалъэ дыгъэлым и щыхьэтщ «Аргументы и факты» газетым Уэз Тезадэ дригъэкІуэкІа зэпсэлъэныгъэм деж журналистым и упщІэхэм иритыжа жэуапхэр. «Дохутыр ІэщІагъэм и нэхъапэр медицинэр фІыуэ плъагъунращ. ЕтІуанэр аращи, цІыхухэм уадэІэпыкъуным пабгъэныгъэ хууиІэн хуейщ. Шэч зыхэмылъращи, уи щІэныгъэкІэ, ІэщІагъэкІэ ену, умыувыІэу зыбужьын хуейщ. Дохутыр ІэщІагъэ зэбгъэгъуэтыныр диплом зыІэрыбгъыхьэным щиухкъым, абдеж къыщыщІедзэ къудей, ухуейуэ щытмэ. Зи ныбжь хэкІуэта сымаджэ къыщысхуэкІуэкІэ, ахэр нэхъыбэу зыхуэныкъуэ гулъытэр, къызэрыкІуэ зэпсэлъэныгъэр зэразгъэгъуэтыным сыпылъщ. «ДыщІэкІыжыну дыхуейкъым» щыжаІэри куэдыкІейщ. Арэзыуэ щыщІэкІыжкІэ — сэри си гуапэ мэхъу. Уеблэмэ, я унагъуэ Іуэхухэми, я Іыхьлыхэми тепсэлъыхьыну хуейщ зи ныбжь хэкIуэтахэр. Ауэ, зы цІыхум дакъикъэ 12-15 нэхъыбэ тебгъэкІуадэ щымыхъунум деж, узэрыхуейм хуэдэу щызу уи гулъытэри, медицинэ хуэІухуэщІэхэри ябгъэгъуэтыну гугъущ. Абы къыхэкІыу, къыздыщІыхьэм щІызодзэри и узыфэ дагъуэм, и зекІуэкІэкІэ, плъэкІэкІэ, псэлъэкІэкІэ диагнозым согупсыс.

Зэманщ сыт и лъэныкъуэкІи схуримыкъур», — зэпсэлъэныгъэм къыхэтщыпыкІа жэуап зыбжанэщ мыр. Ауэ, дызэреплъымкІэ, абыхэм наІуэу къаІуатэ Уэз Тезадэ и хьэлщэнри, и лэжьэкІэ хабзэри, и Iуэху бгъэдыхьэкIэри. Уэз Тезадэ Юрэ и пхъур щэнейрэ «Дохутыр нэхъыфІ» щІыхьыцІэм хуэфащэу Москва деж цІыхубэм къыхихащ. И унагъуэкІи, и лэжьыгъэкІи ехъулІауэ, насыпыфІэу мэпсэу ди лъэпкъэгъу бзылъхугъэ гумызагъэр. Дэ къыдбгъэдэкІыу къэнэжыр нэхъри зиузэщІыну, и гуащІэрэ и щІыхьрэ зэкІэрымыхуу, и цІэр куэдрэ ираІуэу, насыпыфІэу псэунымкІэ дехъуэхъунращ!
ТУАРШЫ Ирэ